(កំពត)៖ មានតែគណបក្សប្រជាជនកម្ពុជាតែមួយគត់ដែលដឹកនាំប្រទេសមានភាពរីចម្រើន មានសុខសន្តិភាព និងការអភិវឌ្ឍន៍ ពិសេសបានផ្តល់សិទ្ធិសេរីភាពគ្រប់បែបយ៉ាងដល់ប្រជាពលរដ្ឋយើង។ដូច្នេះសូមលោកយាយ លោកតានិងបងប្អូនប្រជាពលរដ្ឋបន្តការគាំទ្រនិងបោះឆ្នោតជូនគណបក្សប្រជាជនកម្ពុជា នៅលេខរៀងទី២០ ដើម្បីបន្តរក្សាសុខសន្តិភាពជូនជាតិមាតុភូមិបន្តទៀត។
ការលើកឡើងបែបនេះ ជាប្រសាសន៍របស់ ឯកឧត្តម កិតិ្តសេដ្ឋា បណ្ឌិត ចម ប្រសិទ្ធ សមាជិក គណៈកម្មាធិការកណ្តាលគណបក្សប្រជាជនកម្ពុជា ប្រធានក្រុមការងារថ្នាក់កណ្តាលចុះជួយខេត្តកំពតថ្លែងក្នុងឱកាសចុះយុទ្ធនាកាឃោសនារកសម្លេងគាំទ្រ នា ព្រឹកថ្ងៃអាទិត្យ ១០កើត ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២២ខែកក្កដា ឆ្នាំ២០១៨ នៅវត្តអង្គសុរភី ស្ថិតក្នុងភូមិអង្គសុរភី ឃុំអង្គសុរភី ស្រុកកំពង់ត្រាច ខេត្តកំពត ដែលមានសមាជិក សមាជិកា និងប្រជាពលរដ្ឋ ចូលរួមប្រមាណ២.៥០០នាក់។
ឯកឧត្តម កិតិ្តសេដ្ឋា ទេសរដ្ឋមន្ត្រី ចម ប្រសិទ្ធ បានបញ្ជាក់ទៀតថា គណបក្សប្រជាជនកម្ពុជាបានខិតខំប្រឹងប្រែងស្តារប្រទេសតាំងពីបាតដៃទទេរហូតមានអ្វីៗគ្រប់បែបយ៉ាង ហើយសមិទ្ធផលជាច្រើនដែលគណបក្សប្រជាជនកម្ពុជាសម្រេចបាននាពេលនេះគឺជាការលះបង់ខ្ពស់របស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលជានិច្ចកាលតែងខិតខំយ៉ាងស្វិតស្វាញយកញើសឈាមនិងជីវិតទៅប្តូរ ទើបប្រទេសជាតិមានសុខសន្តិភាព និងមានការអភិវឌ្ឍន៍រហូតដល់បច្ចុប្បន្ននេះ។
ឯកឧត្តម ទេសរដ្ឋមន្ត្រី ក៏បានលើកឡើងផងដែរពីល្បិចកលរបស់ក្រុមបក្សនយោបាយមួយចំនួនដែលតែងតែដើរកុហក បោកប្រាស់ប្រជាពលរដ្ឋសម្រាប់បំពេញមហិច្ឆិតារបស់ខ្លួន ដូចជាបក្សនយោបាយខ្លះបានញុះញង់លោកយាយ លោកតា និងបងប្អូនប្រជាពលរដ្ឋកុំឲ្យទៅបោះឆ្នោត។ទន្ទឹមនឹងពាក្យភូតកុហកនេះ សូមបងប្អូនកុំជឿពាក្យបោកប្រាសរបស់ក្រុមខិលខូចទាំងនោះឲ្យសោះ ហើយលោកតា លោកយាយនិងបងប្អូនប្រជាពលរដ្ឋ សូមអញ្ជើញចូលរួមទៅបោះឆ្នោតជ្រើសតាំងតំណាងរាស្ត្រនីតិកាលទី៦នៅថ្ងៃទី២៩ខែកក្កដា ឆ្នាំ២០១៨ទាំងអស់គ្នា គឺបោះឆ្នោតជូនគណបក្សប្រជាជនកម្ពុជា នៅលេខរៀងទី២០ដែលមានរូបទេវតា បាចផ្កាជាសម្គាល់ ដើម្បីគាំទ្របេក្ខភាព សម្តេចតេជោ ហ៊ុន សែន ធ្វើជាអ្នកដឹកនាំប្រទេសក្នុងអាណត្តិទី៦និងអាណត្តិបន្តបន្ទាប់ ដើម្បីដឹកនាំនាវាកម្ពុជា ឆ្ពោះទៅរកភាពសុខសាន្ត រក្សាបាននូវសុខសន្តិភាព ស្ថេរភាព និងការរីកចម្រើនបន្ថែមទៀត៕
សេង ណារិទ្ធ
