កែប ៖ ផ្លូវលំក្រាលក្រួសក្រហម១ខ្សែ ដែលជាគម្រោងមូលនិធិរបស់សង្កាត់អូរក្រសារ មានប្រវែង១.៨៥០ម៉ែត្រ ស្ថិតក្នុងភូមិអូរក្រសារ សង្កាត់អូរក្រសារ ក្រុងកែប ខេត្តកែប ត្រូវបានបើកការដ្ឋានស្ថាបនា នៅរសៀលថ្ងៃច័ន្ទ៥រោច ខែបឋមាសាឍ ឆ្នាំច សំរឹទ្ធិស័ក ព ស ២៥៦២ ត្រូវនឹងថ្ងៃទី ០២ ខែកក្កដា ឆ្នាំ ២០១៨ ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប និងលោក ទេព យុទ្ធី សមាជិកព្រឹទ្ធសភាភូមិភាគ៥។
ពិធីនេះក៏មានការចូលរួមពីសំណាក់ លោកស្រីទិត សុខា អភិបាលក្រុងកែប ព្រមទាំងអស់លោកជាថ្នាក់ដឹកនាំមន្ទីរអង្គភាពជំនាញទូទាំងខេត្ត អាជ្ញាធរមូលដ្ឋាន និងប្រជាពលរដ្ឋក្នុងតំបន់ខាងលើ។
លោកស្រី ទិត សុខា អភិបាលក្រុងកែបបានឲ្យដឹងថា ផ្លូវលំក្រាលក្រួសក្រហម១ខ្សែនេះមានប្រវែង១.៨៥០ម៉ែត្រ ទទឹង ៤ ម៉ែត្រ បង្កប់ដោយប្រព័ន្ធលូចំនួន ៥កន្លែង និងដាំកូនឈើប្រភេទដើមគគីនៅតាមចញ្ចើមផ្លូវផងដែរ។
មានមតិសំណះសំណាលក្នុងពិធីបើកការដ្ឋានផ្លូវនេះ លោកកែន សត្ថា អភិបាលខេត្តកែប ក៏បានបញ្ជាក់ថា បច្ចុប្បន្នដោយសារប្រទេសយើងមានសុខសន្តិភាពពេញលេញ ទើបយើងមានអី្វៗគ្រប់បែបយ៉ាងរហូតមកដល់សព្វថ្ងៃនេះ ដូចជា សាលារៀន មន្ទីរពេទ្យ វត្តអារាម ស្ពាន ផ្លូវលំ ផ្លូវថ្នល់ ផ្លូវបេតុង រហូតដល់ផ្លូវក្រាលកៅស៊ូយ៉ាងស្រស់ប្រណិត។លោកថា បើយើងក្រលេកមើលដងផ្លូវដ៏ធំទូលាយដែលជាអំណោយរបស់សម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ពីរង្វង់មូលសេះសឆ្ពោះទៅកាន់មាត់ឆ្នេរហែលទឹកនោះគឺជាផ្លូវដោយបានស្ថាបនាយ៉ាងល្អឥតខ្ចោះគឺអ៊ុតកៅស៊ូ”អេសីុ”តាក់តែងដោយសួនផ្កានៅចំកណ្តាល និងបំពាក់ដោយអំពូលភ្លើងសឡា(ឋាមពលព្រះអាទិត្យ) ហើយក៏បានចាត់ទុកជាប្រវតិ្តសាស្ត្រមួយដែលខេត្តកែបរបស់យើងពុំធ្លាប់មានកន្លងមក។លោក អភិបាលខេត្តកែប បានគូសបញ្ជាក់ទៀតថា ចំពោះពិធីបើកការដ្ឋានផ្លូវលំក្រាលក្រួសក្រហម១ខ្សែដែលជាគម្រោងមូលនិធិរបស់សង្កាត់ខាងលើ នឹងបានផ្តល់នូវភាពងាយស្រួល ក្នុងការធ្វើដំណើររបស់បងប្អូនប្រជាពលរដ្ឋនៅក្នុងមូលដ្ឋាន ពិសេសក្មួយៗ ចៅៗជាសិស្សសាលាបានទៅរៀនសូត្រទាន់ពេលវេលា។ដូច្នេះបើបានផ្លូវល្អហើយ សូមលោកតា លោកយាយនិងបងប្អូនប្រជាពលព្រមទាំងក្មួយៗ ត្រូវចេះរួមគ្នាថែរក្សាឲ្យបានស្ថិតស្ថេរគង់វង្ស យូរអង្វែង។ជាមួយនេះ លោក កែន សត្ថា ក៏បានក្រើនរំឭកដល់បងប្អូនប្រជាពលរដ្ឋគ្រប់អាយុបោះឆ្នោត សូមអញ្ជើញទៅចូលរួមបោះឆ្នោតជ្រើសតាំងតំណាងរាស្ត្រនីតិកាលទី៦ ដែលប្រព្រឹត្តទៅនៅថ្ងៃទី២៩ខែកក្កដា ឆ្នាំ២០១៨ខាងមុខឲ្យបានគ្រប់ៗគ្នា ដើម្បីបន្តគ្រាំទ្រឲ្យសម្តេចតេជោ ហ៊ុន សែន ដឹកនាំនាវាកម្ពុជាឲ្យមានភាពរីកចម្រើន មានសុខសន្តិភាព ដូចសព្វថ្ងៃនេះ។
ក្នុងឱកាសនោះ លោកអភិបាលខេត្ត ក៏បានចែកជូននូវវត្ថុអនុស្សាវរីយ៍ ដល់បងប្អូនប្រជាពលរដ្ឋក្នុងមូលដ្ឋានដែលមកចូលរួមកម្មវិធីនេះផងដែរ៕
សេង ណារិទ្ធ
