កែប ៖ ផ្លូវលំក្រាលគ្រួសក្រហម១ខ្សែដែលជាមូលនិធិរបស់សាលាក្រុងកែប ស្ថិតក្នុងភូមិកំពង់ត្រឡាច សង្កាត់ព្រៃធំ ក្រុង-ខេត្តកែប មានប្រវែង ៤៣០ម៉ែត្រ តភ្ជាប់ពីផ្លូវជាតិលេខ33Aឆ្ពោះកាន់កំណាត់ផ្លូវជាតិលេខ៣៣ ត្រូវបានអាជ្ញាធរក្រុងធ្វើពិធីបើកការដ្ឋានស្ថាបនា នៅព្រឹកថ្ងៃទី២៩ខែធ្នូ ឆ្នាំ២០១៧នេះ ក្រោមវត្តមាន លោកស្រី ទិត សុខា អភិបាល នៃគណៈអភិបាលក្រុងកែប។
ពិធីបើកការដ្ឋានផ្លូវលំនេះ ក៏មានការចូលរួមពីសំណាក់អភិបាលរងក្រុង មន្ត្រីក្រោមឱវាទជាច្រើនរូប អាជ្ញាធរមូលដ្ឋាន និងប្រជាពលរដ្ឋស្ថិតក្នុងតំបន់ខាងលើផងដែរ។
លោកស្រី ទិត សុខា អភិបាលក្រុងកែប បានលើកឡើងថា៖ ការបើកការដ្ឋានស្ថាបនាផ្លូវលំ១ខ្សែនេះ គឺតាមការស្នើសុំពីសំណាក់ប្រជាពលរដ្ឋក្នុងតំបន់ ពិសេសពលរដ្ឋដែលមានលំនៅឋានស្ថិតចំណុចមួយឆ្ងាយពីផ្លូវជាតិ ដែលរស់នៅក្នុងភូមិកំពង់ត្រឡាច សង្កាត់ព្រៃធំ។
លោកស្រី អភិបាលក្រុងបានបញ្ជាក់ផងដែរថា៖ កន្លងមកមូលនិធិរបស់សាលាក្រុងក៏បានស្ថាបនាផ្លូវលំ១ខ្សែប្រវែង៥៦០ម៉ែត្រ ស្ថិតក្នុងភូមិអូរក្រសារ បានរួចរាល់ហើយដែរ ប៉ុន្តែមិនទាន់បានសម្ពោធជាផ្លូវការនៅឡើយទេ ដោយយើងនឹងរង់ចាំស្ថាបនាផ្លូវលំ១ខ្សែប្រវែង៤៣០ម៉ែត្រនេះបានរួចរាល់ ទើបសម្ពោធដាក់ឲ្យដំណើរការរួមគ្នាតែម្តង ។
លោកស្រីបានបន្តថា ការធ្វើផ្លូវនេះថ្វីត្បិតមានការយឺតយ៉ាវយ៉ាងណាក្តីក៏សូមអធ្យាស្រ័យ ព្រោះការអភិវឌ្ឍតាមបណ្តាសង្កាត់នានាត្រូវអនុវត្តតាមកញ្ចប់ថវិកា តែបើអាជ្ញាធរថាធ្វើជូនហើយគឺត្រូវតែអនុវត្តឲ្យខានតែបាន ម្យ៉ាងទៀតក្រុមការងារដែលប្រសូត្រចេញពីគណបក្សប្រជាជនកម្ពុជា គឺមិនចេះភូតកុហកឡើយ បើថាធ្វើត្រូវតែធ្វើឲ្យបានមួយរយភាគរយតាមសំណូមពររបស់បងប្អូនប្រជាពលរដ្ឋ។ជាមួយនេះលោកស្រីអភិបាលក្រុង ក៏សូមថ្លែងអំណរគុណដល់ប្រជាពលរដ្ឋក្នុងភូមិសាស្ត្រខាងលើដែលបានជួយសហការ ដើម្បីឲ្យការស្ថាបនាផ្លូវនេះទទួលបានផ្លែផ្កាទាំងអស់គ្នា ។
លោកស្រីលើកឡើងថា មានផ្លូវត្រូវតែមានក្តីសង្ឃឹម ព្រោះបច្ចុប្បន្ននេះ អ្នកណាក៏ចង់បានផ្លូវចូលមកកាន់លំនៅឋានដែរ។បើយើងមានផ្លូវគឺងាយស្រួលគ្រប់បែបយ៉ាង អាចពន្លឿនដល់កូនចៅធ្វើដំណើរទៅសិក្សានៅឯសាលារៀនបានទៀងទាត់ដោយគ្មានការអាក់ខាន ។
ក្នុងខណៈនោះ លោកស្រីអភិបាលក្រុង ក៏បានក្រើនរំលឹកដល់ប្រជាពលរដ្ឋក្នុងតំបន់ខាងលើ បើបានផ្លូវចូលមកផ្ទះហើយសូមជួយថែរក្សានិងចូលរួមសហការក្នុងការជួសជុលកែលម្អទាំងអស់គ្នា ពិសេសការចូលរួមដាំដើមឈើអមសងខាងផ្លូវលំរបស់យើង ដើម្បីជួយលម្អសោភ័ណ្ឌភាពផ្លូវលំឲ្យកាន់តែស្រស់បំព្រង និងបានស្ថិតស្ថេរយូរអង្វែង សម្រាប់កូនចៅគ្រប់ជំនាន់៕
សេង ណារិទ្ធ
