ភ្នំពេញ ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានចាប់ផ្តើមប្រទ្បូកក្នុងការងារថ្មីថ្មោងរបស់ឯកឧត្តម ដោយចុះបំពេញបេសកកម្មពិនិត្យមើលតំបន់សំខាន់ៗដែលមានប្រជាពលរដ្ឋរងគ្រោះដោយទឹកជំនន់ ដើម្បីចែកជូននូវជំនួយសម្រាប់ការស្តារទ្បើងវិញទាក់ទងវិសយ័កសិកម្ម។
ការចុះបេសកកម្មនោះធ្វើទ្បើងបន្ទាប់ពីមានកិច្ចប្រជុំវាយតម្លៃការខូចខាតផលដំណាំរបស់ប្រជាពលរដ្ឋដោយគ្រោះទឹកជំនន់ រួមទាំងការបែងចែកការងារដល់មន្ត្រីពាក់ពន្ធ័ កាលពីម្សិលមិញនៅទីស្តីការក្រសួងកសិកម្ម។
នៅព្រឹកនេះ ឯកឧត្តម រដ្ឋមន្ត្រី ឌិត ទីណា បានអមដំណើរ ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឆ្ពោះទៅជួបបងប្អូនប្រជាកសិកររងគ្រោះដោយជំនន់ទឹកភ្លៀងនៅខេត្តក្រចេះ។
តាមរយៈ Facebook ផ្លូវការរបស់ខ្លួន ឯកឧត្តម ឌិត ទីណា បានសរសេរយ៉ាងដូច្នេះថា «បន្ទាប់ពីប្រជុំវាយតម្លៃ និងចាត់ចែងការងារនៅក្រសួងពេញមួយថ្ងៃម្សិលមិញ ថ្ងៃនេះបេសកកម្មតាមខេត្តរបស់ខ្ញុំចាប់ផ្ដើមជាផ្លូវការ ទៅតាមបណ្តាទីតាំងដែលមានប្រជាពលរដ្ឋរងគ្រោះដោយទឹកជំនន់ ដើម្បីចែកជូននូវជំនួយសម្រាប់ស្តារឡើងវិញនូវការខូចខាត។ ការងារនេះ ចាំបាច់និងបន្ទាន់ណាស់ ដើម្បីធានាថា បងប្អូនប្រជាកសិករយើង លោកបានទទួលពូជស្រូវសម្រាប់ដាំដុះឡើងវិញទាន់ពេលវេលា នៅពេលដែលទឹកចាប់ស្រកទៅវិញ។
នាព្រឹកនេះ ខ្ញុំមានឱកាសអមដំណើរ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រីទទួលបន្ទុកបេសសកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ឆ្ពោះទៅជួបបងប្អូនប្រជាកសិកររងគ្រោះដោយជំនន់ទឹកភ្លៀងនៅខេត្តក្រចេះ»។
សូមជម្រាបថា ឯកឧត្តម ឌិត ទីណា បានចូលកាន់តំណែងរដ្ឋមន្ត្រីថ្មី នៃក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី១៧ ខែតុលា ឆ្នាំ២០២២។
ក្រោយចូលកាន់តំណែងជារដ្ឋមន្ត្រី ឯកឧត្តមបានកំណត់ការងារអទិភាពនៅចំពោះមុខ ដែលឯកឧត្តមត្រូវដោះស្រាយក្នុងជំហានដំបូង គឺដោះស្រាយបញ្ហារបស់ប្រជាកសិករ ដែលកំពុងរងផលប៉ះពាល់ពីគ្រោះទឹកជំនន់ ដើម្បីផ្តល់ពូជស្រូវ និងដំណាំជាបន្ទាន់ដល់កសិករ ដើម្បីស្តារការដាំដុះឡើងវិញ៕
