ខេត្តបន្ទាយមានជ័យ៖នៅព្រឹកថ្ងៃសៅរ៍ ៥រោច ខែអស្សុជ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃ ទី១៥ ខែតុលា ឆ្នាំ២០២២ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានដឹកនាំលោកមេបញ្ជាការរង លោកនាយសេនាធិការង ប្រធាន-អនុប្រធានមន្ទីរ លោកនាយការិយាល័យ លោកមេបញ្ជាការមូលដ្ឋានក្រុង-ស្រុក និងនាយ នាយរងកងរាជអាវុធហត្ថ អញ្ជើញចូលរួមគោរពវិញ្ញាណក្ខន្ធ ដង្ហែសព និងប្រទានភ្លើងបូជាសព លោកវរសេនីយ៍ទោ ជា សុផល មុខងារអនុប្រធានមន្ទីរស្រាវជ្រាវ និងបង្ក្រាបបទល្មើស ដែលបានទទួលមរណៈភាព កាលពីថ្ងៃទី១៣ ខែតុលា ឆ្នាំ២០២២នៅ វេលាម៉ោង២និង១០នាទីយប់ ដោយដួលដាច់សរសៃឈាមខួរក្បាល ក្នុងពេលបំពេញបេសកកម្មប្រចាំតំបន់៣ បឹងទន្លេសាប ខេត្តបន្ទាយមានជ័យ កាលពីថ្ងៃទី១៦ ខែកញ្ញា ឆ្នាំ២០២២ ក្នុងជន្មាយុ៥២ឆ្នាំ សពត្រូវបានតម្កល់ធ្វេីបុណ្យតាមប្រពៃណីព្រះពុទ្ធសាសនានៅគេហដា្ឋននៃសព ស្ថិតក្នុងភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
នាឱកាសនោះដែរ៖លោកឧត្តមសេនីយ៍ត្រីបោន ប៊ិន មេបញ្ជាការ កងរាជអាវុធហត្ថខេត្តបន្ទាយមានជ័យបានប្រគល់បច្ច័យជូនដល់គ្រួសារសពចំនួន២០.២០៥.០០០៛ (ម្ភៃលាន ពីរសែន ប្រាំពាន់រៀល) ដែលបានមកពីការចូលរួមរបស់នាយទាហាន នាយទាហានរង និងពលទាហាន នៃកងរាជអាវុធហត្ថខេត្តបន្ទាយមានជ័យទាំងអស់ សម្រាប់ចូលរួមរំលែកទុក្ខជាមួយក្រុមគ្រួសារសព និងសម្រាប់ចាត់ចែងក្នុងកម្មវិធីបុណ្យសពនេះផងដែរ ៕
