ខេត្ដស្វាយរៀង ៖នៅព្រឹកថ្ងៃសុក្រ ១២ កើត ខែអស្សុជ ឆ្នាំខាលចត្វាស័ក ពុទ្ធសករាជ ២៥៦៦ត្រូវនឹងថ្ងៃទី៧ ខែតុលា ឆ្នាំ២០២២នេះ នៅប៉ុស្ដិ៍នគបាលរដ្ឋបាលសង្កែ បានប្រារព្ធពិធីប្រកាសផ្ទេរភារកិច្ច តែងតាំងមុខដំណែងនាយ នាយរងប៉ុស្តិ៍នគរបាលរដ្ឋបាលសង្កែ ដោយលោកអនុសេនីយ៍ឯក ស្រី សំអុល ជំនួស លោកវរសេនីយ៍ត្រី សៅ ពន្លក ដែលត្រូវបានផ្ទេរភារកិច្ចមកបម្រើការងារនៅអធិការដ្ឋាននគរបាលស្រុក និងលោកអនុសេនីយ៍ទោ ជិន សុធន់ ជានាយរងប៉ុស្ដិ៍ ក្រោមអធិបតីភាព លោកវរសេនីយ៍ឯក មាស ធួក អធិការនគរបាលស្រុក តំណាងដ៏ខ្ពង់ខ្ពស់លោកឧត្តមសេនីយ៍ត្រី ពេជ្រ វីរៈ ស្នងការនគរបាលខេត្តស្វាយរៀង ។
ក្នុងពិធីនេះដែរ មានការអញ្ជើញចូលរួមពី លោក លោកស្រី អធិការរង នគរបាលស្រុក លោកក្រុមប្រឹក្សាឃុំ លោកនាយនគរបាលប៉ុស្តិ៍រដ្ឋបាលទាំង១០ ព្រមទាំងបងប្អូនប្រជាការពារផងដែរ ។
នៅក្នុងឱកាសនោះដែរលោកវរសេនីយ៍ឯក មាស ធួក អធិការនគរបាលស្រុករំដួល បានផ្ដាំផ្ញើរ ដល់លោកនាយប៉ុស្ដិ៍នគរបាលដែលទទួលបានដំណែងថ្មីនេះ នូវចំណុចសំខាន់ៗដូចជា៖
លោកនាយប៉ុស្ដិ៍ដែលទេីបចូលកាន់មុខតំណែងថ្មី ត្រូវមានការគិតគូរ ពីផលប្រយោជន៍ជាតិ និងប្រជាជនជាធំ និងចូលរួមលើកកម្ពស់ការផ្ដល់សេវាសាធារណៈទាំងសេវាតម្រូវការ និងសេវាសំណូមពរ ជូនប្រជាពលរដ្ឋឱ្យបានល្អប្រសើរ និងមានប្រសិទ្ធភាព។
ថែរក្សាពង្រឹងសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ ផ្សព្វផ្សាយច្បាប់ចរាចរណ៍ ការបង្ការទប់ស្កាត់ និងបង្ក្រាបបទល្មើសនានា ដូចជាការជួញដូរ ការប្រើប្រាស់គ្រឿងញៀន ក្មេងទំនើង និងការលេងល្បែងស៊ីសងខុសច្បាប់គ្រប់ប្រភេទ ដែលកើតមានឡើងក្នុងដែនសមត្ថកិច្ចរបស់ខ្លួន ឱ្យបានតឹងរឹង និងម៉ឺងម៉ាត់ ៕
