ក្រុងប៉ោយប៉ែត៖ នៅថ្ងៃសៅរ៍ ៦កើត ខែអស្សុជ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១ ខែតុលា ឆ្នាំ២០២២ នេះ លោក គាត ហ៊ុល អភិបាលក្រុងប៉ោយប៉ែត នឹង លោក វ៉ា ជឹមណារ៉េត ចៅសង្កាត់អូរជ្រៅ រួមជាមួយក្រុមការងារបាននាំយកសម្ភារៈស្បៀងអាហារជាអំណោយរបស់ ឯកឧត្តម នាយឧត្តមសេនីយ៍ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តបន្ទាយមានជ័យ និងលោកជំទាវ ផ្តល់ជូនបងប្អូនប្រជាពលរដ្ឋចំនួន ៧៧ គ្រួសារ ដែលបានជម្លៀសមកកាន់ទីទួលសុវត្ថិភាព បន្ទាប់ពីទឹកអូរព្រំដែន កើនជន់លិចលំនៅដ្ឋានរបស់ពួកគាត់ និងចុះផ្តល់ដល់ទីតាំងខ្នងផ្ទះចំនួនជាង៦០គ្រួសារ ក្នុងភូមិប៉ោយប៉ែត និង ភូមិក្បាលកោះ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
ក្នុងឱកាសនោះដែល លោក គាត ហ៊ុល អភិបាលក្រុងប៉ោយប៉ែត ក៏សូមអំពាវនាវដល់បងប្អូនប្រជាពលរដ្ឋដែលមានលំនៅដ្ឋានតាមបណ្តោយមាត់អូរព្រំដែន សូមថែរក្សាសុខភាពអោយបានខ្ជាប់ខ្ជួន ត្រូវយកចិត្តទុកដាក់ និងប្រុងប្រយ័ត្នខ្ពស់ លើសុវត្ថិភាព ជាពិសេសចំពោះកុមារតូចៗ និងសត្វអសិរពិស ដែលអាចបង្ករគ្រោះថ្នាក់ជាយថាហេតុ។ លោកអភិបាលគ្រាន់រំលឹក ដល់បងប្អូនប្រជាពលរដ្ឋ បើមានក្នុងករណីអាសន្នណាមួយ ត្រូវទំនាក់ទំនងមកអាជ្ញាពាក់ព័ន្ធជាបន្ទាន់ ដើម្បីអាជ្ញាធរ មានភាពងាយស្រួលចុះជួយអន្តរាគមន៍បានទាន់ពេលវេលា៕
