ខេត្ដស្វាយរៀង៖ នារសៀលថ្ងៃសុក្រ ៥កើត ខែអស្សុជ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី៣០ ខែកញ្ញា ឆ្នាំ២០២២
ឯកឧត្តម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង និងជាអនុប្រធានក្រុមការងារបង្រ្កាបល្បែងស៊ីសងខុសច្បាប់គ្រប់ប្រភេទ ក្នុងភូមិសាស្រ្តខេត្តស្វាយរៀង តំណាងឯកឧត្តម ម៉ែន វិបុល អភិបាលខេត្ត និងជាប្រធានក្រុមការងារបង្រ្កាបល្បែងស៊ីសងខុសច្បាប់គ្រប់ប្រភេទ ក្នុងភូមិសាស្រ្តខេត្តស្វាយរៀង បានអញ្ជើញជាគណអធិបតីក្នុងកិច្ចប្រជុំ ស្តីពីការបង្រ្កាបល្បែងស៊ីសងខុសច្បាប់គ្រប់ប្រភេទ ក្នុងភូមិសាស្រ្តខេត្តស្វាយរៀង នៅក្នុងបរិវេណ នៃសាលប្រជុំ សាលាស្រុកស្វាយជ្រំ ខេត្តស្វាយរៀង ។
មានប្រសាសន៍ក្នុងឱកាសនោះ ឯកឧត្តម តូច ប៉ូលីវ៉ា បានផ្តោតសំខាន់ចំពោះបទល្មើសល្បែងស៊ីសងតាមអនឡាញដែលជាប្រភេទល្បែងមានចរិតគ្រោះថ្នាក់បំផុតដែលនាំឲ្យមាននូវអំពើជួញដូរមនុស្ស ជួញដូរពលកម្ម បង្ខាំងមនុស្សខុសច្បាប់ ជួញដូរគ្រឿងញៀនជាដើម ។
បន្ថែមលើសពីនេះ ឯកឧត្តម ក៍បានណែនាំដល់ ប្រធានគណៈបញ្ជាការឯកភាពនៃរដ្ឋបាលស្រុក និងមន្រ្តីពាក់ព័ន្ធត្រូវសហការគ្នា បន្តធ្វើសកម្មភាពដូចភ្លៀងរលឹម ចុះធ្វើការអប់រំ វិធានការរដ្ឋបាល និងធ្វើកិច្ចសន្យាបិទទីតាំងល្បែងស៊ីសងគ្រប់ប្រភេទជាដាច់ខាត និងស៊ីបអង្កេតតាមដាន រកមុខសញ្ញា ដែលឈរនៅពីក្រោយ ចំពោះការបើកនូវទីតាំង ល្បែងស៊ីសងខុសច្បាប់ ជាពិសេសពិនិត្យមើល នូវប្រភេទល្បែងដូចជា ល្បែងបុកប៊ីយ៉ែរ ល្បែងឡូតូ ល្បែងជល់មាន់ បៀរ អាប៉ោង ចាក់កន្ទុយលេខ និងល្បែងអនឡាញផ្សេងៗទៀត ឬប្រភេទកីឡាបាល់ទាត់ បាល់ទះ ដែលមានការភ្នាល់គ្នាជាលុយ ត្រូវតែធ្វើការទប់ស្កាត់ និងបង្រ្កាប ដោយអនុវត្ត និងផ្តន្ទាទោសទៅតាមវិធានការច្បាប់ដែលបានកំណត់ ជាធរមាន ។
ជាមួយគ្នានោះដែរ ឯកឧត្តម ក៏បានសំណូមពរដល់បងប្អូនប្រជាពលរដ្ឋកុំប្រព្រឹត្តនូវល្បែងស៊ីសងគ្រប់ប្រភេទ ព្រោះវាធ្វើឱ្យអន្តរាយដល់ខ្លួន ក្រុមគ្រួសារ និង នាំឱ្យខាតបង់នូវពេលវេលា និងថវិកា ព្រមទាំងជាអំពើខុសច្បាប់ផងដែរ ។
ស្របពេលនេះដែល ឯកឧត្តម ក៏បានអំពាវនាវដល់ម្ចាស់ទីតាំងដែលបើកល្បែងស៊ីសងនានា ត្រូវតែបញ្ឍប់ និងមិនអនុញ្ញាតិឱ្យដំណើរការនូវសកម្មភាព លែងល្បែងស៊ីសងខុសច្បាប់នេះទៀតឡើយ បើមិនដូច្នេះទេ និងអនុវត្តទៅតាមវិធានការច្បាប់ ។
កិច្ចប្រជុំនេះដែរ មានការអញ្ជើញចូលរួមពី លោក ហែម សារិទ្ធ អភិបាល នៃគណៈអភិបាលស្រុក និងជាប្រធានគណៈបញ្ជាការឯកភាពនៃរដ្ឋបាលស្រុក លោក លោកស្រី អភិបាលរងស្រុក លោកអធិការនគរបាលស្រុក លោកមេបញ្ជាការផ្នែកសឹករងស្រុក លោកមេបញ្ជាការកងរាជអាវុធហត្ថស្រុក លោក លោកស្រី មេឃុំ ទាំង១៦ឃុំ លោក លោកស្រីនាយប៉ុសិ៍នគរបាលរដ្ឋបាលឃុំទាំង ១៦ ព្រមទាំង លោក លោកស្រី អ្នកពាក់ព័ន្ធមួយចំនួនទៀត ៕
