ខេត្តបន្ទាយមានជ័យ៖ នៅរសៀលថ្ងៃពុធ ៣ កើត ខែអស្សុជ ឆ្នាំខាលចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២៨ ខែកញ្ញា ឆ្នាំ២០២២ លោក គាត ហ៊ុល អភិបាល នៃគណៈអភិបាលក្រុងប៉ោយប៉ែត បានដឹកនាំក្រុមការងារនឹងកម្លាំងចម្រុះ ថ្នាក់ក្រុងប៉ោយប៉ែត ចុះត្រួតពិនិត្យស្ថានភាពទឹកតាមបណ្តោយអូរព្រំដែនក្នុងភូមិសាស្ត្រក្រុងប៉ោយប៉ែត ដែលកំពុងមានសន្ទុះកើនឡើងដោយសារភ្លៀងធ្លាក់ជាបន្តបន្ទាប់គួរឲ្យកត់សម្គាល់ ។
រដ្ឋបាលក្រុងបាន និងកំពុងត្រៀមលក្ខណៈអន្តរាគមន៍បង្ការ និងជម្លៀសពលរដ្ឋមកកាន់ទីទួលសុវត្ថិភាពក្នុងករណីទឹកអូរនៅតែបន្តកើនឡើងក្នុងកំរិតប្រកាសអាសន្នជន់លិចលំនៅដ្ឋានរបស់ប្រជាពលរដ្ឋ។
ក្នុងនាមរដ្ឋបាលក្រុង លោក គាត ហ៊ុល អភិបាលក្រុងប៉ោយប៉ែត បានអំពាវនាវដល់បងប្អូនប្រជាពលរដ្ឋដែលមានលំនៅដ្ឋានតាមបណ្តោយមាត់អូរព្រំដែនសូមមានការយកចិត្តទុកដាក់ និងប្រុងប្រយ័ត្នខ្ពស់លើសុវត្ថិភាព ជាពិសេសចំពោះកុមារតូចៗ និងសត្វអសិរពិសដែលអាចបង្ករគ្រោះថ្នាក់ជាយថាហេតុ ។ ក្នុងករណីមានអាសន្នត្រូវទំនាក់ទំនងមកអាជ្ញាធរពាក់ព័ន្ធជាបន្ទាន់ ៕
(ដោយ៖លោកចាន់ពុធ)
