កែប ៖ នៅព្រឹកថ្ងៃទី១៧ខែសីហា ឆ្នាំ២០១៧នេះ លោកកែន សត្ថា អភិបាលខេត្តកែប រួមជាមួយនឹងសការី បានដឹកនាំគណៈប្រតិភូជាន់ខ្ពស់គណៈកម្មាធិការមជ្ឈិមរណសិរ្សមាតុភូមិវៀតណាម ដើម្បីបំពេញទស្សនកិច្ចជាផ្លូវការ នៅតាមភូមិសាស្ត្រជាច្រើន នៃរដ្ឋបាលខេត្តកែប ។ ជាមួយនឹងដំណើរទស្សនកិច្ច ប្រតិភូវៀតណាម ក៏បានចូលរួមទស្សនានិងអុជធូបបួងសួងនៅក្នុងព្រះវិហារ មជ្ឈមណ្ឌលវិបស្សនាធុរៈ ដែលសង់នៅលើភ្នំនៃទឹកដីខេត្តកែប ដើម្បីសុំសេចក្តីសុខ ចម្រើន និងបន្តដំណើរទស្សនកិច្ចនៅតាមភូមិសាស្ត្រជាច្រើនក្នុងក្រុងកែបទាំងមូល។
ក្រៅពីជំនួបពិភាក្សាការងារជាមួយរដ្ឋបាលខេត្ត គណៈប្រភូជាន់ខ្ពស់វៀតណាមក៏បានជួបសំណេះសំណាលនិងផ្តល់វត្ថុអនុស្សាវរីយ៍មួយចំនួន ដល់ប្រជាពលរដ្ឋក្រីក្រចំនួន១៥គ្រួសារ ក្នុងភូមិសាស្ត្រខេត្តកែប ដោយមួយគ្រួសារទទួលបានឃីតមួយកញ្ចប់(មានភួយ មុង សម្ភារៈប្រើប្រាស់មួយចំនួន)និងថវិកា ៣.០០០.០០០ដុង(លុយវៀតណាម)ប្រមាណជិត១៥០ដុល្លាអាមេរិក។នេះជាទឹកចិត្តដ៏ប្រពៃ ដែលបានបញ្ជាក់ពីទំនាក់ទំនងយ៉ាងជិតស្និទ្ធ នៃចំណងសាមគ្គីភាព និងកិច្ចសហប្រតិបតិ្តការ រវាងប្រទេសយើងទាំងពីរ កម្ពុជា-វៀតណាម ស្ថិតស្ថេរចីរកាល។
ក្នុងនាមជារដ្ឋបាលខេត្តកែបទាំងមូល លោកកែន សត្ថា ក៏បានសំដែងនូវការរាប់អាន រាក់ទាក់ ក្នុងស្មារតីសាមគ្គីភាព និងកិច្ចសហប្រតិបតិ្តការរវាងគ្នានិងគ្នា ជាមិត្តភាពដ៏យូរអង្វែង។ក្នុងខណៈនេះដែរ លោកអភិបាលខេត្ត ក៏សូមថ្លែងអំណរគុណយ៉ាងជ្រៀលជ្រៅ ដល់គណៈប្រតិភូជាន់ខ្ពស់គណៈកម្មាធិការមជ្ឈិមរណសិរ្សមាតុភូមិវៀតណាមដែលបានមកបំពេញទស្សនកិច្ចការងារក្នុងខេត្តកែប ថែមទាំងបានភ្ជាប់មកជាមួយនូវសម្ភារៈ និងថវិកាមួយចំនួនមកចែកជូនប្រជាពលរដ្ឋនៅភូមិសាស្ត្រខេត្តកែប នាពេលនេះផងដែរ ៕
ណារិទ្ធ
