កំពត ៖ សន្និសីទអន្តរជាតិ កម្ពុជា-វៀតណាម ស្តីពីការកសាងខ្សែបន្ទាត់ព្រំដែនសន្តិភាព មិត្តភាព និងសហប្រតិបតិ្តការ ដើម្បីអភិវឌ្ឍន៍ លើកទី៥ ឆ្នាំ២០១៧ ត្រូវបានធ្វើឡើងនៅព្រឹកថ្ងៃទី១៦ខែសីហា ឆ្នាំ២០១៧ ស្ថិតក្នុងសណ្ឋាគារមិត្តភាព ខេត្តកំពត ក្រោមអធិបតីភាព ដ៏ខ្ពង់ខ្ពស់ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លោក ជិន ថាញ់មិន សមាជិកគណៈកម្មាធិការមជ្ឈឹមបក្សកុំម្មុយនីស្តវៀតណាម និង លោកចាន់ ចេស្តា អភិបាលនៃគណៈអភិបាលខេត្តកំពត ព្រមទាំងប្ត្រិភូជាន់ខ្ពស់ នៃប្រទេសទាំងពីរ រួមនឹងអាជ្ញាធរពាក់ព័ន្ធ នៃខេត្តជាប់ព្រំប្រទល់ផងដែរ។
តាមរបាយការណ៍របស់ លោកចាន់ ចេស្តា អភិបាលខេត្ត បញ្ជាក់ថា ដោយអនុវត្តតាមខ្លឹមសារ នៃសេចក្តីប្រកាសរួមរវាងរណៈសិរ្សសាមគ្គីសាមគ្គី អភវឌ្ឍន៍មាតុភូមិកម្ពុជា និងរណៈសិរ្សមាតុភូមិវៀតណាម ដែលបានចុះហត្ថលេខានាឱកាសសន្និសីទអន្តរជាតិលើកទី៤ ក្រោមប្រធានបទស្តីពី ការកសាងខ្សែបន្ទាត់ព្រំដែនសន្តិភាព មិត្តភាព និងសហប្រតិបតិ្តការរវាងរណៈសិរ្សប្រទេសទាំងពីរ កម្ពុជា-វៀតណាម កាលពីថ្ងៃទី២៣ ខែធ្នូ ឆ្នាំ២០១៤ នៅខេត្តគៀងយ៉ាង នៃសាធារណរដ្ឋសង្គមនិយមវៀតណាម រួចមក រណៈសិរ្សនៃប្រទេសទាំងពីរ បានអនុវត្តនូវសកម្មភាពការងាររបស់ខ្លួន ដោយទទួលបានលទ្ធផលជាវិជ្ជមាន ដ៏ច្រើនលើសលប់ ។
លោកក៏បានសង្កត់ធ្ងន់ថា ដើម្បីពង្រឹងនិងពង្រីកនូវសមិទ្ធផលដែលសម្រេចបាននាពេលកន្លងមក និងដើម្បីដោះស្រាយបញ្ហាដែលនៅសេសសល់ រណៈសិរ្សប្រទេសប្រទេសយើងទាំងពីរចាំបាច់ត្រូវពិភាក្សាគ្នាដោយត្រង់ៗនិងស៊ីជម្រៅ ក្នុងស្មារតីមិត្តភាព និងរៀបចំនូវខ្លឹមសារសហប្រតិបតិ្តការជាក់ស្តែង ពិតប្រាកដនិងដែលអាចអនុវត្តបាន ដើម្បីឯកភាពគ្នាដាក់ខ្លឹមសារទាំងនោះទៅក្នុងសេចក្តីថ្លែងការរួមនៃសន្និសីទអន្តរជាតិស្តីពីការកសាងខ្សែបន្ទាត់ព្រំដែនកម្ពុជា-វៀតណាម។
ជាមួយនឹងកិច្ចសហការដ៏ស្អិតរមួតនេះ លោកជំទាវ ឧបនាយករដ្ឋមន្ត្រី ម៉ែន សំអន បានគូសបញ្ជាក់ថា សន្និសីទនេះ ត្រូវបានរៀបចំឡើងក្នុងគោលបំណងពិនិត្យ និងបូកសរុបលទ្ធផលការងាររបស់រណៈសិរ្សទាំងពីរ កម្ពុជា-វៀតណាម ជាពិសេសរវាងគណៈកម្មការរណៈសិរ្សខេត្តជាប់ព្រំដែន ទាំង១០ខេត្តរបស់កម្ពុជា និង១០ខេត្តរបស់វៀតណាមក្នុងរយៈពេល៣ឆ្នាំកន្លងមក និងដើម្បីអបអរសាទរខួបលើកទី៥០ថ្ងៃបង្កើតទំនាក់ទំនងការទូត កម្ពុជា-វៀតណាម និងឆ្នាំមិត្តភាព កម្ពុជា-វៀតណាមផងដែរ។
ជាមួយនេះ លោកជំទាវក៏សូមអបអរសាទរ និងសម្តែងការស្វាគមន៍យ៉ាងកក់ក្តៅបំផុត នូវវត្តមានដ៏ឧត្តុង្គឧត្តមរបស់គណៈប្រតិភូជាន់ខ្ពស់គណៈកម្មាធិការមជ្ឈឹមរណៈសិរ្សមាតុភូមិវៀតណាម ដែលដឹកនាំដោយ លោក ជិន ថាញ់មិន សមាជិកគណៈកម្មាធិការមជ្ឈឹមបក្សកុំម្មុយនីស្តវៀតណាម និងជាប្រធានគណៈកម្មាធិការមជ្ឈឹមរណៈសិរ្សមាតុភូមិវៀតណាម ដែលខិតខំពង្រឹងកិច្ចសហការបានល្អ ពិសេសការរឹតចំណងសាមគ្គីភាព មិត្តភាព សហប្រតិបតិ្តការ និងប្រាស្រ័យទាក់ទងគ្នាលើគ្រប់វិស័យ ដូចជារក្សាការពារសន្តិសុខ សណ្តាប់ធ្នាប់នៅតាមខ្សែបន្ទាត់ព្រំដែនបានល្អប្រសើរ។
ទន្ទឹមនឹងនេះ ក៏សូមសំណូមពរដល់សមាជិក សមាជិកានៃអង្គសន្និសីទ សូមយកខ្លឹមសារនៃសេចក្តីប្រកាសរួម ទៅផ្សព្វផ្សាយឲ្យបានទូលំទូលាយដល់ប្រជាជនគ្រប់ស្រទាប់វណ្ណៈ នៃប្រទេសទាំងពីរ ដោយពង្រឹងនិងពង្រីកនូវប្រពៃណីសាមគ្គីភាព មិត្តភាព និងសហប្រតិបតិ្តការល្អ ព្រមទាំងជម្រុញលើកទឹកចិត្តនិងបង្កលក្ខណៈងាយស្រួលដល់ប្រជាជន ឲ្យចូលរួមក្នុងគ្រប់សកម្មភាពសង្គម សកម្មភាពពាណិជ្ជកម្ម សេដ្ឋកិច្ច វប្បធម៌ វិទ្យាសាស្ត្រ អប់រំ វេជ្ជសាស្ត្រ បរិស្ថាន ជាដើម។ល ៕
ណារិទ្ធ
