កែប ៖ ទូATMនៃធនាគាABA ស្ថិតក្នុងភូមិថ្មី សង្កាត់ព្រៃធំ ក្រុង-ខេត្តកែប ត្រូវរងការខូចខាតទាំងស្រុង ដោយសារត្រូវអណ្តាតភ្លើងឆាបឆេះ និងផ្ទុះលាន់ដ៏កក្រើក កាលពីវេលាទៀបភ្លឺ ថ្ងៃទី១៥ខែសីហា ឆ្នាំ២០១៧នេះ។
តាមប្រភពដ៏ជឿរជាក់ និយាយថា ទូATMខាងលើត្រូវបានផ្ទុះឡើងយ៉ាងកក្រើកនៅវេលាម៉ោង៤ទៀបភ្លឺក្នុងថ្ងៃទី១៥ ហើយក៏បានឆាបឆេះដ៏សន្ធោសន្ធៅបណ្តាលឲ្យរងការខូចខាតទាំងស្រុងតែម្តង។
ប្រភពបញ្ជាក់ថា ទូATMនេះជារបស់ធនាគាABAនៃប្រទេសកាណាដា ដោយបានយកមកដាក់តាមទីសាធារណៈ ស្ថិតតាមបណ្តោយផ្លូវជាតិលេខ33A ក្នុងភូមិថ្មី សង្កាត់ព្រៃធំ ក្រុងកែប ប៉ុន្តែខណៈនេះត្រូវក្លាយជាចំណីអគ្គីភ័យលេបត្របាក់ទាំងស្រុង ហើយក្រដាស់ប្រាក់ដុល្លានៅក្នុងទូទាំងប៉ុន្មានក៏ត្រូវឆេះម៉ដ្ឋផងដែរ។
ទាក់ទិននឹងករណីផ្ទុះឆេះទូATM-ABAនេះ សមត្ថកិច្ចបានសង្ស័យថា គឺជាការប៉ងលួចមិនបានសម្រេច ដោយជនមិនស្គាល់មុខ បានយកបំពង់ផ្សារដែក(អុកសីុសែន)ដែលមានដបខ្យល់ និងបំពង់ថ្មស្អុយ មកផ្សាគោលបំណងកាត់ផ្តាច់ទូដាក់លុយក្នុងATMដោយខុសបច្ចេកទេស បណ្តាលឲ្យឆ្លងឆេះទើបពួកគេរត់គេចខ្លួនមុនពេលទូATMនេះផ្ទុះឡើង។
សមត្ថកិច្ចបានឲ្យដឹងទៀតថា ជនខិលខូចអាចធ្វើសកម្មភាពក្នុងចន្លោះម៉ោង៣ទៀបភ្លឺថ្ងៃទី១៥ខែសីហា ឆ្នាំ២០១៧ ប៉ុន្តែពេលធ្វើសកម្មភាព ប្រហែលជាមិនបានបិទខ្យល់ជិតល្អ ទើបពេលយកដែកកេះដុតក្បាលផ្សារក៏ឆាបឆេះឆ្លងក្នុងទូATMហើយពួកគេរត់ចោលដបខ្យល់និងបំពង់ថ្មស្អុយ ទើបបណ្តាលឲ្យឆេះរួចផ្ទុះលាន់ឮដូចគ្រាប់បែកB52 បង្កការភ្ញាក់ផ្អើលតែម្តង។
សមត្ថកិច្ចថា ក្រុមអ្នកលួចលុយក្នុងទូATMនេះពិតជាបានរៀបចំគម្រោងទុកជាស្រេច ដោយពួកគេបានយកថ្នាំពណ៌ខ្មៅបាញ់ទៅលើកាមេរ៉ាសុវត្ថិភាព ដែលបង្កប់នៅទីនោះទៀតផង។
ចំពោះសកម្មភាពលួចលុយក្នុងទូATMបណ្តាលឲ្យផ្ទុះ ឆេះខូចខាតអស់ប្រាក់រាប់ម៉ឺនដុល្លាស្ថិតតំបន់ខេត្តកែបនេះ សមត្ថកិច្ចនគរបាល ក៏ដូចជាកំលាំងកងរាជអាវុធហត្ថខេត្ត បាននិងកំពុងស្រាវជ្រាវ តាមប្រមាញ់រុករក ក្រុមជនខិលខូចដើម្បីយកទៅផ្តន្ទាទោសតាមផ្លូវច្បាប់។/ ណារិទ្ធ
