ស្វាយរៀង ៖ បន្ទាប់ពីបានឃាត់ខ្លួនបុរសអ្នករត់តាក់ស៊ី ឈ្មោះសម្បតិ្ត តាក់ស៊ី ដែលសង្ស័យជាឃាតកររំលោភសម្លាប់នារីជាបុគ្គលិកកាស៊ីណូ ហ្គូដ ឡាក់ នៅក្រុងបាវិតនោះ ក្រោយពីសាកសួរទើបដឹងការពិត គឺជាការស្មានខុស ព្រោះឃាតករដែលរំលោភ សម្លាប់ក្មេងស្រីរងគ្រោះគឺជាអ្នកផ្សេងទៅវិញ ហើយក៏ជាអ្នករត់តាក់ស៊ីផងដែរ ដោយថ្ងៃនោះ ឈ្មោះសម្បតិ្ត តាក់ស៊ី បានផ្ទេរនារីរងគ្រោះទៅជិះរថយន្តផ្សេងទៀត ដែលម្ចាស់រថយន្តនេះជាឃាតករតែម្តង។
ជុំវិញករណីខាងលើនេះ បើតាមសមត្ថកិច្ចនៃស្នងការដ្ឋាននគរបាល ខេត្តស្វាយរៀងបញ្ជាក់ថា ឃាតករដែលរំលោភ សម្លាប់នារីជាបុគ្គលិកកាស៊ីណូ នៅក្រុងបាវិតនោះ គឺត្រូវបានវែកមុខហើយ បន្ទាប់ពីបានសួរនាំពីសំណាក់អ្នករត់តាក់ស៊ីដែលឃាត់ខ្លួនកាលពីរសៀលថ្ងៃទី៥ខែសីហា ឆ្នាំ២០១៧ ហើយឈ្មោះ សម្បតិ្ត តាក់ស៊ី ដែលបាននាំខ្លួនមកសាកសួរនោះដាច់ខាតមិនមែនជាប់ពាក់ព័ន្ធទេ ។
សមត្ថកិច្ចបានឲ្យដឹងផងដែរថា ពេលនេះយើងស្រាវជ្រាវឈានទៅឃាត់ខ្លួនឃាតករពិតប្រាកដបានហើយ កាលពីវេលាម៉ោង១៣រសៀល ថ្ងៃទី០៧ខែសីហា ឆ្នាំ២០១៧ម្សិលមិញ ត្រង់ចំណុចភូមិរូបគោ សង្កាត់ព្រៃធ្នាក់ ក្រុងស្វាយរៀង ជនសង្ស័យមានឈ្មោះ ឆើយ សុជាតិ ភេទប្រុស អាយុ៣៥ឆ្នាំ អ្នករត់តាក់ស៊ី រស់នៅភូមិព្រៃញ៉យ ឃុំខ្សែត្រ ស្រុកកំពង់រោទ៍ ខេត្តស្វាយរៀង ហើយនៅពេលឃាត់ខ្លួន សមត្ថកិច្ចបានឆែកឆេររកឃើញខ្សែក១ខ្សែ ចិញ្ចៀនមួយវង់។
សមត្ថកិច្ចបន្តថា បន្ទាប់ពីនាំខ្លួនមកសាកសួរជនសង្ស័យបានសារភាពថា គេពិតជាបានធ្វើសកម្មភាពចាប់រំលោភ រួចរឹតកសម្លាប់នារីវ័យ១៨ឆ្នាំ ឈ្មោះ សុវណ្ណ សុខម៉ាលីន ជាបុគ្គលិកកាស៊ីណូ ហ្គូដ ឡាក់ ក្នុងក្រុងបាវិត ប្រាកដកមែន ប៉ុន្តែគេពុំប្រព្រឹត្តតែម្នាក់ឯងទេ គឺមានម្នាក់ទៀតចូលរួមដែរ។
ក្រោយពីទទួលបានចម្លើយសារភាព សមត្ថកិច្ចក៏បន្តស្រាវជ្រាវរហូត ឃាត់ខ្លួនជនសង្ស័យម្នាក់ទៀត ឈ្មោះ ផ្លេក មុន្នី នៅរាជធានីភ្នំពេញ នៅវេលាម៉ោង៣និង២៥នាទី រសៀលថ្ងៃទី០៨ខែសីហា ឆ្នាំ២០១៧ ដោយអំឡុងពេលនេះ សមត្ថកិច្ចរង់ចាំទៅទទួលជនសង្ស័យខាងលើ ដើម្បីយកមកសួរនាំបន្តទៀត ៕
