កែប ៖ ការថែរក្សាធនធានជលផល ពិតជាបានចូលរួមអភិវឌ្ឍសេដ្ឋកិច្ចគ្រួសារ និងបានជួយកាត់បន្ថយភាពក្រីក្ររបស់ប្រជាពលរដ្ឋ។ដោយផ្សារភ្ជាប់នឹងប្រធានបទខាងលើនេះ ស្ថាប័នជំនាញបានខិតខំជម្រុញវិស័យកសិកម្មនៅតាមមូលដ្ឋានកាន់តែផុលផុស ដូចជាការដាំដំណាំរួមផ្សំផ្សេងៗ ឬចិញ្ចឹមសត្វគ្រប់ប្រភេទ និងការចិញ្ចឹមត្រីជាដើម។
ទាក់ទិននឹងវិស័យខាងលើនេះ នៅព្រឹកថ្ងៃទី០៨ខែសីហា ឆ្នាំ២០១៧ មន្ទីរកសិកម្ម រុក្ខាប្រមាញ់និងនេសាទខេត្តកែប បានធ្វើ (ទិវា១កក្កដា)ព្រលែងកូនត្រី ស្ថិតនៅអាងទំនប់អូរក្រសារ នៃក្រុងកែប ខេត្តកែប ក្រោមការចូលរួម ពីសំណាក់លោក កែន សត្ថា អភិបាលខេត្តកែប លោកសំ សារីន ប្រធានក្រុមប្រឹក្សាខេត្ត លោកថឹង បូរិន ប្រធានមន្ទីរកសិកម្មខេត្ត និងលោកគុជ វីរៈ នាយខណ្ឌរដ្ឋបាលជលផលកែប ព្រមទាំងថ្នាក់ដឹកនាំមន្ទីរ អង្គភាពជំនាញនានា និងអាជ្ញាធរក្នុងតំបន់ផងដែរ។
លោក ថឹង បូរិន ប្រធានមន្ទីរកសិកម្មខេត្តកែប បានឲ្យដឹងថា នៅព្រឹកនេះខាងមន្ទីរក៏បាននាំយកកូនត្រីជាច្រើនប្រភេទ ចំនួន៣០.០០០ក្បាលមកព្រលែងនៅទំនប់អូរក្រសារនេះ ។ លោកបន្តថា វារីវប្បកម្មបានដើរតួរនាទីកាន់តែសំខាន់ក្នុងការបំពេញបន្ថែមតម្រូវការប្រើប្រាស់ធនធានជលផលដែលមានការកើនឡើងពីមួយឆ្នាំទៅមួយឆ្នាំ ស្របពេលដែលការទាញយកផលពីធម្មជាតិហាក់មានទំនោថយចុះ ដោយសារការកើនឡើងចំនួនប្រជាជន និងការប្រែប្រួលអាកាសធាតុ ។ កន្លងមក រដ្ឋបាលជលផលបានស្វែងរកដៃគូរអភិវឌ្ឍន៍ និងបណ្តាប្រទេសជាមិត្តនានា ដើម្បីគាំទ្រដល់ការអភិវឌ្ឍន៍វិស័យវារីវប្បកម្ម ជាពិសេសការរៀបចំបង្កើតស្ថានីយ៍ស្រាវជ្រាវ លើវិស័យនេះនៅកម្ពុជា។ទន្ទឹមនឹងនេះ មន្ទីរកសិកម្ម រុក្ខាប្រមាញ់និងនេសាទខេត្ត បានណែនាំបច្ចេកទេសចិញ្ចឹមត្រីដល់កសិករជាលក្ខណៈគ្រូសារនៅតាមមូលដ្ឋាននៃខេត្តទាំងមូលផងដែរ។
ដោយផ្សាភ្ជាប់នឹងប្រធានបទដ៏សំខាន់នេះ លោក កែន សត្ថា អភិបាលខេត្តបានបញ្ជាក់ថា ទោះជាយ៉ាងណា ត្រីគឺជាម្ហូបអាហារប្រចាំថ្ងៃ ដ៏មានសារៈសំខាន់ក្នុងការផ្គត់ផ្គង់សារធាតុខនិច និងប្រូតេអីុន(៨១%)នៃប្រូតេអ៊ីនសរុប ដែលប្រជាជនកម្ពុជាទម្លាប់បរិភោគត្រីច្រើនដោយក្នុងមួយឆ្នាំៗជាមធ្យម៦៣គក្រ/មនុស្សម្នាក់ ហើយចំណុចថវិកាទទួលបានពីវិស័យនេះត្តូវគេប៉ាន់ប្រមាណថានឹងបានទទួលដ៏ច្រើនសន្ធឹកសន្ធាប់ទៀតផង ។
យ៉ាងណាមិញ ធនធានជលផលត្រូវបានធ្វើអាជីវកម្មកាន់តែធ្ងន់ធ្ងរទៅៗ ពីមួយឆ្នាំទៅមួយឆ្នាំ បង្កជាក្តីកង្វល់អំពីនិរន្តរភាពរបស់វា លើផ្នែកសេដ្ឋកិច្ច សង្គម និងប្រព័ន្ធអេកូឡូស៊ី ដែលយើងមិនអាចមើលរំលងបានឡើយ ។
ដោយមើលឃើញពីអត្ថប្រយោជន៍ដ៏ធំធេង នៃធនធានជលផលរាជរដ្ឋាភិបាលកម្ពុជា ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានខិតខំប្រឹងប្រែងដោះស្រាយបញ្ហាជាបន្ទាន់នូវសេចក្តីត្រូវការផ្នែកសេដ្ឋកិច្ច និងសង្គម ដោយបានដាក់ចេញនូវគោលនយោបាយកែទម្រង់លើការគ្រប់គ្រងវិស័យជលផលឲ្យកាន់តែមាននិរន្តរភាពខ្ពស់ និងការ ការពារថែរក្សាទុកជាធនធានធម្មជាតិដ៏មានតម្លៃ សម្រាប់មនុស្សជំនាន់ក្រោយផងដែរ ៕
ណារិទ្ធ
