ខេត្តបន្ទាយមានជ័យ ៖ នៅរសៀលថ្ងៃទី៧ ខែសីហា ឆ្នាំ២០១៧ មន្ត្រីកាំកុងត្រូលក្រុងប៉ោយប៉ែត បានដុតកំទេចចោលនូវសាច់មាន់ដែលខូចគុណភាពមានដូចជា៖ជើងមាន់ ឆ្អឹងមាន់ ជង្គង់មាន់ រួមទាំងសាច់មាន់សរុបចំនួន៦២០គីឡូក្រាម។បន្ទាប់ពីបង្ក្រាបបានពីក្រុមឈ្មួញដែលដឹកចេញពីប្រទេសថៃតាមច្រកទ្វាអន្តរជាតិប៉ោយប៉ែតកាលពីព្រឹកថ្ងៃទី៧ខែសីហាឆ្នាំ២០១៧នេះ ។
សូមជំរាបដែរថា ៖ មន្ត្រីកាំកុងត្រូលក្រុងប៉ោយប៉ែតធ្វើការបានដុតកំទេចចោលនូវសាច់មាន់ដែលខូចគុណភាពខាងលើនៅចំណុចបរិវេណកាស៊ីណូផ្កាយ៥ ដែលស្ថិតនៅក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។បើតាមលោក ឈុន ឃាង អនុប្រធានកាំកុងត្រូលសាខាខេត្តបន្ទាយមានជ័យប្រចាំក្រុងប៉ោយប៉ែតបានឲ្យដឹងថា ៖ សាច់មាន់ដែលចាប់បានពីក្រុមឈ្មួញយកមកដុតកំទេចចោលនេះ គឺឈ្មួញបានបង្កប់ក្រោមរទេះដឹកទំនិញចេញមកពីប្រទេសថៃតាមច្រកទ្វាអន្តរជាតិប៉ោយប៉ែត កាលពីព្រឹកមិញនេះ ខណៈដែរឈ្មួញកំពុងផ្ទេរដាក់រថយន្តម៉ាកកាម៉ារីនៅចំនុចកែងផ្សារអគ្គៈដែលស្ថិតក្នុង ភូមិក្បាលស្ពាន២ សង្កាត់/ក្រុងប៉ោយប៉ែត ។
លោកបានបន្តថា ៖ ខណៈមន្ត្រីកាំកុងត្រូលកំពុងធ្វើការឆែកស្រាប់តែម្ចាស់សាច់មាន់ខូចគុណភាពនិងកម្មករអូសរទេះគេចខ្លួនបាត់ស្រមោលឈឹងតែម្តង ។
បើទោះបីជាមន្ត្រីកាំកុងត្រូលខិតខំទប់ស្កាត់យ៉ាងណាក៏ដោយតែបើតាមប្រភពពីកម្មករអូសរទេះបានឲ្យដឹងថា៖សាច់មាន់ដែលខូចគុណភាពមានដូចជា៖ឆ្អឹងមាន់ ជើងមាន់ ជង្គង់មាន់ ព្រមទាំងប្រហិតផងនោះត្រូវបានក្រុមឈ្មួញធំៗលួចបង្កប់តាមរទេះដឹកទំនិញក្នុងមួយថ្ងៃៗរាប់តោនរួចបានបែងចែកដឹកតាមរទេះក្រោមរូបភាពវិចខ្ចប់ដាក់ក្នុងកេះលុះមកដល់ខាងប្រទេសកម្ពុជាត្រូវបានឈ្មួញដឹកតាមរថយន្តម៉ាកកាម៉ារីនិងរថយន្តក្រុងដឹកចែកចាយទៅតាមបណ្តាខេត្ត ។
ទន្ទឹមនឹងការបង្ក្រាបរួចដុតកំទិចចោលនេះដែរត្រូវបានប្រជាពលរដ្ឋក៏ដូចជាមជ្ឈដ្ឋានទូទៅរិះគន់ថា៖ការបង្ក្រាបរបស់មន្ត្រីកាំកុងត្រូលបានតែតូចៗតែប៉ុណ្ណោះចំណែកឈ្មួញធំៗដឹកតាមរថយន្តម៉ាកកាម៉ារីនិងរថយន្តក្រុងចែកចាយទៅតាមបណ្តាខេត្តនានានូវមិនទាន់ឃើញបង្ក្រាបបាននៅឡើយទេ ពូកគាត់សំណូមពរដល់មន្ត្រីមន្ត្រីកាំកុងត្រូលមេត្តាយកចិត្តទុកដាក់និងទប់ស្កាត់ឲ្យកាន់តែមានប្រសិទ្ធភាពខ្ពស់បើពុំដូច្នេះទេនឹងធ្វើឲ្យប៉ះពាល់ដល់សុខភាពប្រជាពលរដ្ឋរាប់លាននាក់៕
