កែប ៖ សមត្ថកិច្ចនៃអធិការដ្ឋាននគរបាលក្រុងកែប នៅរសៀលថ្ងៃទី០៧ខែសីហា ឆ្នាំ២០១៧នេះ បានចុះពង្រឹងសន្តិសុខនៅតាមភូមិសាស្ត្រនៃខ្សែក្រវាត់ក្រុងទាំងមូល។
ក្នុងការចុះបំពេញភារកិច្ចនេះ លោកវរសេនីយ៍ទោ សូង សិុន អធិការនគរបាលក្រុងកែប បានលើកឡើងយ៉ាងដូច្នោះថា នេះជាតួនាទីនិងជាកាតព្វកិច្ចរបស់កងកំលាំងប្រដាប់អាវុធត្រូវតែអនុវត្តន៍គោលការណ៍ដ៏មឺុងម៉ាត់ ដើម្បីសន្តិសុខសង្គម ដោយការងារនេះស្ថិតក្រោមការបង្ហាញ ពីលោកឧត្តមសេនីយ៍ទោ អីុង សំអុល ស្នងការនគរបាលខេត្តកែប ដែលជានិច្ចកាលតែងតែដាក់ទិសដៅដល់គ្រប់កងកម្លាំង ចុះបំពេញការងារ និងពង្រឹងសន្តិសុខ និងការពារសុវត្ថិភាពនៅគ្រប់មូលដ្ឋាន។
លោកថា ភារកិច្ចចម្បងរបស់សមត្ថកិច្ច គឺរក្សាសណ្តាប់ធ្នាប់របៀបរៀបរយនៅតាមទីសាធារណៈផង ជូនប្រជាពលរដ្ឋតាមមូលដ្ឋានផង ទើបខណៈនេះសមត្ថកិច្ចបានចុះពង្រឹងនិងធ្វើបង្គោលដោយដាក់សម្គាល់លេខទូរស័ព្ទទាន់ហេតុការណ៍ជាច្រើនខ្សែ នៅតាមដងផ្លូវនានា សម្រាប់ឲ្យមហាជន ពិសេសប្រជាពលរដ្ឋនៅតាមតំបន់ ដើម្បីងាយស្រួលក្នុងការផ្តល់ដំណឹងផ្សេងៗ។
ដូច្នេះ សូមមហាជន ក៏ដូចជាបងប្អូនប្រជាពលរដ្ឋ គ្រប់មជ្ឈដ្ឋាន នៅទីណាក៏ដោយបើមានបញ្ហាឬកើតហេតុការណ៍ផ្សេងៗ សូមជួយសហការឬផ្តល់ព័ត៌មាន តាមបណ្តាញទូរស័ព្ទទាន់ហេតុការណ៍ដែលមានស្រាប់នៅទីនេះ ដែលមានលេខ 097 778 0011-,097 778 0113-,097 604 2436 និង097 973 3438។
ការដាក់សម្គាល់លេខទូរស័ព្ទទាន់ហេតុការណ៍ នៅតាមដងផ្លូវសាធារណៈនិងតាមតំបន់ភូមិសាស្ត្រ ដាច់ស្រយាល ពិតជាប្រការមួយដ៏ប្រសើរ ហើយក៏ជាទិសដៅមួយដ៏ចម្បង ទាក់ទងនឹងភូមិ ឃុំមានសុវត្ថិភាពទាំង៩ចំណុចផងដែរ ៕
ណារិទ្ធ
