កែប ៖ នៅព្រឹកថ្ងៃទី២២ខែកក្កដា ឆ្នាំ២០១៧នេះ អាជ្ញាធរខេត្ត ដឹកនាំដោយលោក កែន សត្ថា អភិបាលខេត្តកែប ក្នុងនោះក៏មានការចូលរួមពីសំណាក់ មន្ទីរពាក់ព័ន្ធនានាផងដែរ ដូចជាមន្ទីរសាធារណៈការ និងដឹកជញ្ជូន មន្ទីរកសិកម្ម រួមទាំងស្ថាប័នជំនាញផ្សេងទៀត បានធ្វើការកែលម្អ គឺការដាំដើមត្នោតតាមចិញ្ចើមផ្លូវជាតិលេខ33A ដែលបច្ចុប្បន្នកំពុងស្ថាបនា ជិតរួចរាល់ទៅហើយនោះ។
នៅព្រឹកនេះទោះជាមានភ្លៀងរលឹមបែបណា ក៏សកម្មភាពការងារដំណើរការបានយ៉ាងប្រសើរ ដោយអាជ្ញាធរបានអនុវត្តន៍ចាប់ពីដងផ្លូវរង្វង់មូលផ្សារក្តាមបន្តឆ្ពោះតាមបណ្តោយដងផ្លូវនេះតែម្តង។
លោក ម៉ម ទូច ប្រធានមន្ទីរសាធារណៈការ និងដឹកជញ្ជូនខេត្តកែប បានឲ្យដឹងថា ក្នុងទិសដៅការងារខាងលើ លោកនឹងខិតខំដឹកនាំមន្ត្រី ដើម្បីស្ថាបនាដងផ្លូវសំខាន់មួយនេះ ឲ្យបានរួចរាល់មុនបុណ្យសមុទ្រ។លោកថា ផ្លូវដែលតភ្ជាប់ពីទីប្រជុំជនផ្សារក្តាម ឆ្ពោះទៅកាន់ទីប្រជុំជនសេះស មានចំងាយប្រវែងសរុប៧៨០០ម៉ែត្រ គឺជាអំណោយរបស់សម្តេច ហ៊ុន សែន ដែលបានបើកការដ្ឋានកាលអំឡុងឆ្នាំ២០១៣។ផ្តើមចេញពីភាពខិតខំកន្លងមកខាងជំនាញអនុវត្តបានប្រមាណ៨០ភាគរយហើយ នៅសល់មួយផ្នែកនឹងបន្តស្ថាបនាដ៏មមាញឹកបំផុត គឺឲ្យបានរួចរាល់មុនការរៀបចំបុណ្យសមុទ្រជុំទី២នៅខេត្តកែប ដែលនឹងប្រព្រឹត្តនាពេលខាងមុខនេះហើយ។
ក្នុងទិសដៅកែលម្អសោភណ្ឌភាពនេះដែរ លោក ថឹង បូរិន ប្រធានមន្ទីរកសិកម្មខេត្តកែប បានឲ្យដឹងថា ដោយអនុវត្តន៍តាមគោលការណ៍របស់អាជ្ញាធរខេត្ត លោកក៏បានដឹកនាំមន្ត្រីនិងបំផុសដល់ប្រជាពលរដ្ឋ ដើម្បីប្រមូលទិញកូនត្នោត នៅតាមមូលដ្ឋាននានា សម្រាប់យកមកដាំលម្អនៅតាមចិញ្ចើមផ្លូវដ៏ធំទូលាយមួយនេះ ហើយព្រឹកនេះយើងអនុវត្តលើកដំបូងដោយដាំតែចំនួន២០ដើមសិន ប៉ុន្តែបើតាមគម្រោងរបស់រដ្ឋបាលខេត្ត គឺត្រូវបន្តដាំតាមចិញ្ចើមអមសងខាងផ្លូវរហូតដល់១៥០០ដើមឯណោះ។
លោក កែន សត្ថា អភិបាលនៃគណៈអភិបាលខេត្តកែប បានបញ្ជាក់នូវជំហម៉ឺងម៉ាត់ ក្នុងការជម្រុញដល់ស្ថាប័នជំនាញនានា ក្នុងទិសដៅអនុវត្តន៍គ្រប់ផែនការ ដើម្បីស្តារ និងអភិវឌ្ឍន៍តំបន់ទេសចរណ៍ខេត្តមួយនេះ ឲ្យកាន់តែមានការរីកចម្រើនជាលំដាប់ ។ ផ្តើមចេញពីការខិតខំនេះ លោកក៏បានដាក់ទិសដៅសំខាន់ៗជាច្រើនទៀត ដើម្បីឆ្លើយតបនឹងភាពចាំបាច់ សម្រាប់បម្រើសេវាលើវិស័យទេសចរណ៍ក្នុងតំបន់ ប្រកបដោយភាពលេចធ្លោ និងមានផាសុខភាព និងនិរន្តរភាពផងដែរ ។
លោកបានបញ្ជាក់យ៉ាងដូច្នោះថា នេះជាភារកិច្ចដ៏ចាំបាច់ដើម្បីបម្រើអេកូទេសចរណ៍ ឲ្យកាន់តែមានសក្តានុពលខ្ពស់ ហើយអ្វីដែលសំខាន់គឺទិសដៅឆ្ពោះទៅរកភាពជោគជ័យ សម្រាប់លើកកម្ពស់ខេត្តកែបឲ្យសមនឹងឈ្មោះខេត្តតារារះក្នុងទិសនិរតី និងឆ្នេរស្រស់ស្អាតដាច់គេ ថែមទាំងមាន ភាពល្បីល្បាញដែលបានបន្តពីយូរលង់ណាស់មកហើយនោះ។
តាមរយៈនេះ លោកក៏បានជម្រុញដល់មន្ត្រីជំនាញ ត្រូវខិតខំសហការគ្នា ដើម្បីអភិវឌ្ឍន៍តំបន់ទេសចរណ៍ខេត្តកែប ឲ្យកាន់តែមានភាពស្រស់បំព្រង ពិសេសការស្ថាបនាផ្លូវពីរង្វង់មូលផ្សារក្តាម ឆ្ពោះទៅទីប្រជុំសេះស ឲ្យមានគុណភាព និងឲ្យបានឆាប់រួចរាល់សម្រាប់អបអរពិធីបុណ្យសមុទ្រលើកទី៦ ជុំទី២នៅខេត្តកែប ដែលនឹងត្រូវប្រព្រឹត្តទៅនាពេលឆាប់ៗខាងមុខ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
ណារិទ្ធ
