ការលើកឡើងរបស់ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ត្រូវបានធ្វើឡើងនៅក្នុងរបាយការណ៍ របស់រដ្ឋបាលខេត្តតាកែវ គោរពជូនគណៈកម្មការសិទ្ធិមនុស្ស ទទួលពាក្យបណ្ដឹង និងអង្កេតអធិការកិច្ច (គណៈកម្មការទី១) នៃរដ្ឋសភា។
តាមរយៈរបាយការណ៍ដដែល បានបង្ហាញឱ្យឃើញថា កំណើនភ្ញៀវទេសចរយ៉ាងគំហុក ក្នុងរយៈពេលជាងកន្លះខែមកនេះ គឺជាសញ្ញាណវិជ្ជមានដ៏សំខាន់សម្រាប់វិស័យទេសចរណ៍ និងសេដ្ឋកិច្ចមូលដ្ឋានរបស់ខេត្តតាកែវ ។ វត្តមាននៃរូបសំណាកបង្កងយក្សបាញ់ទឹកនេះ ដែលជានិមិត្តរូបតំណាងឱ្យផលិតផលកសិកម្ម និងធនធានធម្មជាតិដ៏ល្បីល្បាញប្រចាំខេត្ត រួមផ្សំជាមួយការកែលម្អហេដ្ឋារចនា សម្ព័ន្ធសួនច្បារមាត់បឹងតាកែវ ឱ្យកាន់តែមានសោភ័ណភាព និងផាសុកភាព បានប្រែក្លាយទីតាំងនេះទៅជាប៉ូលទាក់ទាញទេសចរណ៍ដ៏ពេញនិយមបំផុតទាំងពេលថ្ងៃ និងពេលរាត្រី ។
ទន្ទឹមនឹងកំណើនភ្ញៀវទេសចរ ដ៏ច្រើនកុះករនេះ រដ្ឋបាលខេត្តតាកែវ ក៏បានយកចិត្តទុកដាក់ខ្ពស់លើការងាររក្សាសន្តិសុខ សុវត្ថិភាព សណ្តាប់ធ្នាប់សាធារណៈ ការរៀបចំចំណតយានយន្ត និងការថែរក្សាអនាម័យបរិស្ថាន នៅជុំវិញតំបន់មាត់បឹងតាកែវ ដើម្បីធានាថាប្រជាពលរដ្ឋ និងភ្ញៀវទេសចរទាំងអស់ទទួលបានភាពកក់ក្តៅ និងបទពិសោធន៍កម្សាន្តដ៏ល្អប្រសើរ ព្រមទាំងជួយបង្កើនប្រាក់ ចំណូលដោយផ្ទាល់ដល់អាជីវករ និងប្រជាពលរដ្ឋនៅក្នុងក្រុងដូនកែវផងដែរ៕




