កែប ៖ ជនសង្ស័យម្នាក់ត្រូវសមត្ថកិច្ចខេត្តកំពត សហការជាមួយកំលាំងអធិការនគរបាលក្រុងកែប ឃាត់ខ្លួនយកទៅសួរនាំ បន្ទាប់ពីរកឃើញមានលាក់ទុកនូវសារធាតុញៀននៅក្នុងផ្ទះរបស់ខ្លួន។ជាមួយនឹងការឃាត់ខ្លួននេះ សមត្ថកិច្ចក៏បានដកហូតវត្ថុតាងម្សៅពណ៌សថ្លាមួយកញ្ចប់រួមនឹងសម្ភារៈសម្រាប់ប្រើប្រាស់មួយចំនួន។
ប្រតិបតិ្តការនេះបានធ្វើឡើងដោយមានការសម្របសម្រួលពីសំណាក់លោក ខាន់ សុផល ព្រះរាជអាជ្ញារងអមសាលាដំបូងខេត្តកំពត ទើបកំលាំងសមត្ថកិច្ចឈានទៅឆែកឆេរលំនៅដ្ឋានមួយកន្លែង ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុង-ខេត្តកែប នៅវេលាម៉ោង ១៤និង៣០នាទី រសៀលថ្ងៃទី១៩ខែឧសភា ឆ្នាំ២០១៧ ដោយបានឃាត់ខ្លួនម្ចាស់ផ្ទះនិងដកហូតសារធាតុញៀនប្រភេទម៉ាទឹកកកមួយកញ្ចប់និងសម្ភារៈប្រើប្រាស់មួយចំនួនផងដែរ។
សមត្ថកិច្ចបានប្រាប់ឲ្យដឹងថា ក្នុងកិច្ចប្រតិបតិ្តការនេះក្រោយពីឆែកឆេររកឃើញវត្ថុតាងប្រព្រឹត្តបទល្មើស ទើបសមត្ថកិច្ចសម្រេចឃាត់ខ្លួន ឈ្មោះ ឡាំ បេន ភេទប្រុស អាយុប្រហែល៣០ឆ្នាំដែលរស់នៅទីតាំងខាងលើ រួចបញ្ជូនមកអធិការដ្ឋាននគរបាលក្រុង ដើម្បីសាកសួរធ្វើកំណត់ហេតុ។សមត្ថកិច្ចបានបញ្ជាក់ទៀតថា ការឈានទៅឆែកឆេរលំនៅដ្ឋាននេះដែរ បន្ទាប់ពីមានការចង្អុលបង្ហាញ ពីលោកឧត្តមសេនីយ៍ទោ អីុង សំអុល ស្នងការនគរបាលខេត្តកែប និងស្ថិតក្រោមការសម្របសំម្រួលពីសំណាក់លោក ខាន់ សុផល ព្រះរាជអាជ្ញាអមសាលាដំបូងខេត្តកំពត ទើបសមត្ថកិច្ចខេត្តកំពតនិងកែបសហការគ្នាចេញប្រតិបតិ្តការបង្ក្រាបតែម្តង។
បច្ចុប្បន្នជនសង្ស័យ ត្រូវបានសមត្ថកិច្ចកំពុងរៀបចំកសាងសំណុំរឿងបញ្ជូនទៅសាលាដំបូងខេត្តកំពត ចាត់ការតាមនីតិវិធីហើយ ៕ ណារិទ្ធ
