ខេត្តប៉ៃលិន៖ សកម្មភាពចុះពិនិត្យទំនិញនៅតាមភូមិ និងតូបនានា ក្នុងក្រុងប៉ៃលិន នាព្រឹកថ្ងៃទី១៦ ខែឧសភា ឆ្នាំ២០១៧ មន្ត្រីសាខាកាំកុងត្រូលខេត្តប៉ៃលិន សហការជាមួយមន្ត្រីនៃមន្ទីរពាណិជ្ជកម្មខេត្ត បានធ្វើការណែនាំដល់អាជីវករក្នុងផ្សារ និងនៅតាមផ្ទះព្រមទាំងទីតាំលក់ដូរផ្សេងៗទៀត ឲ្យរៀបចំ កុំដាក់ទំនិញលាយឡំគ្នា ហើយគ្រប់អាជីវករទាំងអស់ ត្រូវជ្រើសរើសរកទំនិញណា មានគុណភាពល្អមកលក់ ដើម្បីធានាគុណភាពនិងសុវត្ថិភាពទំនិញ ។
បងស្រី គឹម ស្រីល័ក្ខ អាយុ ៤៤ឆ្នាំ ជាអាជីវករលក់ទំនិញនៅក្នុងភូមិអូរច្រា បានគាំទ្រចំពោះសកម្មភាពមន្ត្រីសាខាកាំកុងត្រូល ដែលបានចុះមកពិនិត្យ និងណែនាំ ដល់អាជីវករ ឲ្យប្រុងប្រយ័ត្ន ចំពោះការទទួលនាំចូលទំនិញមកលក់ នេះក៍ជាការក្រើនរំលឹក ដល់ពួកគាត់ក្នុងការប្រកបរបររកស៊ីលក់ដូរ ឲ្យបានត្រឹមត្រូវស្របទៅតាមច្បាប់ ។ បងស្រី បានបន្តថា៖ប៉ុន្មានខែចុងក្រោយនេះ បងប្អូនអាជីវករ បានយល់ដឹងច្រើន ដោយសារកន្លងមក មន្ត្រីសាខាកាំកុងត្រូល ចុះមកពន្យល់ណែនាំ ឲ្យពិនិត្យមុននាំចូល ទាំងស្លាកសញ្ញា កាលបរិច្ឆេទប្រើប្រាស់ ការថែរក្សាទុកដាក់ រៀបចំឲ្យបានល្អដល់អ្នកទិញទៅបរិភោគក៍មានសុខភាព មិនខាតបង់ថវិកាផងដែរ ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តប៉ៃលិន បានបញ្ជាក់ថា៖សកម្មភាពចុះពិនិត្យទំនិញគឺពិតជាបានលើកកំពស់ ដល់អ្នកប្រើប្រាស់ និងចៀសវាង កុំឲ្យប្រជាពលរដ្ឋមកពីទីជនបទ ទិញទំនិញខូចគុណភាព និងគ្មានអនាម័យនាំឲ្យកើតជំងឺផ្សេងៗ ។លោកបានពន្យល់ដល់អ្នកលក់ និងអ្នកទិញ ត្រូវពិនិត្យមើលស្លាកសញ្ញា ដោយខ្លួនឯងផង កុំទុកចិត្តឈ្មួញជាអ្នកនាំចូល ហើយអាជីវករត្រូវដាក់តាំងលក់ ផលិតផលទំនិញឲ្យមានរបៀបរៀបរយ ដើម្បីថែរក្សាគុណភាពទំនិញរបស់យើង និងសុខភាពអ្នកប្រើប្រាស់ផង ។
ជាមួយគ្នានេះដែរលោកក៍បានសំណូមពរ ដល់អ្នកទិញទៅបរិភោគ មុនពេលទិញ ត្រូវពិនិត្យនូវស្លាក់សញ្ញា និងកាលបរិច្ឆេទប្រើប្រាស់ឲ្យបានត្រឹមត្រូវផង ហើយជ្រើសរើសយកទំនិញណា ដែលវេចខ្ចាប់ បានល្អឬចំណីអាហារណា ដែលមានអនាម័យ មានគុណភាព ទាំងអស់គ្នា និងកុំឲ្យខាតបង់ថវិកាផងដែរ ។
ក្នុងការចុះពិនិត្យទំនិញ និងណែនាំដល់អាជីវករ មន្ត្រីជំនាញកាំកុងត្រូល បានរកឃើញទំនិញខូចគុណភាពមួយចំនួន ព្រមទាំងដកហូតរួមមាន៖ទឹកក្រូចដបជ័រ៦១ដប, មីចានជ័រ០៣ចានជ័រ ,ទឹកសណ្តែកប្រអប់៤៧ប្រអប់,ទឹកក្រូចស្មាដបជ័រ១០ដប ,នំស្រួយ១២កញ្ចប់ធំ ស្មើនិង២៧៥ កញ្ចាប់តូច ព្រមទាំងទំនិញមួយចំនួនទៀត យកមករក្សាទុកនៅស្នាក់ការកាំកុងត្រូល ដើម្បីចាត់ចែងតាមនិតិវិធី ៕
ដោយ ៖ សេង សុវណ្ណារិទ្ធ
