បាត់ដំបង៖ សម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា នារសៀលថ្ងៃទី១១ ខែមិថុនា ឆ្នាំ២០២៦ បានអញ្ជើញចុះត្រួតពិនិត្យរោងចក្រផលិតឯកសណ្ឋានយោធា DSS នៅក្នុងខេត្តបាត់ដំបង។
ខាងក្រោមនេះជាប្រសាសន៍សំខាន់ៗរបស់ សម្តេចតេជោ ហ៊ុន សែន ដែលថ្លែងក្នុងឱកាសចុះត្រួតពិនិត្យរោងចក្រផលិតឯកសណ្ឋានយោធា៖
* សម្តេចតេជោ ហ៊ុន សែន បានថ្លែងថា ការផលិតសម្ភារៈយោធារបស់កម្ពុជានេះ គឺមិនមែនសម្រាប់យកទៅឈ្លានពានអ្នកណានោះទេ។ ក្នុងរយៈពេលចុងក្រោយនេះ ពោលគឺក្រោយមានរោងចក្រ DSS នេះ ទាំងកងកម្លាំងយោធា និងនគរបាលពុំបាននាំសម្ភារៈ ឬអាវក្រោះមកពីប្រទេសក្រៅទៀតទេ។
* សម្តេចតេជោ ហ៊ុន សែន បានណែនាំឱ្យលក់សម្ភារៈឯកសណ្ឋានយោធាដែលកម្ពុជាផលិតបាន ទៅក្រៅប្រទេសនៅថ្ងៃខាងមុខ ប៉ុន្តែការលក់ទៅក្រៅប្រទេសនេះ ធ្វើបានតែទៅប្រទេស ដែលរដ្ឋាភិបាលប្រទេសនោះបានបញ្ជាក់ជាមួយកម្ពុជាប៉ុណ្ណោះ
* សម្តេចតេជោ ហ៊ុន សែន បានថ្លែងថា អាវការពារយោធារបស់កម្ពុជា សុទ្ធតែមានគុណភាព ហើយអាវការពារនេះនាយករដ្ឋមន្រ្តីបានសាករួចហើយ
* សម្តេចតេជោ ហ៊ុន សែន បានថ្លែងថា ត្រឹមរយៈពេលប្រមាណ៣ខែមកនេះ រាជរដ្ឋាភិបាល បានបញ្ជាទិញឯកសណ្ឋានយោធាពីរោងចក្រ DSS មានតម្លៃប្រមាណ ៧,៥ លានដុល្លាររួចហើយ។
* សម្តេចតេជោ ហ៊ុន សែន ផ្តាំទៅក្រុមប្រឆាំងនៅក្រៅប្រទេស បើស្គាល់ ហ៊ុន សែន មិនច្បាស់ទេ ត្រូវរៀនទៀត បើរៀនជាតិនេះមិនអស់ទេ ត្រូវរៀនដល់ជាតិក្រោយទៀត។ សម្តេចបានបកស្រាយចំពោះអ្វីដែលសម្តេចលើកឡើងពាក់ព័ន្ធនឹងចំណុចខ្វះខាតរបស់សម្តេចកន្លងទៅ ដោយមិនបានផ្តោតសំខាន់លើវិស័យយោធា ហើយផ្តោតលើការអភិវឌ្ឍជាតិ
* សម្តេចតេជោ ហ៊ុន សែន ប្រាប់ឱ្យក្រុមប្រឆាំងរង់ចាំមើលថា តើថ្ងៃមុខវិស័យយោធារបស់កម្ពុជា នឹងរឹងម៉ាំខ្លាំងយ៉ាងណា។
* សម្ដេចតេជោ ហ៊ុន សែន បានណែនាំឱ្យស្រាវជ្រាវរកអ្នកពាក់ព័ន្ធនឹងនាំសាច់បង្កករបស់ថៃ ចូលកម្ពុជា ដោយក្នុងនោះសូម្បីតែអ្នកបើកឡាន ក៏មិនឱ្យរួចខ្លួនដែរ។ សម្តេចតេជោ ហ៊ុន សែន ប្រាប់ឱ្យអ្នកលក់សាច់បង្កកពីប្រទេសថៃ ឱ្យដកខ្លួនជាបន្ទាន់
* សម្តេចតេជោ ហ៊ុន សែន ថ្លែងថា ថៅកែដែលនាំឱ្យសាច់បង្កកថៃ ចូលមកកម្ពុជា សម្តេចនឹងជួបផ្ទាល់ សួរចម្លើយឱ្យដឹងថា នរណាដែលអនុញ្ញាតឱ្យនាំចូលមកកម្ពុជា ហើយនាំយកមកពីណា ព្រោះខាងថៃ ថាកម្ពុជាលួចនាំចូលរបស់គេ។
* សម្តេចតេជោ ហ៊ុន សែន ថ្លែងថា សម្តេចនឹងបន្តជួយរដ្ឋាភិបាល លើការផលិតសម្ភារៈដទៃទៀត ដែលទាក់ទងនឹងវិស័យសន្តិសុខជាតិ ការពារជាតិ។ សម្តេចថ្លែងថា ដូនតាខ្មែរធ្លាប់ធ្វើដល់អង្គរវត្តកាលពីបុរាណ ដូច្នេះការផលិតត្រឹមសម្ភារៈយោធា នឹងមិនលំបាកសម្រាប់កូនខ្មែរជំនាន់នេះឡើង
* សម្តេចតេជោ ហ៊ុន សែន ថ្លែងថា សម្តេចទើបបានដាក់ឈ្មោះឱ្យកូនកម្មករ៣នាក់
* សម្តេចតេជោ ហ៊ុន សែន ផ្តាំទៅក្រុមប្រឆាំងថា ចាំបន្តទាស់គ្នាដល់ជាតិក្រោយទៀត ដោយសារតែក្រុមនេះចង់ផ្តួលសម្តេច ចង់ផ្តួលត្រកូលហ៊ុន
* សម្តេចតេជោ ហ៊ុន សែន ថ្លែងអំណរគុណដល់ពលរដ្ឋទាំងឡាយ ដែលបោះឆ្នោតជូនគណបក្សប្រជាជន ដោយក្នុងនោះមានអ្នកបាត់ដំបងផងដែរ ដែលបោះឱ្យគណបក្សប្រជាជនតាំងពីជំនាន់មុនរហូតមកដល់បច្ចុប្បន្ន
* សម្តេចតេជោ ហ៊ុន សែន ថ្លែងថា ទោះបីជាមានបញ្ហាព្រំដែន ប៉ុន្តែផ្ទៃក្នុងកម្ពុជា មិនមានផ្ទុះអាវុធនោះទេ ខណៈដែលប្រទេសមួយចំនួន មានករណីនេះកើតឡើង
* សម្តេចតេជោ ហ៊ុន សែន ថ្លែងថា មានតែគណបក្សប្រជាជនកម្ពុជាមួយគត់ ដែលអាចធ្វើរឿងនេះបាន គឺមិនឱ្យមានបញ្ហាផ្ទៃក្នុង
* សម្តេចតេជោ ហ៊ុន សែន បានបកស្រាយចំពោះការនាំចូលរថក្រោះពីចិន។ សម្តេចបានបញ្ជាក់ថា កម្ពុជាមិនដែលឈ្លានពាន មិនដែលគំរាមកំហែងប្រទេសណាទេ។ កម្ពុជាធ្លាប់នាំកងទ័ពចេញពីប្រទេសខ្លួន ប៉ុន្តែជាការចូលរួមរក្សាសន្តិភាពជាមួយ UN
* សម្តេចតេជោ ហ៊ុន សែន ប្រកាសថា កម្ពុជាប្រកាន់ខ្ជាប់នូវ ដំណោះស្រាយសន្តិវិធី គឺមិនវ៉ៃគេ ប៉ុន្តែក៏មិនមែនសន្តិវិធីចំពោះនរណាដែលមកវ៉ៃកម្ពុជាដែរ។ សម្តេចច្រានចោលការចោទប្រកាន់ថា កម្ពុជាទិញរថក្រោះហើយបញ្ជូនទៅកាន់ព្រំដែន។ សម្តេចតេជោ ហ៊ុន សែន បញ្ជាក់ថា កម្ពុជាប្រកាន់ខ្ជាប់ឥរិយាបទក្នុងការដោះស្រាយបញ្ហាដោយសន្តិវិធី
* សម្តេចតេជោ ហ៊ុន សែន បានថ្លែងថា គោលដៅកម្ពុជា សម្រាប់សម្ភារៈយោធា ត្រូវតែមានកម្រិតផ្គត់ផ្គង់ក្នុងប្រទេសគ្រប់គ្រាន់ជាមុនសិន ទើបអនុញ្ញាតឱ្យមានការនាំចេញ ទៅក្រៅប្រទេស៕
