ខេត្តរតនគិរី ៖ ប្រភពបែកធ្លាយបន្ទាប់ពីគេហទំព័រ និងផេកហ្វេស្បុក គេអះអាងថា ប្រធានមន្ទីរបរិស្ថានខេត្តរតនគិរីលោក ផុន ខេមរិទ្ធ កាពារមិនអោយអ្នកសារព័ត៌មានចូលទៅយកព័ត៌មាន ក្នុងដែនជម្រកសត្វព្រៃលំផាត់ ព្រោះឈ្មួញកំពុងកាប់ឈើ ។
ស្នូរសម្លេងមាស៊ីនកាត់ឈើឡើងកងរំពងពេញព្រៃអភិរក្សលំផាត់ ដែលសេចក្ដីរាយការណ៍ថា មេឈ្មួញទាំងនោះជាមន្ត្រីកងរាជអាវុធហត្ថឈ្មោះ អេង និងជាប្អូនប្រុសបង្កើតរបស់លោកឧត្ដមសេនីយ៍ត្រី គឹម រស្មី មេអាវុធហត្ថខេត្តរតនគិរី ។ គំនរឈើរាប់ពាន់ម៉ែត្រគូប លាក់ទុកក្នុងព្រៃ ដែលមន្ត្រីអភិរក្សបរិស្ថានកំពុងការពារយ៉ាងតឹងរឹង ។
តាមសេចក្ដីរាយការណ៍ពីប្រជាពលរដ្ឋនិយាយថា គំនរឈើទាំងនោះ ជារបស់ បងរស្មី គេកាប់ជាងមួយខែមកហើយ មិនឃើញមានសមត្ថកិច្ចណាហ៊ានចេញមកបង្ក្រាបឡើយ ដោយកាប់ឈើក្នុងដែនអភិរក្សលំផាត់ ប្រមូលដឹកតាមគោយន្ត និងរថយន្តមកគរទុកនៅភូមិកែងសាន់ ឃុំសមុទ្រលើ ស្រុកលំផាត់ រួចដឹកយកទៅលក់អោយឈ្មួញជនជាតិវៀតណាមជារាងរាល់ថ្ងៃបានយ៉ាងរលូន ។
លោក អេង ជាមន្ត្រីអាវុធហត្ថ ដឹកឈើយកទៅលក់នៅប្រទេសវៀតណាម ដោយឆ្លងកាត់ឃុំបរខាំចេញតាមច្រកព្រំប៉ុស្តិ៍អូរថ្ម ។
គំនរឈើទាំងនោះ ត្រូវបានក្រុមការងាររបស់សហភាតរៈ អង្គភាពសារព័ត៌មាន នគរមាស ដឹកនាំដោយលោក ចាន់ធី ចាងហ្វាងការផ្សាយប្រទះឃើញ កាលព្រឹកថ្ងៃទី ១៦ ខែកុម្ភៈ ឆ្នាំ ២០១៧ នេះ បន្ទាប់ពីធ្វើដំណើរកាត់ក្នុងព្រៃ កាលពីថ្ងៃទី ១៥ និងទី១៦ ខែកុម្ភៈ ។
ជុំវិញសេចក្ដីរាយការណ៍ខាងលើ អង្គភាពសារព័ត៌មានយើងមិនអាចស្នើសុំអោយមានការបង្ក្រាបទានពេលវេលា និងមានការបកស្រាយពីអាជ្ញាធរខេត្ត និងសមត្ថកិច្ចពាក់ព័ន្ធបានទេ ខណៈមិនអាចទំនាក់ទងបាន ព្រោះគ្មានលេខទូរស័ព្ទ ៕
