ខេត្តព្រៃវែង ៖ សេចក្តីរាយការណ៍ បានឱ្យដឹងថា ជញ្ជីងចល័តថ្លឹងរថយន្តនេះ ចាប់ផ្តើមដំណើរការ នៅដើមខែមករា ឆ្នាំ២០១៥ ប៉ុន្តែអ្វីដែលកត់សម្គាល់នោះ គឺមិនឃើញ មានស្លាកសញ្ញា និងអក្សរថ្លឹងរថយន្តលើសទម្ងន់ ដូចមុននោះទេ ដោយគ្រាន់តែឃើញ ក្រុមមន្ត្រី ៤ទៅ៥ នាក់ ខ្លះដោះអាវស្លៀកខោជើងវែង ដេកក្នុងអង្រឹង និងឃើញមានរថយន្ត ដឹកទំនិញ ដឹកស្រូវ ដឹកខ្សាច់លើសទម្ងន់ មកឈប់ត្រៀមត្រា ចូលទៅបង់លុយ ឱ្យក្រុមមន្ត្រីនោះ ដោយមើលទៅតាម ឡានដឹកទំនិញតូចធំ ហើយឱ្យបង់លុយ តាមតែមាត់ ទៅតាមហ្នឹងដែរ។
ប្រភពពីប្រជាពលរដ្ឋក៏ដូចជា មន្ត្រីនៅខេត្តព្រៃវែង បានឱ្យដឹងថា ជញ្ជីងថ្លឹងរថយន្តចល័ត ដែលគេហៅថា កុងត្រូលជជុះ ស្ថិតនៅលើកំណាត់ ផ្លូវជាតិលេខ១ ក្នុងភូមិចេក ឃុំល្វា ស្រុកព្រះស្តេច ខេត្តព្រៃវែង បានចាប់ផ្តើមចេញមុខ ធ្វើសកម្មភាពដាក់ប៉ុស្តិ៍ជជុះ ដើម្បីប្រមូលលុយ និងកោសរូស ក្រុមអ្នករកស៊ីដឹកទំនិញ និងឈ្មួញដឹកទំនិញលើសទម្ងន់ ចង់ខ្លាំងជាងមុនទៅទៀត ខណៈដែលជញ្ជីងចល័ត ថ្លឹងរថយន្តមួយនេះ បានផ្អាកសកម្មភាព ជិតកន្លះឆ្នាំ។
សេចក្តីរាយការណ៍បានបន្តថា ចំពោះមន្ត្រីដែលប្រចាំការ នៅកន្លែងថ្លឹងរថយន្តនោះ គឺមានមន្ត្រីសាធារណការ ខេត្តព្រៃវែង សហការជាមួយ មន្ត្រីមកពីក្រសួង និងសមត្ថកិច្ចពាក់ព័ន្ធ ពិសេសមាន អ្នកគ្រប់គ្រងម្នាក់ឈ្មោះ អាត ជាអ្នកមើលការខុសត្រូវ និងជាអ្នកក្តោបចំណូល និងចំណាយផងដែរ ។ កត្តានេះហើយ ទើបបង្កឱ្យផ្លូវមួយចំនួន ខូចខាតខ្ទេចខ្ទី ដោយសារក្រុមឈ្មួញដឹកទំនិញ លើសទម្ងន់ទាំងនោះ ហុចតែលុយទៅឱ្យ មន្ត្រីដែលប្រចាំការ នៅទីតាំងជញ្ជីងនោះ ហើយបន្តដំណើរ បានដោយរលួន ៕
