ក្រុមអាជីវករនិងប្រជាពលរដ្ឋដែលដឹកទំនិញឆ្លងកាត់មុខស្នាក់ការជញ្ជីងថ្លឹងរថយន្តនៅភូមិកំពង់ទួល បានឱ្យដឹងថាស្នាក់ការជញ្ជីងថ្លឹងរថយន្តនោះមិនខុសពីកុងត្រូលជជុះទ្បើយ។ កន្លងមកគេឃើញទីតាំងជញ្ជីងចល័តថ្លឹងរថយន្តនេះត្រូវបានដកចេញម្តងរួចទៅហើយ ប៉ុន្តែក្រោយមកមិនដឹងជាយ៉ាងម៉េចនៅតែឃើញប្រជាពលរដ្ឋនិងក្រុមអ្នកដឹកជញ្ជូនទំនិញនៅតែចូលទៅបង់លុយឱ្យមន្ត្រីដែលប្រចាំការនៅស្នាក់ការនោះដូចមុនដដែលៗ។ បញ្ហានេះលោក ម៉ៅភិរុណ ដែលជាអភិបាលខេត្តកណ្តាលត្រូវពិនិត្យមើលសកម្មភាពមិនប្រក្រតីរបស់លោក ម៉ឹង យូទ្បេង ជាបន្ទាន់ ព្រោះក្រុមជញ្ជីងថ្លឹងរថយន្តមិនត្រឹមតែទារលុយពីរថយន្តដឹកទំនិញលើសចំណុះប៉ុណ្ណោះទេ គឹសូម្បីតែរថយន្តដឹកកសិផលក៏ត្រូវបង់លុយដែរ ។
ប្រភពពីមន្ត្រីមន្ទីរសាធារណការនិងដឹកជញ្ជូនខេត្តកណ្តាលបានឱ្យដឹងថា ជញ្ជីងថ្លឹង រថយន្តនៅតែជាប្រភពចំណូលដ៏សំខាន់របស់លោកម៉ឹង យូទ្បេង ដែលជាប្រធានមន្ទីរ ដោយមានមនុស្សស្និទ្ធគាត់មួយចំនួនជាអ្នកបំពេញតួនាទីក្នុងការប្រមូលលុយ។ ជាក់ស្តែងទីតាំង ជញ្ជីងចល័តថ្លឹងរថយន្តនៅក្បែរស្ពាន៧មករាលើផ្លូវជាតិលេខ៣ ក្នុងភូមិកំពង់ទួល ឃុំអន្លង់រមៀតស្រុកកណ្តាលស្ទឹង ខេត្តកណ្តាល ត្រូវបានប្រជាពលរដ្ឋរិះគន់ថាមិនដែលឃើញថ្លឹងរថយន្តដែលដឹកទំនិញផ្ទុកលើសទម្ងន់នោះទេ។ ផ្ទុយទៅវិញគេតែងតែឃើញរថយន្តធំៗផ្ទុកទំនិញលើសចំណុះមកឈប់នៅមុខទីតាំងជញ្ជីងថ្លឹងរថយន្តនោះ ហើយព្រូរថយន្តយកលុយទៅហុចឱ្យអ្នកអង្គុយចាំនៅក្នុងស្នាក់ការ គឺជាការស្រេច។
សមត្ថកិច្ចពាក់ព័ន្ធបានឱ្យដឹងថាមន្ត្រីដែលប្រចាំការនៅស្នាក់ការជញ្ជីងថ្លឹងរថយន្ត ក្បែរស្ពាន៧មករា ផ្លូវជាតិលេខ៣ ភូមិកំពង់ទួលនោះ គឺជាមន្ត្រីមកពីមន្ទីរសាធារណការ និងដឹកជញ្ជូនខេត្តកណ្តាល សហការជាមួយមន្ត្រីមកពីក្រសួងនិងមន្ត្រីមកពីសាលាខេត្តជា អ្នកគ្រប់គ្រងចំណូលចំណាយ។ ការពិតការដាក់ជញ្ជីងថ្លឹងរថយន្តនេះគឺដើម្បីទប់ស្កាត់កុំឱ្យ រថយន្តដឹកទំនិញលើសទម្ងន់ធ្វើឱ្យខូចខាតផ្លូវនិងស្ពាន ប៉ុន្តែជាក់ស្តែងពួកគេឆ្លៀតឱកាស ប្រមូលលុយធ្វើមានធ្វើបានយ៉ាងសុខស្រួលបំផុត។ ក្នុងនោះលោក ម៉ឹង យូទ្បេង ដែលជា ប្រធានមន្ទីរសាធារណការនិងដឹកជញ្ជូនខេត្តកណ្តាល គឺជាអ្នកទទួលផលប្រយោជន៍ច្រើនជាងគេតាមរយៈការប្រព្រឹត្តអំពើពុករលួយបក្ខពួកនិយម ដូច្នេះអង្គភាពប្រឆាំងអំពើពុករលួយគួរចាត់វិធានការទប់ស្កាត់ជាបន្ទាន់បំផុត។
ទាក់ទិននឹងបញ្ហាខាងលើនេះ សារព័ត៌មានយើងពុំសុំការបំភ្លឺពីលោកប្រធានមន្ទីរសាធារណការ និងដឹកជញ្ជូនខេត្តកណ្តាលបាននោះទេ ?
