ខេត្តប៉ៃលិន ៖ រហូតមកដល់ថ្ងៃទី២០ ខែមេសា ឆ្នាំ២០១៦កន្លងទៅនេះ អ្នកសារព័ ត៌មានចំនួន៣នាក់ ទី១.លោក អុក ទូច អាយុ៤៣ឆ្នាំ ភ្នាក់ងារសារព័ត៌មានកម្ពុជាអភិវឌ្ឍន៍ រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ទី២.លោក អៀង សារ៉ូន្នីយ៉ា អាយុ៣៧ឆ្នាំ ភ្នាក់ងារទូរទស្សន៍ប៉ុស្តិ៍លេខ៥ និងលោក ឡោ សុខហៃ អាយុ៤៥ឆ្នាំ ភ្នាក់ងារទូរទស្សន៍អប្សរាANN ទាំងពីរនាក់រស់នៅក្រុងប៉ៃលិន ត្រូវបានលោក ជុំ សែនសទ្ធា ព្រះរាជអាជ្ញាអមសាលាដំបូងខេត្ត ចេញដីការកោះហៅបំភ្លឺ ពាក់ព័ន្ធនឹងករណីមន្ត្រីនគរបាលស្រុកសាលាក្រៅម្នាក់ ជិះម៉ូតូយកកាំភ្លើងម៉ាក អាកាស្វាយបត់ទៅគម្រាមប៉ងបាញ់សម្លាប់លោក អុក ទូ ច នៅក្នុងផ្ទះរបស់ខ្លួន បន្ទាប់ពីបានចុះទៅសួរនាំប្រជាពលរដ្ឋមួយកន្លែងនៅក្នុងភូមិ ដែលត្រូវមន្ត្រីនគរបាលខិលខូចរូបនោះ យកកាំភ្លើងទៅបាញ់បោះសេរីអស់ចំនួន៤គ្រាប់ កាលពីពេលថ្មីៗកន្លងទៅនេះ ។ លុះពេលត្រឡប់មកដល់ផ្ទះវិញ ស្រាប់តែនគរបាលរូបនោះ បានជិះម៉ូតូស្លៀកពាក់ឯកសណ្ឋាននគរបាល ស្ពាយកាំភ្លើងយកទៅភ្ជង់គម្រាមបាញ់សម្លាប់តែម្តង តែលោក អ៊ុក ទូច បាននិយាយសម្របសម្រួល ទាន់ពេលវេលា ។
គួររំលឹកថា ហេតុការណ៍គម្រាមបាញ់សម្លាប់អ្នកសារព័ត៌មានម្នាក់នេះ បានកើតឡើងកាលពីវេលាម៉ោង៥ និង២០នាទីល្ងាចថ្ងៃទី១០ ខែមេសា កន្លងទៅ ស្ថិតនៅក្នុងផ្ទះរបស់ជនរងគ្រោះ ឈ្មោះ អ៊ុក ទូច ភេទប្រុស អាយុ៤៣ឆ្នាំ ជាភ្នាក់ងារសារព័ត៌មានកម្ពុជាអភិវឌ្ឍន៍ រស់នៅភូមិ ឃុំខាងលើ ។ ចំណែកការបាញ់បោះសេរីបានកើតឡើង កាលពីវេលាម៉ោង៩ និង ៣០នាទីយប់ថ្ងៃទី០៤ ខែមេសា ឆ្នាំ២០១៦ ដោយជនសង្ស័យម្នាក់ ឈ្មោះ ឃា សុខន ហៅក្តាម ភេទប្រុស អាយុ២៨ឆ្នាំ ជាមន្ត្រីនគរបាលប្រចាំនៅស្រុកសាលាក្រៅ បាននាំគ្នាផឹកស៊ីស្រវឹងជាមួយមិត្តភក្តិ រួចយកកាំភ្លើងអាកាស្វាយបត់បាញ់ចូលទៅក្នុងផ្ទះប្រជាពលរដ្ឋមួយកន្លែងអស់ចំនួន៤គ្រាប់ នៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ ។ តែមិនបណ្តាលឱ្យរងរបួសនរណាម្នាក់នោះឡើយ ហើយរើសបានសំបកគ្រាប់ចំនួន៤ និងក្បាលគ្រាប់១ផងដែរ ។
សូមបញ្ជាក់ថា កាលពីរសៀលថ្ងៃទី១០ ខែមេសា កន្លងទៅ បន្ទាប់ពីអ្នកសារព័ត៌ មា នទូរទស្សន៍២នាក់ ត្រឡប់ទៅផ្ទះរៀងៗខ្លួនវិញហើយ ទើបជនសង្ស័យខាងលើជិះម៉ូតូយកកាំភ្លើងទៅភ្ជង់បាញ់សម្លាប់ជនរងគ្រោះខាងលើ ។ រហូតដល់ព្រឹកថ្ងៃទី១១ ខែមេសា លោក អ៊ុក ទូច បានដាក់ពាក្យបណ្តឹងទៅអយ្យការអមសាលាដំបូង ដើម្បីចាត់ការតាមនីតិ វិធី ។
ពាក់ព័ន្ធទៅនឹងបញ្ហាខាងនេះ រហូតមកដល់ព្រឹកថ្ងៃទី២០ ខែមេសា ឆ្នាំ២០១៦នេះ លោក ជុំ សែនសទ្ធា ព្រះរាជអាជ្ញាអមសាលាដំបូងខេត្ត បានចាប់ផ្តើមចេញដីការកោះហៅជនរងគ្រោះ លោក អ៊ុក ទូច ចូលបំភ្លឺនៅវេលាម៉ោង៨ព្រឹកថ្ងៃទី២០ ខែមេសា ចំណែកភ្នាក់ងារទូរទស្សន៍២នាក់ទៀត លោកព្រះរាជអាជ្ញាកោះហៅឱ្យចូលទៅបំភ្លឺធ្វើជាសាក្សីនៅវេលាម៉ោង២រសៀលថ្ងៃដដែល ។ តែមិនទាន់មានចំណាត់ការយ៉ាងណាទៅលើជនសង្ស័យ ជាមន្ត្រីនគរបាលនៅឡើយទេ ដោយលោក ជា វ៉ាន់រ៉ន ក្រឡាបញ្ជីព្រះរាជអាជ្ញាអះអាងថា កំពុងសាកសួរជនរងគ្រោះនិងសាក្សី ហើយនៅពេលក្រោយនឹងឈានដល់ កោះហៅជនសង្ស័យបាញ់បោះសេរីនោះយកមកសួរនាំម្តង រួចនឹងចាត់ការបន្តបើសិនជាមានករណីគម្រាមបាញ់អ្នកកាសែតមែននោះ ។
ទោះបីជាយ៉ាងណាក៏ដោយ ការយកកាំភ្លើងទៅបាញ់បោះសេរីពេលយប់ព្រលប់ បង្កឱ្យមានការភ្ញាក់ផ្អើលដល់ប្រជាពលរដ្ឋរស់នៅក្នុងភូមិ ជាការខុសច្បាប់រួចទៅហើយ រីឯ ការយកកាំភ្លើងចូលទៅក្នុងផ្ទះជនរងគ្រោះ លោក អ៊ុក ទូច រួចគម្រាម ដោយមិនឱ្យចុះផ្សារព័ត៌មានពាក់ព័ន្ធនឹងការបាញ់បោះនោះ ក៏ជាការខុសច្បាប់មួយទៀតដែរ ។ ដូច្នេះប្រជាព លរដ្ឋទូទាំងខេត្តប៉ៃលិន ក៏ដូចជាភ្នាក់ងារសារព័ត៌មានទាំងអស់ ដែលប្រចាំការនៅក្នុងខេត្តប៉ៃលិន រង់ចាំមើលថាតើចំណាត់ការរបស់លោក ព្រះរាជអាជ្ញា ខេត្តប៉ៃលិន នឹងធ្វើយ៉ាងម៉េចចំពោះមន្ត្រីនគរបាលខិលខូចបែបនេះ ឬមួយបណ្តែតបណ្តោយឱ្យដើរហើរ សេរីបង្ករឿ ងក្នុងសង្គមថែមទៀត ? ។
ចំណែកលោក អ៊ុក ទូច ក៏ដូចជាភ្នាក់ងារសារព័ត៌មានទូរទស្សន៍២នាក់ទៀត កំពុង តែព្រួយបារម្ភពីសុវត្ថិភាព ខណៈមន្ត្រីនគរបាលដែលបាញ់បោះសេរីនោះមិនទាន់ត្រូវបាន ខាងតុលាការចាត់ការ ឬយកទៅណែនាំដាក់កិច្ចសន្យាឱ្យបានតឹងរឹងបំផុតនោះ ៕
