ខេត្តប៉ៃលិន ៖ អ្នកសារព័ត៌មានម្នាក់ក្នុងចំណោម ៣ នាក់មានការខ្លាចញញើតយ៉ាងខ្លាំង ដោយត្រូវមន្ត្រីនគរបាលស្រុកសាលាក្រៅម្នាក់ជិះម៉ូតូយកកាំភ្លើងម៉ាកអាកាស្វាយបត់ទៅគម្រាមប៉ងបាញ់សម្លាប់នៅក្នុងផ្ទះរបស់ខ្លួន បន្ទាប់ពីពួកគេបានចុះទៅសួរនាំប្រជាពលរដ្ឋមួយកន្លែង នៅក្នុងភូមិដែលត្រូវមន្ត្រីនគរបាលខិលខូចរូបនោះយកកាំភ្លើងទៅបាញ់បោះសេរីអស់ចំនួន៤គ្រាប់កាលពីពេលថ្មីៗកន្លងទៅនេះ ។ លុះត្រឡប់មកដល់ផ្ទះវិញ ស្រាប់តែនគរបាលរូបនោះ បានជិះម៉ូតូស្ពាយកាំភ្លើងយកទៅភ្ជង់គម្រាមបាញ់សម្លាប់តែម្តង តែត្រូវអ្នកសារព័ត៌មានដើរទៅក្បែរខ្លួន ហើយនិយាយសម្របសម្រួលគ្នា ដើម្បីកុំឱ្យមានបញ្ហា ។
ហេតុការណ៍នេះ បានកើតឡើងកាលពីវេលាម៉ោង៥ និង២០នាទីល្ងាច ថ្ងៃទី១០ ខែមេសា ឆ្នាំ២០១៦ ស្ថិតនៅក្នុងផ្ទះរបស់ជនរងគ្រោះ ឈ្មោះ អ៊ុក ទូច ភេទប្រុស អាយុ៤៣ឆ្នាំ ជាភ្នាក់ងារសារព័ត៌មានកម្ពុជាអភិវឌ្ឍន៍ រស់នៅភូមិអូររអិល ឃុំស្ទឹងកាច់ ស្រុកសាលាក្រៅ ។
សូមបញ្ជាក់ថា កាលពីវេលាម៉ោង៩ និង៣០នាទីយប់ថ្ងៃទី០៤ ខែមេសា ឆ្នាំ២០១៦ កន្លងទៅ មានបុរសម្នាក់ ឈ្មោះ ឃា សុខន ហៅក្តាម ភេទប្រុស អាយុប្រហែល២៨ឆ្នាំ ជាមន្ត្រីនគរបាលប្រចាំនៅស្រុកសាលាក្រៅ បាននាំគ្នាផឹកស៊ីស្រវឹងជាមួយមិត្តភក្តិរួចយកកាំ ភ្លើងអាកាស្វាយបត់បាញ់ចូលទៅក្នុងផ្ទះប្រជាពលរដ្ឋមួយកន្លែងអស់ចំនួន៤គ្រាប់ នៅក្នុងភូមិអូររអិល ឃុំស្ទឹងកាច់ ស្រុកសាលាក្រៅ តែមិនបណ្តាលឱ្យរងរបួសនរណាម្នាក់នោះឡើយ គ្រាន់តែព្រលឹងចុងសក់ ហើយរើសបានសំបកគ្រាប់ចំនួន៤ និងក្បាលគ្រាប់១ផងដែរ ។
ប្រភពព័ត៌មានបានឱ្យដឹងថា បន្ទាប់ពីទទួលដំណឹងពីប្រជាពលរដ្ឋថា មានករណីមន្ត្រីនគរបាលខាងលើបាញ់បោះសេរីកាលពីប៉ុន្មានថ្ងៃមុន ទើបកាលពីវេលាម៉ោង១ និង៣០នាទីរសៀលថ្ងៃទី១០ ខែមេសា នេះ ភ្នាក់ងារសារព័ត៌មានចំនួន៣ស្ថាប័នបានចុះទៅសួរនាំផ្ទះប្រជាពលរដ្ឋរងគ្រោះ ទី១. ឈ្មោះ អ៊ុក ទូច ភ្នាក់ងារកាសែតកម្ពុជាអភិវឌ្ឍន៍ រស់នៅភូមិខាងលើ ទី២. ឈ្មោះ អៀង សារ៉ូន្នីយ៉ា ភេទប្រុស អាយុ៣៧ឆ្នាំ ជាភ្នាក់ងារសារព័ត៌ មានទូរទស្សន៍ប៉ុស្តិ៍លេខ៥ និងទី៣. ឈ្មោះ ឡោ សុខហៃ ភេទប្រុស អាយុ៤៥ឆ្នាំ ជាភ្នាក់ ងារសារព័ត៌មានទូរទស្សន៍ប៉ុស្តិ៍អប្សរា Ann ទាំងពីរនាក់រស់នៅក្រុងប៉ៃលិន ។
ប្រភពបន្តទៀតថា លុះភ្នាក់ងារសារព័ត៌មានចំនួនពីរស្ថាប័នបានត្រឡប់ទៅផ្ទះវិញ ស្រាប់តែជនសង្ស័យរូបនោះ បានស្ពាយកាំភ្លើង ជិះម៉ូតូចូលទៅក្នុងផ្ទះជនរងគ្រោះ រួចភ្ជង់គម្រាមបាញ់សម្លាប់ បង្ក ឱ្យមានការភ័យរន្ធត់ រួចរត់ទៅគៀកជាប់ សម្របសម្រួលតែម្តង ។
ចំណែកលោក អ៊ុក ទូច ភ្នាក់ងារសារព័ត៌មានខាងលើ បានរៀបរាប់ទាំងក្តីព្រួយបា រម្ភចំសុវត្ថិភាពសារព័ត៌មានឱ្យដឹងថា បន្ទាប់ពីមន្ត្រីនគរបាលម្នាក់បានយកកាំភ្លើងទៅភ្ជង់ប៉ងបាញ់សម្លាប់លោក នៅល្ងាចថ្ងៃដដែលរួចមក ខាងលោកបានទូរស័ព្ទទៅលោក ញ៉ឹក ថុល អធិការនគរបាលស្រុកសាលាក្រៅដែរ តែលោកសុំសម្រួលគ្នា ហើយខាងលោក(អ៊ុក ទូច) ក៏ប្រាប់ថា ទុកឱ្យច្បាប់ជាអ្នកដោះស្រាយ ។
បន្ទាប់មកលោកបានទាក់ទងទៅលោក ជា ចាន់ឌិន ស្នងការនគរបាលខេត្តប៉ៃលិន ដើម្បីឱ្យចាត់ការទៅលើកូនចៅរបស់ខ្លួនដែរ តែលោកគ្រាន់តែឆ្លើយឡើងថា អត់ទាន់ដឹងរឿងនេះច្បាស់ទេ ចាំសាកសួរមើលសិន ។ ទោះបីជាយ៉ាងណាក៏ដោយ ខាងលោកមិនសុខចិត្តចំពោះការគម្រាមយកកាំភ្លើងសម្លាប់ខ្លួននេះឡើយ គឺលោកនឹងដាក់ពាក្យបណ្តឹងទៅអាជ្ញាធរខេត្ត ឱ្យចាត់ចែងតាមនីតិវិធី ។
ចំណែកភ្នាក់ងារសារព័ត៌មានពីរនាក់ទៀតកំពុងរង់ចាំមើលថា តើជនសង្ស័យខាងលើរួចខ្លួនដែរឬយ៉ាងណាខណៈមានកាំភ្លើងសម្រាប់ការពារប្រជាពលរដ្ឋ បែរជាយកទៅបាញ់បោះសេរី ចូលផ្ទះគេឯង លុះពេលសួរនាំបែរជាគម្រាមសម្លាប់ទៅវិញ ។
គួររំលឹកផងដែរថា កាលពីខែមីនា កន្លងទៅ មានករណី មន្ត្រីសមត្ថកិច្ចនគរបាលស្នងការខេត្តចំនួនពីរនាក់ បានបាញ់បោះសេរីផងដែរ នៅក្នុងហាងសម្រស់ជាយក្រុង ហើយត្រូវបា នថ្នាក់លើបញ្ឈរជើង និងដកឋានន្តរសក្តិផងដែរ ។ តែពួកគេមិនដល់ថ្នាក់ជាប់គុកឬច្រវ៉ាក់អ្វី នោះឡើយ ។ ប៉ុន្តែចាំមើលមន្ត្រីនគរបាលដែលគម្រាមប៉ងបាញ់សម្លាប់ភ្នាក់ងារសារព័ត៌មាន ឆៅៗបែបនេះ នឹងក្លាយទៅជាយ៉ាងណាវិញ៕
ស សារឿន
