រតនគិរី ៖ អធិការស្រុកអូរយ៉ាដាវលោកម៉ៅ សាន់ បានប្រាប់ឲ្យដឹងថាលំនៅដ្ឋានមួយខ្នងសង់ពីឈើប្រកស័ង្កសីមានទំហំ៩x១២ម៉ែត្រ ត្រូវបានអគ្គីភ័យឆេះម៉ត់។ ហេតុការណ៍នេះកើតឡើងកាលពីវេលាម៉ោង១២យប់ថ្ងៃទី២៧ ខែមិនា ឆ្នាំ២០១៦ ត្រង់ចំណុចភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ។
លោកធិការរូបនោះបន្តអោយដឹងទៀតថាអគ្គីភ័យឆេះលំនៅដ្ឋានខាងលើនេះបណ្តាលមកពីភ្លើងចង្ក្រានដោយសារម្ចាស់ផ្ទះធ្វេសប្រហែសព្រោះបន្ទាប់ពីចំអិនអាហារពេលយប់រួចពុំបានពន្លត់ភ្លើងចង្ក្រាន។
លោកម៉ៅ សាន់ បញ្ជាក់អោយដឹងទៀតថា ម្ចាស់ផ្ទះមានឈ្មោះពួយ ឈិន អាយុ៥៥ឆ្នាំ ជនជាតិច្រាយ មុខរបរលក់ចាប់ហួយបន្តិចបន្តួច ប៉ុន្តែសំណាងល្អពុំមានបង្កគ្រោះថ្នាក់ដល់សមាជិកក្រុមគ្រួសារនិងរាលដាលឆេះដល់ផ្ទះអ្នកជិតខាងពោលគឺសមត្ថកិច្ចមូលដ្ឋាននិងប្រជាពលរដ្ឋនៅក្បែរនោះជួយទាន់ពេលវេលា។ ចំណែកទ្រព្យសម្បត្តិនៅក្នុងផ្ទះរួមមានឆេះស្រូវចំនួន៥តោន លុយ១ពាន់ដុល្លា ប្រាក់ចំនួន៣០ម៉ឺនរៀល ម៉ាស៊ីនភ្លើង២គ្រឿង និងម៉ាស៊ីកាត់ស្មៅមួយគ្រឿងត្រូវអគ្គីភ័យលេបត្របាក់អស់។
លោកអធិការបានបន្តទៀតថា មូលហេតុដែលធ្វើការជួយពន្លត់មិនទាន់នោះគឺរថយន្តពន្លត់អគ្គីភ័យស្នងការខេត្តមកជួយដែរតែជួយមិនទាន់ មានចំងាយឆ្ងាយពីខេត្ត៧០គីឡូម៉ែត្រ។
បើតាមពត៌មានពីលោកពួយ ឈិន ភេទប្រុស អាយុ៥៥ឆ្នាំ ជាម្ចាស់ផ្ទះរងគ្រោះបានអោយដឹងថានៅមុនពេលកើតហេតុកូននឹងប្រពន្ធរបស់គាត់បាននាំគ្នាចូលដេកអស់ហើយ ស្រាប់តែដល់ពេលកើតហេតុនោះមានភ្លើងឆេះចេញពីចង្ក្រានបាយខាងក្រោយផ្ទះធ្វើឲ្យពួកគាត់ភ័ឆោឡោ ម្ចាស់ផ្ទះបញ្ជាក់ថាភ្លើងដែលឆេះនេះមូលហេតុកើតចេញពីភ្លើងចង្ក្រានដែលគាត់ដាំបាយពីល្ងាចភ្លេចចាប់ធ្យូងចេញពីចង្ក្រានទើបបង្កឲ្យមានភើ្លងឆេះបែបនេះតែម្តង៕
សន ចាន់ឌី
