មណ្ឌលគិរី ៖ នៅព្រឹកថ្ងៃ០១ មIនានេះ នគរបាលស្រុកកែវសីមា កំពុងស្នើទៅខាងក្រុមគ្រូពេទ្យចុះមកធ្វើកោសល្យវិច្ច័យ លើសាកសពបុរសវ័យ ចំណាស់ម្នាក់ ដែលបានដេកស្លាប់តែម្នាក់ឯងដោយសង្ស័យថា អាចនិងជាប់ពាក់ព័ន្ធជាមួយនិងករណីពុលស្រា។
សូមជម្រាបថា បុរសម្នាក់ត្រូវគេឃើញបានដេកស្លាប់នៅក្នុងផ្ទះរបស់គាត់ កាលពីម៉ោងប្រមាណជា៤ទាបភ្លឺ ឈានចូល ថ្ងៃ ០១មិនា២០១៦នេះ ដែលស្ថិតក្នុងភូមិស្រែព្រះ ឃុំស្រែព្រះស្រុកកែវសីមា ខេត្តមណ្ឌលគិរី។
តាមសំដីសាច់ញាតិបានអោយដឹងថា ជនរងគ្រោះកាលពីល្ងាចថ្ងៃ២៩កុម្ភះ បានជូបជុំគ្នាពិសារស្រាជាមួយអ្នកភូមិ ដែលរស់នៅក្បែរគ្នានោះ។
លោក ស៊ុន ប៊ុនធឿន អធិការនគរបាលស្រុកកែវសីមា បានអោយដឹងថាដោយមានការសង្ស័យនិងសង្កេតឃើញ ជនរងគ្រោះបានពិសារ ស្រាពីពេលល្ងាច និងបានស្លាប់នាវេលាទាបភ្លឺ លោកបានស្នើរអោយក្រុមគ្រូពេទ្យនិង សមត្ថកិច្ចជំនាញចុះហ៊ុមព័ទ្ធផ្ទះជនរងគ្រោះនិងធ្វើការពិនិត្យដោយម៉ត់ចត់។លោកថា ជនរងគ្រោះមានឈ្មោះនឹម វណ្ណា ភេទប្រុស អាយុ៥០ឆ្នាំ មានទីលំនៅចំនុចកើតហេតុខាងលើ។
ក្រោយពិនិត្យសាកសពរួច ក្រុមគ្រូពេទ្យបានសន្និដ្ឋានថា ជនរងគ្រោះមិនមានជាប់ពាក់ព័ន្ធ ជាមួយករណី ពុលស្រា នោះទេ ដោយជនរងគ្រោះបានស្លាប់ដោយសារតែខ្យល់គរតែប៉ុណ្ណោះ ហើយក៏ប្រគល់ជូនក្រុមគ្រួរសារធ្វើបុណ្យតាមប្រពៃណី ៕
ដោយ៖ គឹម ចំរើន
