(ខេត្តកំពត)៖ ម៉ូតូសណ្តោងរឺម៉កដែលផ្ទុកមីកញ្ចប់ដ៏សំពីងសំពោង បានផ្អៀងក្រឡាប់ដោយឯកឯងហើយចាក់កេះមីចោលពេញផ្លូវ ប៉ុន្តែហេតុការណ៍នេះពុំបង្កបញ្ហាដល់អ្នកដំណើរតាមផ្លូវនោះទេ។
ហេតុការណ៍ដ៏ចៃដន្យនេះ បានកើតឡើងនៅវេលាម៉ោង៣និង១០នាទីរសៀល ថ្ងៃទី០៩ ខែមីនា ឆ្នាំ២០២០ ត្រង់ចំណុចមុខកាសុីណូ វីម៉ាណ ក្នុងតំបន់ច្រកទ្វារព្រំដែនអន្តរជាតិព្រែកចាក ស្ថិតក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
តាមប្រភពពីអ្នកដំណើរដែលឃើញហេតុការណ៍ខាងលើ បានរៀបរាប់ថា មុនពេលកើតហេតុគេឃើញម៉ូតូសណ្តោងរឺម៉កនេះបើកបរចេញពីច្រកទ្វារព្រំដែនអន្តរជាតិព្រែកចាក ក្នុងល្បឿនលឿនថែមទាំងបើកជែងគ្មានប្រណី ដោយក្នុងរឺម៉កផ្ទុកដោយកេះមីដ៏សំពីងសំពោង លុះមកដល់មុខកាសុីណូវីម៉ាណ (១៦៨) ស្រាប់តែរឺម៉កដឹកមីផ្អៀងទៅម្ខាង ហើយក៏ផ្អៀងក្រឡាប់យ៉ាងកំរោល បង្កការភ្ញាក់ផ្អើលតែម្តង។សាក្សីបានបញ្ជាក់ថា ក្នុងករណីគ្រោះថ្នាក់នេះមិនបង្កហេតុដល់អ្នកដំណើរណាម្នាក់ឡើយ ដោយគ្រាន់តែធ្វើឱ្យតែកុងរឺម៉ករបួសត្រឹមលាបប្រេងកូឡាប៉ុណ្ណោះ។
ក្រោយពីកើតហេតុម្ចាស់ទំនិញបានហៅកម្មករមកលើកមីសាងដាក់រឺម៉កមួយទៀតហើយដឹកបន្តទៅបាត់ ដោយពុំរំខានដល់លោកសមត្ថកិច្ចណាឡើយ៕ សេង ណារិទ្ធ
