ខេត្តសៀមរាប ៖ នៅសណ្ឋាគារអង្គរប៉ារ៉ាឌី ខេត្តសៀមរាប កាលពីព្រឹកថ្ងៃទី ១៩ ខែមករា ឆ្នាំ២០១៦នេះ មានបើកអង្គសិក្ខា សាលា ស្តីពីការគ្រប់គ្រងតំបន់ដីសើម ដោយបានផ្តោតទៅលើយន្តការអភិវឌ្ឍន៍ប្រកបដោយនិរន្តរភាពជាលក្ខណៈ វិទ្យាសាស្ត្រ និង ការអនុវត្តល្អ សំដៅក្នុងការគ្រប់គ្រងតំបន់ដីសើម នៅតាមតំបន់ទន្លេមេគង្គប្រកបដោយចីរភាព ។ អង្គសិក្ខាសាលាអន្តរជាតិសម្ព័ន្ធភាពតំបន់ដីសើមនេះ រៀបចំឡើងក្រោមកិច្ចសហការជាម្ចាស់ផ្ទះរវាងនាយកដ្ឋាន អភិរក្សតំបន់ដីសើមទឹកសាប នៃ អគ្គនាយកដ្ឋានរដ្ឋបាលការពារនិង អភិរក្សធម្មជាតិ នៃក្រសួងបរិស្ថាន និង វិទ្យាស្ថានបច្ចេកទេសវិជ្ជាអាស៊ីដែលមានរយៈពេល៣ថ្ងៃ ។
អង្គសិក្ខាសាលានេះ គឺជាវេទិកាមួយ សម្រាប់ជួបជុំគ្នា នៃបណ្តាញសម្ព័ន្ធភាពតំបន់ដីសើមក៏ដូចជាអ្នក ជំនាញលើការគ្រប់គ្រងដីសើម ពីបណ្តាសង្គមស៊ីវិល ស្ថាប័នរាជរដ្ឋាភិបាលគ្រប់ជាន់ថ្នាក់ទាំងវិស័យឯកជន អ្នក ស្រាវជ្រាវអ្នករៀបចំគោលនយោបាយព្រមទាំងធ្វើការពិភាក្សា និង ចែករំលែកនូវព័ត៌មានសំខាន់ៗ ពីតំបន់មួយ ទៅតំបន់មួយជាពិសេស នូវបទពិសោធន៍ល្អៗពីគ្នាដើម្បីជាទុនក្នុងការគ្រប់គ្រងតំបន់ដីសើមនិងចូលរួមចំណែក ក្នុងការអភិរក្ស និង ការគ្រប់គ្រងឲ្យបានប្រកបដោយនិរន្តរភាព ក្នុងការប្រើប្រាស់ប្រកបដោយភាពឆ្លាតសំដៅលើក កម្ពស់ ក្នុងកិច្ចគាំពារបរិស្ថាន ការអភិរក្សជីវៈចម្រុះ និង ការរស់នៅប្រកបដោយចីរភាពជូនដល់ប្រជាពលរដ្ឋ ។ ដូច្នេះការថែរក្សាការពារតំបន់ដីសើមគឺជាការឆ្លើយតបទៅនិងការប្រែប្រួលអាកាសធាតុ ហើយការអភិរក្សនិង ការ គ្រប់គ្រងតំបន់ដីសើម គឺជាភារកិច្ចសម្រាប់យើងទាំងអស់គ្នាចូលរួម ។
អង្គសិក្ខាសាលានេះបានប្រព្រឹត្តទៅក្រោមអធិបតីភាពឯ.ឧបណ្ឌិតយឹម គឹមស៊ានរដ្ឋលេខាធិការក្រសួង បរិស្ថាន ឯ.ឧគឹម ឆៃហៀងអភិបាលរងនៃគណៈអភិបាលខេត្តសៀមរាប និង លោកបណ្ឌិត Sivanappan Kumar អនុប្រធានកិច្ចការអប់រំ នៃវីទ្យាស្ថានបច្ចេកវិជ្ជាអាស៊ី របស់ប្រទេសថៃដោយមានបណ្តាអស់លោក លោក ស្រីជាមន្ត្រីបរិស្ថាន ក្រសួងស្ថាប័នពាក់ព័ន្ធ មកពីបណ្តាប្រទេសក្នុងតំបន់អាស៊ី និង អឺរ៉ុប រួម ទាំងអង្គការមួយចំនួនផងដែរ៕
ដោយ (លុច ណាម)
