មណ្ឌលគិរី៖ អាជ្ញាធរក្រុងសែនមនោរម្យធ្វើការរៀបចំសណ្តាប់ធ្នាប់ផ្សារសែនមនោរម្យ ដែលដឹកនាំដោយលោក ឡុង វិបុល បានចុះណែនាំប្រជាពលរដ្ឋ អោយរៀបចំរើតូប ដែលតាំងលក់ចូលចំណីផ្លូវ ដើម្បីអាជ្ញាធរអាច រៀបចំធ្វើប្រព័ន្ធលូទឹក ជូនប្រជាពលរដ្ឋ ដែលនៅតាមបណ្តោយផ្លូវ ក្រោយផ្សារសែនមនោរម្យ ដែលគេហៅថា ផ្លូវគុម្ពឬស្សីនោះ ដែល ធ្វើឡើងនៅ ព្រឹកថ្ងៃទី ២០ ខែមករា ឆ្នាំ២០១៦។
ក្នុងនោះអាជ្ញាធរក្រុងក៏បានសួរសុខទុក្ខដល់ប្រជាពលរដ្ឋផងដែរ។ ការណែនាំនោះគឺ ប្រជាពលរដ្ឋត្រូវ រៀបចំសណ្តាប់ធ្នាប់ ដោយ រុះរើតូបថយក្រោយ ដើម្បី កុំអោយពេលដែលអាជ្ញាធរចុះ ធ្វើលូ មានការប៉ះពាល់ ក្នុងការជីក កកាយដីនៅចំណីផ្លូវនោះ។
ប្រជាពលរដ្ឋនៅទីនោះ បានអោយដឹងថា កន្លងមក ផ្លូវក្រោយផ្សារនោះ មានការលំបាកក្នុងការធ្វើដំណើរ យ៉ាងខ្លាំង ជាពិសេសនៅរដូវ ភ្លៀងធ្លាក់ មានការដក់ទឹក បង្ករជាភក់ច្រំលំបាកធ្វើដំណើរ ។ ពេលម៉ូតូឡានឆ្លងកាត់ សាចទឹកដាក់ពួកគាត់ ដែលជាអ្នកលក់ដូរ ហើយក៏ ប៉ះពាល់ដល់ទំនិញពួកគាត់ ដែលលក់តាមចិញ្ចើមផ្លូវនោះ។
ភាពលំបាកទាំងនោះត្រូវបានកាត់បន្ថយ ជំនួសដោយភាពរីករាយ ងាយស្រួលធ្វើដំណើរ ព្រោះផ្លូវធ្វើថ្មីនោះ ជាថ្នល់ចាក់កៅស៊ូ មិនមានដក់ទឹក ដូចមុនទេជាហេតុធ្វើអោយប្រជាពលរដ្ឋ នៅទីនោះ សប្បាយរីករាយអបអរសាទរ។
យ៉ាងណាក៏ដោយ អភិបាលក្រុងសែនមនោរម្យ លោក ឡុង វិបុល បានអោយដឹងដែរថា កន្លងមកផ្លូវក្រោយផ្សារនេះ ពិបាកធ្វើការអភិវឌ្ឍន៍ដោយសារប្រជាពលរដ្ឋ គាត់សង់តូបចូលចំនីផ្លូវច្រើន ប៉ុន្តែ ក្រោយមកដោយសារមានការសហការល្អ ពីប្រជាពលរដ្ឋ អាជ្ញាធរក្រុង បានធ្វើការអភិវឌ្ឍន៍ផ្លូវនោះ បានដោយជោគជ័យ ផ្លូវនោះ មានប្រវែង ២៨០ ម៉ែត្រ ជាផ្លូវក្រវាត់ ផ្សារសែនមនោរម្យ៕
ដោយ ៖ ហេង ចំណាប់
