(ខេត្តកែប)៖ កាលពីថ្ងៃទី០៣ខែកុម្ភៈ ឆ្នាំ២០២០ លោក កែន សត្ថា អភិបាលនៃគណៈអភិបាលខេត្ត និងជាប្រធានគណៈកម្មការគ្រប់គ្រងតំបន់ជលផលសមុទ្រ បានអញ្ជើញចូលរួមក្នង ពិធីបើកកិច្ចប្រជុំលើកទី១ គណៈកម្មការគ្រប់គ្រងតំបន់គ្រប់គ្រងជលផលសមុទ្រ នៅប្រជុំកោះពោធិ៍ និងកោះទន្សាយខេត្តកែប ដើម្បីពិនិត្យអនុម័តផែនការសកម្មភាពសម្រាប់តំបន់គ្រប់គ្រងជលផលសមុទ្រនៅប្រជុំកោះពោធិ៍ និងកោះទន្សាយខេត្តកែប រយ:ពេល៥ឆ្នាំ (២០១៩-២០២៣) ដែលរៀបចំដោយ៖ រដ្ឋបាលជលផល និងរដ្ឋបាលខេត្ត។
អង្គពិធីមានការអញ្ជើញចូលរួមពី លោកអភិបាលរងនៃគណៈអភិបាលខេត្ត និងជាប្រធានក្រុមការងារបច្ចេកទេស លោក លោកស្រីក្រសួងកសិកម្ម រុក្ខាប្រមាញ់ និងនេសាទ ប្រធានមន្ទីរអង្គភាពពាក់ព័ន្ធ អភិបាល ក្រុង ស្រុក អនុប្រធាន សមាជិក គណៈកម្មការ និងក្រុមការងារគ្រប់គ្រងតំបន់គ្រប់គ្រងអភិរក្សជលផលសមុទ្រ ប្រជុំកោះពោធិ៍ និងកោះទន្សាយខេត្តកែប និងដៃគូរអភិវឌ្ឍន៍។
ក្នុងកិច្ចប្រជុំនេះ លោក កែន សត្ថា អភិបាលខេត្ត បានជំរុញដល់មន្ត្រីជំនាញពាក់ព័ន្ធទាំងអស់ ត្រូវរួមគ្នាថែរក្សា អភិរក្សធនធានធម្មជាតិស្ថិតតាមបណ្តាកោះនៃដែនសមុទ្រក្នុងដែនទឹករបស់ខេត្តយើង ទាំងនៅលើកោះនិងក្នុងដែនទឹក ឱ្យបានគង់វង្ស ដោយឈរលើស្មារតីទទួលខុសត្រូវ ពិសេសការទប់ស្កាត់កុំឱ្យមានបទល្មើសនេសាទខុសច្បាប់ និងជៀសវាងការរុករានខុសច្បាប់ដោយប្រការណាមួយ ដែលអាចធ្វើឱ្យប៉ះពាល់ដល់ធនធានធម្មជាតិរបស់ដែនសមត្ថកិច្ចរបស់ខ្លួន៕ សេង ណារិទ្ធ
