(ខេត្តកំពត)៖ បន្ទាប់ពីអគ្គីភ័យលេបត្របាក់ស្ទើទាំងស្រុង ពេលនេះផ្សារត្រពាំងរពៅ ដែលស្ថិតក្នុងទីប្រជុំជន ឃុំព្រែកត្នោត ស្រុកទឹកឈូ ខេត្តកំពត ត្រូវបានសាងសង់ជិតរួចរាល់វិញហើយ។
បើតាមការកត់សម្គាល់ ទ្រង់ទ្រាយនៃសំណង់ផ្សារត្រពាំងរពៅកាលពីមុន និងការសាងសង់នាពេលបច្ចុប្បន្ន គឺមានភាពខុសគ្នាទាំងសម្ភារៈ ទាំងបច្ចេកទេស និយាយឱ្យចំកាលសំណង់មុនមានលក្ខណៈមិនរឹងមាំ ដោយសារការសង់តូបលើកមុនភាគច្រើនប្រើគ្រឿងសំណង់ឈើមិនសូវប្រើបេតុង ប៉ុន្តែតូបក្នុងផ្សារត្រពាំងលើកនេះ សាងសង់សុទ្ធតែថ្មបេតុងនិងដែក ដោយប្រក់ដំបូលសង្កសីដ៏រឹងមាំ ថែមទាំងសាងសង់មានរបៀបរៀបរយទៀតផង។
ប្រជាពលរដ្ឋភាគច្រើនជាអាជីវករ ក្រោយពីផ្សារត្រពាំងរពៅ ត្រូវបានរៀបចំសាងសង់ជាថ្មីប្រកបដោយគុណភាព និងមានសោភ័ណភាពបែបនេះ ពួកគាត់ពិតជាមានការកក់ក្តៅ ហើយមិនព្រួយបារម្ភដូចមុនឡើយ ព្រោះតែសំណង់ផ្សារ ត្រូវបានពង្រីកទីធ្លាធំទូលាយ ហើយត្រូវក្រុមជាងរៀបគម្រោងសាងសង់ជាថ្មីដោយប្រើសុទ្ធតែសម្ភារៈល្អៗ ប្រកបដោយទំនុកចិត្ត។
សូមបញ្ជាក់ផងដែរថា ការសាងសង់ផ្សារប្រកបដោយភាពស្រស់ស្អាតនេះ បន្ទាប់ពីផ្សារត្រពាំងរពៅចាស់ ត្រូវបានអគ្គីភ័យឆាបឆេះស្ទើទាំងស្រុងកាលពីពាក់កណ្តាលឆ្នាំ២០១៩កន្លងទៅ។ ហើយករណីអគ្គីភ័យលេបត្របាក់ផ្សារត្រពាំងរពៅ ស្ថិតក្នុងឃុំព្រែកត្នោត ស្រុកទឹកឈូ ខេត្តកំពតនោះ តាមសមត្ថកិច្ចជំនាញអះអាង គឺមកពីទុស្សេរខ្សែភ្លើង៕ សេង ណារិទ្ធ
