(ខេត្តកែប)៖ នៅព្រឹកថ្ងៃសុក្រ ២កើត ខែបុស្ស ឆ្នាំកុរ ឯកស័ក ព ស ២៥៦៣ ត្រូវនិងថ្ងៃទី២៧ ខែធ្នូ ឆ្នាំ ២០១៩ លោក កែន សត្ថា អភិបាល នៃគណ:អភិបាលខេត្តកែប អញ្ជើញកាត់ខ្សែបូរសម្ភោធដាក់ឲ្យប្រើប្រាស់ជាផ្លូវការ និងពិធីបួងសួងសុំសេចក្ដីសុខ សេចក្តីចម្រើន នូវរូបសំណាក់ ព្រះបាទជ័យវរ្ម័នទី៧ ដែលមានទីតាំងនៅសួនឧទ្យានសម្ដេចតេជោ( វិមានឯករាជ្យ) ស្ថិតក្នុងសង្កាត់កែប ក្រុងកែប ខេត្តកែប។
ក្នុងពិធីនេះដោយមានការអញ្ជើញចូលរួមពីឯកឧត្ដម លោកជំទាវ សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោកឧត្ដមសេនីយ៍ ស្នងការ ស្នងការរងខេត្ត មេបញ្ជាការ មេបញ្ជាការ រងខេត្ត គណ:អភិបាលក្រុង-ស្រុក នាយក នាយករងរដ្ឋបាលសាលាខេត្ត នាយក នាយករងទីចាត់ការជំនាញ ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបីអង្គភាព ព្រះសង្ឃ លោកគ្រូ អ្នគ្រូក្មួយៗសិក្សានុសិស្ស និងបងប្អូនប្រជាពលរដ្ឋចូលរួមជាច្រើនផងដែរ។
ក្នុងឱកាសនោះ លោក កែន សត្ថា អភិបាលខេត្ត បានលើកឡើងថា បច្ចុប្បន្នក្រោមការដឹកនាំដ៏ប៉ិនប្រសព្វ ប្រកបដោយគតិបណ្ឌិតខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឱ្យប្រជាពលរដ្ឋរស់នៅទូទាំងប្រទេស ពិសេសពលរដ្ឋក្នុងខេត្តកែប គឺរស់នៅមានសេចក្តីសុខសប្បាយ ក្រោមដំបូលសន្តិភាពយ៉ាងពេញបរិបូរណ៍ ហើយការសម្ពោធនូវរូបសំណាកព្រះបាទជ័យវរ្ម័នទី៧នេះ ចាត់ទុកជាសមិទ្ធផលថ្មីសន្លាងមួយទៀត សម្រាប់បន្តដល់កូនចៅជំនាន់ក្រោយៗទៀត ៕ សេង ណារិទ្ធ
