មណ្ឌលគិរី ៖ ការប្រារព្ធទិវារំលឹកខួបលើកទី៣៧ នៃទិវាជ័យជំនៈ៧មករា ឆ្នាំ១៩៧៩-២០១៦ ដែលធ្វើឡើងស្ថិតនៅត្រង់រង្វង់មូលគោព្រៃ កាលពីព្រឹកថ្ងៃទី០២ មករា ២០១៦ ក្រុងសែនមនោរម្យ ខេត្តមណ្ឌលគិរី មានការចូលរួមក្រោមអធិបតេយ្យភាពរបស់ ឯកឧត្តម ទេសរដ្ឋមន្ដ្រី អ៊ឹម ឈុនលឹម រដ្ឋមន្ដ្រីក្រសួងរៀបចំដែនដី នគររូបនីយកម្ម និងសំណង់ និងប្រធានក្រុមការងារថ្នាក់ជាតិ ចុះជួយខេត្តមណ្ឌលគិរី និងការអញ្ជើញចូលរូមពី ឯកឧត្តមប្រធានក្រុមប្រឹក្សាខេត្ត ឯកឧត្តម អភិបាលខេត្ត និងគណៈប្រតិភូវៀតណាមចំនួន៣ខេត្ត ខេត្តដាក់ឡាក់ ខេត្តដាក់ណុង និងខេត្តប៊ិនហ្វឿក ព្រមទាំងមន្ដ្រីរាជការ កងកម្លាំងប្រដាប់អាវុធទាំងបីប្រភេទ ក្រុមយុវជនកាយរិទ្ធកាកបាទក្រហម លោកគ្រូ អ្នកគ្រូ សិស្សានុសិស្ស និងប្រជាពលរដ្ឋចំនួន១៦០០នាក់ផងដែរ។
ក្នុងឱកាសដ៏វិសេសវិសាលនេះ ឯកឧត្តម ទេសរដ្ឋមន្ដ្រី អឹម ឈុនលឹម បានមានប្រសាសន៍ថ្លែងក្នុងកម្មពិធីនេះថា ការធ្វើអង្គមេទិន្ទិញនេះជាការរំលឹកដល់ជ័យជំនៈក្នុងឆ្នាំ១៩៧៩ ហើយជ័យជំនៈ៧មករានេះ គឺជាមរតរបស់រាជរដ្ឋាភិបាល និងប្រជាពលរដ្ឋទូទាំងប្រទេស ដែលនាំមកនូវសុខសន្ដិភាពជូនដល់ប្រជាពលរដ្ឋហើយធ្វើឲ្យប្រទេលយើងកំពុងមានការអភិវឌ្ឍន៍លើគ្រប់វិស័យ ។
ឯកឧត្តមបានបន្តទៀតថា ប្រជាពលរដ្ឋដែលបានឆ្លងកាត់ក្នុងរបបប្រល័យពូជសាសន៍ ប៉ុល ពត គឺមិនអាចបំភ្លេចបានទេ នូវការរស់រៀនមានជីវិតថ្មីឡើងវិញ ដូច្នេះហើយ៧មករា គឺជាថ្ងៃប្រវត្តិសាសន៍សម្រាប់ប្រជាជនទូទាំងប្រទេស ហើយប្រជាពលរដ្ឋមិនអាចបំភ្លេចនៅថ្ងៃ៧មករានេះបានទេ ក៍មិនអាចបំភ្លេចកំពូលថ្នាក់ដឹកនាំដែលហ៊ានស្ម័គ្រចិត្តលះបង់បូជាជីវិតដើម្បីរំដោះប្រទេសជាតិ។
ក្នុងឱកាសនោះដែរ រាជរដ្ឋាភិបាលក៏បានសន្យា និងខិតខំអភិវឌ្ឍន៍ប្រទេសកម្ពុជា ឲ្យមានការរីកចម្រើនកាន់តែខ្លាំងថែមទៀត ហើយថ្នាក់ដឹកនាំនិងរង់ចាំ នូវការរិៈគន់របស់ប្រជាពលរដ្ឋដើម្បីបំពេញនូវកន្លែងខ្វះខាតដែលបងប្អូនប្រជាពលរដ្ឋត្រូវការ។
នាឱកាសនោះដែរ លោក ទឹម សង្វាត ជាប្រធានមន្ទីអប់រំយុវជន និងកីឡាខេត្ត តំណាងឲ្យលោកគ្រូ អ្នកគ្រូ និង សិស្សានុសិស្ស បានធ្វើការថ្លែងអំណរអរគុណចំពោះរដ្ឋាភិបាល ដែលបានផ្តួលរំលំ នៅរបបប្រល័យពូជសាសន៍មានទៅដោយភាពខ្មៅរងឹត ឃោឃៅ អមនុស្សធម៏របស់ប៉ុល ពត ដែលបាននាំមកនូវសន្តិភាពប្រជាធិបតេយ្យជូនប្រជាពលរដ្ឋក្នុងប្រទេសកម្ពុជាយើង។
សរុបមកមានន័យថា យើងទាំងអស់គ្នាមិនអាចបំភ្លេចនូវថ្ងៃ៧មករា ឆ្នាំ១៩៧៩ និង៧មករា ឆ្នាំ២០១៦នេះបានទេ។ នៅចុងបញ្ចប់នៃអង្គកម្មពិធី ឯកឧត្តមមានការចែកអំណោយជូនដល់ប្រជាពលរដ្ឋដែលចូលរួមនូវអាវរងាម្នាក់មួយ ហើយក៍មានការផ្លាស់ប្ដូរវត្ថុអនុស្សាវរិ៍យ៍រវាង ឯកឧត្តម ទេសរដ្ឋមន្ដ្រី អឹម ឈុនលឹម និងថ្នាក់ដឹកនាំខេត្តជាមួយប្រតិភូវៀតណាមទាំងបីខេត្តផងដែរ៕
ដោយ ៖ ហេង ចាន់ណុប
