កំពង់ចាម ៖ ឯកត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅរសៀលថ្ងៃទី០៧ ខែវិច្ឆិកា ឆ្នាំ២០១៩នេះ បានចូលរួមពិធីក្រុងពាលីទូកថ្មី ឈ្មោះដីដុះសែនជយ័បារមីព្រះអង្គខ្មៅ ដើម្បីទៅចូលរួមពិធីប្រណាំងទូកងនៅរាជធានីភ្នំពេញ។
ក្នុងពិធីសំណេះសំណាលជាមួយចំណុះទូកទាំង៧៧រូប នៅវត្តបុទមរតនារាមដីដុះ ស្ថិតក្នុងសង្កាត់វាលវង់ ក្រុងកំពង់ចាម ឯកឧត្តមអភិបាលខេត្ត បានផ្តាំផ្ញើដល់កីឡាករអុំទូក អោយសាមគ្គីភាពគ្នាអោយបានល្អ ស្តាប់ការណែនាំរបស់គណៈកម្មការដឹកនាំទូក គណៈកម្មាធិការរៀបចំបុណ្យអុំទូក និងត្រូវគោរពច្បាប់ កុំប្រព្រឹត្តិនូវអ្វីដែលច្បាប់បានហាម។
ឯកឧត្តម អ៊ុន ចាន់ដា អភិបាលខេត្ត មានជំនឿថា ទូកថ្មីនេះនឹងមានជ័យជំនះលើគូប្រគួតខ្លាំងៗ លេខមួយក្នុងគូពិសេស គឺរក្សាអោយបានលេខ១ដូចឆ្នាំមុនទៀត ដោយលោកជាអ្នកជួយឧបត្ថម្ភផ្គត់ផ្គង់ និងមានរង្វាន់លើកទឹកចិត្តតំកល់ទុក៦លានរៀល សម្រាប់ឧបត្ថម្ភពេលអុំឈ្នះក្នុងមួយជើងជូន១លានរៀលផងដែរ៕
