ខេត្តបាត់ដំបង ៖ កាលពីថ្ងៃទី ២៨ ខែធ្នូ ឆ្នាំ២០១៥ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អមដំណើរដោយ ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង អញ្ជើញមកសាកសួរសុខទុក្ខលោកតា គង់ ស្រ៊ុន ជន្មាយុ ៩១ឆ្នាំ អតីតអនុប្រធានគណៈកម្មាធិការប្រជាជនខេត្តបាត់ដំបង ចន្លោះឆ្នាំ ១៩៨១ ដល់ឆ្នាំ ១៩៩១ ក្នុងរបប រដ្ឋកម្ពុជា ។
ការអញ្ជើញសាកសួរសុខទុក្ខ និងនាំយកថវិកាចំនួន ២.០០០ដុល្លារ ទៅប្រគល់ជូនលោកតា គង់ ស្រ៊ុន គឺជាការយក ចិត្តទុកដាក់របស់សម្តេចក្រឡាហោម ស ខេង ចំពោះអតីតមន្ត្រីចាស់ៗដែលចូលនិវត្តន៍កន្លងមក ។
លោកតា គង់ ស្រ៊ុន ក៏ដូចជា ក្រុមគ្រួសារមានក្តីរំភើបចិត្តរីករាយឥតឧបមាចំពោះការយកចិត្តទុកដាក់របស់ សម្តេចក្រឡាហោម ស ខេង ដែលបានអញ្ជើញមកសាកសួរសុខទុក្ខលោកតា ដល់គេហដ្ឋានតែម្តង និងសូមគោរពថ្លែង អំណរគុណចំពោះ សម្តេចក្រឡាហោម ស ខេង និងសូមគោរពជូនសម្តេច ស ខេង និងលោកជំទាវ ព្រមទាំងបុត្រាបុត្រី ចៅប្រុស ចៅស្រី ជួបតែពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កំបីឃ្លៀងឃ្លាតឡើយ ៕
ដោយ ៖ សារ៉េត
