ខេត្តមណ្ឌលគីរី ៖ នៅរសៀលថ្ងៃទី២៨ ធ្នូ ២០១៥ មានការបើកកម្មវិធី ប្រកាសផ្ទេរភារកិច្ចតែងតាំង និងបំពាក់ឋានន្ដរសក្កិដល់មន្ដ្រីនគរបាលខេត្តមណ្ឌលគិរី និងមន្ដ្រីនគរបាលខេត្តក្រចេះចំនួន៤៩នាក់ ដែលមានស្នាដៃល្អនិងមានការចូលរួមក្រោមអធិបតីភាព ឯកឧត្ដម ឧត្តមសេនីយ៍ ចាន់ អ៊ាន អគ្គស្នងការរងនគរបាលជាតិក្រសួងមហាផ្ទៃ និងការចូលរួមពីសំណាក់លោក ស្វាយ សំអ៊ាង អភិបាលរងខេត្ត កម្មពិធីនេះប្រព្រឹត្តទៅនៅសាលប្រជុំក្រុមប្រឹក្សាខេត្តមណ្ឌលគិរី។
នៅក្នងពិធីប្រកាសផ្ទេរភារកិច្ចតែងតាំង និងបំពាក់ឋានន្ដរសក្កិមន្ដ្រីនគរបាលជាតិ មានក្នងនោះ៖ ០១. លោក ទៀង សៅរ័ត្ន ស្នងការរងទទួលបន្ទុកជនអន្ដោប្រវេសន៍ ទៅជាឧត្តមសេនីយ៍ត្រី(ផ្កាយ១) និងលោកវរសេនីយ៍ត្រី ទូច ដាណារ៉ា អនុប្រធានការិយាល័យប៉ុស្ដិ៍សេដ្ឋកិច្ចនៃស្នងការដ្ឋាននគរបាលរាជធានីភ្នំពេញ មកឡើងកាន់ដំណែងជាស្នងការរងខេត្ត (សក្កិ៥) ទទូលបន្ទុកកិច្ចការព្រំដែន និងរួមទាំងបំពាក់ឋានន្តរសក្កិថ្នាក់វរសេនីយ៍ឯក ០៣នាក់ និងខេត្តក្រចេះ០២នាក់ ថ្នាក់នាយការិយាល័យ ០៣នាក់ ថ្នាក់នាយរងការិយាល័យ ១២នាក់, ថ្នាក់អធិការរង ១២នាក់, ថ្នាក់វរសេនីយ៍ត្រី ០៧នាក់, ថ្នាក់អនុសេនីយ៍ឯក ០២នាក់ និងថ្នាក់អនុសេនីយ៍ទោ ០៨នាក់។
ថ្លែងក្នុងឱកាសនោះដែរ លោក ស្វាយ សំអ៊ាង នៃអភិបាលរងខេត្ត និងឯកឧត្តម ឧត្តមសេនីយ៍ ចាន់ អ៊ាន អគ្គស្នងការរងនគរបាលជាតិក្រសូងមហាផ្ទៃ បានមានប្រសាសន៍ថា ការប្រកាសផ្ទេរភារកិច្ចតែងតាំង និងបំពាក់ឋានន្តរសក្កិមន្ត្រីនគរបាលជាតិ នៃស្នងការដ្ឋាននគរបាលខេត្តទាំងពីរនាពេលនោះ គឺធ្វើឡើងទៅតាមច្បាប់ស្ដីពីលក្ខន្តិករបស់មន្ដ្រីនគរបាលជាតិ ដែលបានរៀបចំឡើងក្នុងការលើកទឹកចិត្តដល់មន្ដ្រីនគរបាលដែលមានស្នាដៃល្អ កន្លងមកក្នុងការបម្រើការងារជូនប្រជាពលរដ្ឋ ។
ក្នុងឱកាសនោះ ឯកឧត្តម បានលើកឡើងពីបញ្ហាអសន្ដិសុខនៅតាមបណ្ដាលខេត្តមួយចំនួនដែលកើតឡើងនាពេលថ្មីៗនេះ ដែលធ្វើឲ្យប្រជាពលរដ្ឋ ជាពិសេសម្ចាស់អាជីវករមានការព្រួយបារម្ភពីបញ្ហាអសន្ដិសុខនេះ ដូច្នេះ ឯកឧត្តម បានធ្វើការណែនាំ និងជម្រុញដល់មន្ដ្រីនគរបាលទាំងអស់ ជាពិសេសមន្ដ្រីនគរបាល ដែលត្រូវបានផ្ទេរភារកិច្ចតែងតាំង និងបំពាក់ឋានន្ដរសក្កិ ធ្វើយ៉ាងណាត្រូវចូលរួមទប់ស្កាត់រាល់បទស្មើសផ្សេងៗ និងត្រូវអនុវត្តន៍នូវគោលនយោបាយ ភូមិ/ឃុំ មានសុវត្ថិភាពទាំង ០៩ចំណុចរបស់រាជរដ្ឋាភិបាល ដើម្បីការពារសុវត្ថិភាពជូនដល់ប្រជាពលរដ្ឋ៕
ដោយ ៖ ហេង ចាន់ណុប
