(ខេត្តកំពត)៖ នៅរសៀល.ថ្ងៃអាទិត្យ ១៤រោចខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៧ ខែតុលា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត អញ្ជើញចូលរួមក្នុងពិធីបើកការដ្ឋានសាងសង់អគារ ថៃ ប៊ុនរ៉ុង កំពត បៀលឌីង ក្រោមអធិបតីភាព លោក ទេព ធន រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
សមាសភាពអញ្ជើញចូលរួមក្នុងឱកាសនោះរួមមាន៖ លោក លោកស្រីជាប្រតិភូក្រសួងរៀបចំដែនដីនគរូបនីយកម្ម និងសំណង់ លោកអគ្គមេបញ្ជាការ កងយោធពលខេមភូមិន្ទ លោក លោកស្រី អភិបាលរងខេត្ត លោកឧកញ៉ា កងកម្លាំងទាំងបី នាយក នាយករងរដ្ឋបាលសាលាខេត្ត ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក នាយក នាយករងទីចាត់ការ ប្រធាន អនុប្រធានអង្គភាព ប្រធាន អនុប្រធានការិយាល័យចំណុះសាលាខេត្ត និងបុគ្គលិកក្រុមហ៊ុនថៃ ប៊ុនរ៉ុង សរុបចំនួន ប្រមាណ ៦០០នាក់។
លោក ជាវ តាយ អភិបាលខេត្ត បានមានប្រសាសន៍ថា ទីផ្សារអចលនទ្រព្យនៅកម្ពុជា បានបង្ហាញពីកំណើនយ៉ាងខ្លាំង នៃប្រភពអចលនទ្រព្យក្នុងស្រុក ហើយជាប្រទេសមានសេដ្ឋកិច្ច លូតលាស់លឿន ដែលវិស័យឧស្សាហកម្ម សំណង់ និងសេវាកម្ម នៅតែជាកម្លាំងចលករយ៉ាងសំខាន់ ទន្ទឹមនឹងនេះកំណើនផលិតផលក្នុងស្រុកសរុបរបស់កម្ពុជា ត្រូវបានរំពឹងថា នឹងកើនឡើងដល់ ៦,៨% នៅឆ្នាំ២០១៩។
លោកអភិបាលខេត្តបានបន្ថែមទៀតថា សម្រាប់ពិធីបើកការដ្ឋានសាងសង់អគារថៃ ប៊ុនរ៉ុង កំពត បៀលឌីង នាពេលនេះ ជាការបើកទំព័រប្រវត្តិសាស្ត្រសំណង់អគារលំដាប់អន្តរជាតិជាលើកដំបូង និងខ្ពស់ជាងគេនៅខេត្តកំពត ដែលបានរួមចំណែកអភិវឌ្ឍន៍សេដ្ឋកិច្ចខេត្តកំពត ហើយសម្រាប់បំពេញតម្រូវការរបស់វិនិយោគិន ភ្ញៀវជាតិ អន្តរជាតិ ធ្វើការបណ្តាក់ទុនវិនិយោគនៅក្នុងខេត្តកំពត៕ សេង ណារិទ្ធ
