នៅថ្ងៃចន្ទទី១៥ ខែមិថុនា ឆ្នាំ២០២៦នេះ វិទ្យាស្ថានពហុបច្ចេកទេសភូមិភាគតេជោសែនស្វាយរៀង បានរៀបចំពិធីអបអរសាទរ «ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩» យ៉ាងគគ្រឹកគគ្រេង ក្រោមប្រធានបទ «TVET ផ្តល់ជំនាញការងារ និងប្រាក់ចំណូល»។
ពិធីដ៏មានសារៈសំខាន់នេះ ស្ថិតក្រោមអធិបតីភាពដ៏ខ្ពង់ខ្ពស់របស់លោក ម៉ែន អេង អភិបាលរងខេត្ត
តំណាងឯកឧត្តម ប៉េង ពោធិ៍សា អភិបាលខេត្តស្វាយរៀង ក៏មានការអញ្ជើញចូលរួមពីសំណាក់ថ្នាក់ដឹកនាំមន្ទីរ-អង្គភាពជុំវិញខេត្ត អភិបាលក្រុង-ស្រុក លោកនាយកវិទ្យាស្ថាន លោកគ្រូ អ្នកគ្រូ បុគ្គលិកអប់រំ តំណាងក្រុមហ៊ុន សហគ្រាស ព្រមទាំងសិស្សានុសិស្ស និងនិស្សិតយ៉ាងច្រើនកុះករ។
នៅក្នុងឱកាសនោះដែរ លោកអភិបាលរងខេត្ត បានថ្លែងទៅកាន់អង្គពិធីទាំងមូល ដោយបានគូសបញ្ជាក់ថា ការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) គឺជាសសរស្តម្ភដ៏មានសារៈសំខាន់មិនអាចខ្វះបាន ក្នុងការអភិវឌ្ឍធនធានមនុស្ស ឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន និងទៅអនាគត។ លោកបានបន្ថែមថា ស្របតាមប្រធានបទឆ្នាំនេះ «TVET ផ្តល់ជំនាញការងារ និងប្រាក់ចំណូល» គឺពិតជាឆ្លុះបញ្ចាំងពីតថភាពសង្គម ដែលយុវជនមានជំនាញពិតប្រាកដនឹងទទួលបានឱកាសការងារខ្ពស់ មានលំនឹងសេដ្ឋកិច្ចគ្រួសារ និងរួមចំណែកយ៉ាងសកម្មក្នុងការជម្រុញកំណើនសេដ្ឋកិច្ចជាតិ ក៏ដូចជាសេដ្ឋកិច្ចនៅក្នុងខេត្តស្វាយរៀងផ្ទាល់។
លោក ម៉ែន អេង ក៏បានជម្រុញនិងលើកទឹកចិត្តដល់ប្អូនៗសិស្សានុសិស្ស និស្សិតទាំងអស់ ត្រូវខិតខំប្រឹងប្រែងរៀនសូត្រ ក្រេបជញ្ជក់ចំណេះដឹង និងជំនាញបច្ចេកទេសទាំងនេះឱ្យបានច្បាស់លាស់ ដើម្បីក្លាយជាកម្លាំងពលកម្មមានជំនាញខ្ពស់ និងមានភាពប្រកួតប្រជែងនៅក្នុងយុគសម័យឌីជីថល បង្កើតឱកាសមាសសម្រាប់ខ្លួនឯង និងសង្គមជាតិទាំងមូល។
បន្ទាប់ពីកម្មវិធីផ្លូវការ លោកអភិបាលរងខេត្ត រួមជាមួយគណៈប្រតិភូ និងភ្ញៀវកិត្តិយសទាំងអស់ បានអញ្ជើញដើរទស្សនាការតាំងពិព័រណ៍ស្នាដៃ និងបច្ចេកវិទ្យារបស់និស្សិតនៃវិទ្យាស្ថានពហុបច្ចេកទេសភូមិភាគតេជោសែនស្វាយរៀង។ នៅក្នុងការតាំងពិព័រណ៍នោះ លោកអភិបាលរងខេត្ត បានបង្ហាញការចាប់អារម្មណ៍ និងកោតសរសើរយ៉ាងខ្លាំងចំពោះគំនិតច្នៃប្រឌិត និងសមត្ថភាពរបស់ប្អូនៗនិស្សិត ដែលបានបង្កើតឡើងនូវសមិទ្ធផលបច្ចេកវិទ្យាទំនើបៗ។
ពិធីអបអរសាទរទិវាជាតិ TVET លើកទី៩ នេះ បានបញ្ចប់ទៅក្រោមបរិយាកាសស្និទ្ធស្នាល រីករាយ និងសាមគ្គីភាពខ្ពស់ ព្រមទាំងបានបន្សល់ទុកនូវរូបភាពអនុស្សាវរីយ៍រួមគ្នាយ៉ាងមានអត្ថន័យ រវាងថ្នាក់ដឹកនាំខេត្ត គណៈគ្រប់គ្រងវិទ្យាស្ថាន និងប្អូនៗយុវជនជំនាន់ក្រោយ៕
