ខេត្តមណ្ឌលគិរី ៖ ចំណតរថយន្ដក្រុងសែនមនោរម្យសព្វថ្ងៃ ប្រៀបដូចជាផ្ទះខ្មោចដែលស្ងាត់ជ្រងំ គ្មានរថយន្ដមួយណាចូលឈប់ចតនៅទីនោះទេ បែរជានាំគ្នាទៅចតនៅកន្លែងសាធារណៈ បង្កឲ្យមានភាពរញ៉ែរញៃគ្មានសណ្ដាប់ធ្នាប់ទៅវិញ ។
ចំណតរថយន្តដែលគេធ្វើឡើងមានភាពស្រស់ស្អាតនិងមានសោភ័ណភាព តែគ្មានឡានក្រុងណាឈប់ចតនៅទីនោះ មានទីតាំងនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
ប្រភពពីប្រជាពលរដ្ឋដែលរស់នៅក្នុងក្រុងនោះបាននិយាយថា ចាប់តាំងពីមានកន្លែងចំណតរថយន្តក្រុងនោះហើយ គេមិនដែលឃើញមានឡានណាមួយទៅចតទីនោះទេ ពួកគេបានទៅឈប់ចតដាក់ម៉ូយនៅនឹងទីផ្សារ ដែលធ្វើឲ្យគ្មានសណ្ដាប់ធ្នាប់ រញ៉ែរញ៉ៃប៉ៈពាល់ដល់អ្នកធ្វើដំណើរតាមដងផ្លូវនិងអ្នករកស៊ីក្នុងផ្សារ ធ្វើមានការកកស្ទះចរាចរណ៍ បង្កឲ្យកើតមានជម្លោះជាមួយអ្នកធ្វើដំណើរនឹងមានគ្រោះថ្នាក់ដល់ការបាត់បង់អាយុជីវិតផងដែរ ។
ប្រជាពលរដ្ឋមានការព្រួយបារម្ភនឹងរូបភាពបែបនេះណាស់ ព្រោះវាធ្វើឲ្យគ្មានសណ្ដាប់ធ្នាប់ក្នុងសង្គម ក្នុងនោះដែលប្រជាពលរដ្ឋមានការងឺឆ្ងល់នឹងបញ្ហានេះណាស់ថា ហេតុអីបានមានកន្លែងដែលគេរៀបចំឲ្យហើយមិនទៅឈប់ចតទៅបែរជាមកឈប់នៅកន្លែងសាធារណៈប៉ៈពាល់ដល់អ្នកដទៃទៅវិញ។
ទាក់ទងនឹងបញ្ហានេះ ប្រជាពលរដ្ឋបានមានមតិថា ហេតុអីបានជាអាជ្ញាធរខេត្តមិនយកចិត្តទុកដាក់សោះអញ្ចឹង នៅទុកឲ្យមានបញ្ហាបែបនេះទៅវិញ ធ្វើឲ្យមានភាពអនាធិបតេយ្យពីមួយថ្ងៃទៅមួយថ្ងៃកាន់តែកើនឡើង។
ប្រជាពលរដ្ឋទូទាំងក្រុងសែនមនោរម្យបានស្នើសុំឲ្យអាជ្ញាធរខេត្តមេត្តាជួយចាត់វិធានការនឹងដោះស្រាយបញ្ហនេះឲ្យមានភាពល្អប្រសើរឡើងវិញ និងរៀបចំសណ្ដាប់ធ្នាប់ទីសាធារណៈ ឲ្យមានសណ្ដាប់ធ្នាប់ឡើងវិញផង ព្រោះនេះមិនមែនគ្មានទីកន្លែងចតនោះទេ ។
សូមបញ្ជាក់ថា ចំណតរថយន្ដដែលគ្មានអ្នកឈប់ចតប្រៀប ដូចជាកន្លែងចំណតរថយន្ដខ្មោចទៅហើយនោះ គេទុកចោលរយៈពេល២ទៅ៣ឆ្នាំមកហើយ ។
លោកអភិបាលក្រុងសែនមនោរម្យបានមានប្រសាសន៍ឲ្យដឹងថា ចំណតរថយន្ដក្រុងនេះ គេធ្វើបានរយៈពេល៥ឆ្នាំមកហើយ និងកាន់កាប់ដោយក្រុមហ៊ុនឯកជន ហើយលោកមកកាន់តំណែងនៅទីនេះ ទើបតែបានរយៈពេលពីរឆ្នាំនៅមិនទាន់បានដឹងពីមូលហេតុឲ្យច្បាស់លាស់បញ្ហាកន្លែងចំណតរថយន្ដក្រុងនេះនៅឡើយ ៕
ហេង ចាន់ណុប
