(ខេត្តកំពត)៖ នៅព្រឹកថ្ងៃពុធ ៣រោច ខែអស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែតុលា ឆ្នាំ២០១៩ រដ្ឋបាលខេត្តកំពត សហការជាមួយមន្ទីរផែនការខេត្ត រៀបចំកិច្ចប្រជុំផ្សព្វផ្សាយស្តីពីការរៀបចំនិងកសាងផែនការអភិវឌ្ឍន៍ខេត្ត ២០២០-២០២៤ ក្រោមអធិបតីភាពលោកស្រី យូ សុគន្ធ អភិបាលរងខេត្ត តំណាងដ៏ខ្ពង់ខ្ពស់ លោក ជាវ តាយ អភិបាលនៃគណអភិបាលខេត្តកំពត នៅសាលសន្និសិទអគារB ។
បានអញ្ជើញចូលរួមក្នុងពិធីនេះរួមមាន លោក លោកស្រី ជាសមាជិកក្រុមប្រឹក្សាខេត្ត លោកនាយករដ្ឋបាលខេត្ត លោក លោកស្រី ប្រធាន អនុប្រធានមន្ទីរ-អង្គភាពជុំវិញខេត្ត អង្គការ សង្គមស៊ីវិល វិស័យឯកជន សរុប ៩៣នាក់។
កិច្ចប្រជុំនេះ រៀបចំឡើងក្នុងគោលបំណង ដើម្បីរៀបចំឯកសារ និងព័ត៌មាននានាពាក់ព័ន្ធនិងការកសាងផែនការអភិវឌ្ឍន៍ខេត្ត និងផ្សព្វផ្សាយអំពីការចាប់ផ្តើមដំណើរការរៀបចំផែនការអភិវឌ្ឍន៍ខេត្ត ដល់អ្នកពាក់ព័ន្ធឲ្យបានដឹង និងបានចូលរួមក្នុងដំណើរការនៃការរៀបចំ និងកសាងផែនការអភិវឌ្ឍន៍ខេត្ត។
លោកស្រី យូ សុគន្ធ អភិបាលរងខេត្តកំពត បានឲ្យដឹងថា គោលបំណងក្នុងកិច្ចប្រជុំព្រឹកនេះ គឺរៀបចំឯកសារពាក់ព័ន្ធនឹងការងារជាច្រើនដើម្បីបញ្ជ្រាបដល់អ្នកពាក់ព័ន្ធឲ្យយល់ដឹងកាន់តែច្បាស់ សម្រាប់រៀបចំកសាងផែនការអភិវឌ្ឍខេត្ត ឆ្នាំ២០២០-២០២៤ ឲ្យទទួលបានជោគជ័យ៕ សេង ណារិទ្ធ
