(ខេត្តកំពត)៖ នៅព្រឹកថ្ងៃព្រហស្បតិ៍ ១២កើត ខែ អស្សុជ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១០ ខែតុលា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានដឹកនាំកិច្ចប្រជុំគណៈកម្មការ និងអនុគណៈកម្មការខេត្ត រៀបចំបុណ្យសមុទ្រលើកទី៨ ជុំទី២ ឆ្នាំ២០១៩ នៅសាលប្រជុំសាលាខេត្តកំពត ។
ក្នុងកិច្ចប្រជុំនាពេលនេះ ក៏មានការអញ្ជើញចូលរួមពីលោក លោកស្រី អភិបាលរងខេត្ត និងជាប្រធានអនុគណៈកម្មការរៀបចំបុណ្យសមុទ្រ លោកស្នងការនគរបាលដ្ឋានខេត្ត លោកបញ្ជាការកងរាជអាវុធហត្ថខេត្ត លោកមេបញ្ជាការតំបន់ប្រតិបត្តិការសឹករងកំពត លោក លោកស្រីនាយក នាយករងរដ្ឋបាលសាលាខេត្ត លោកប្រធានមូលដ្ឋានសមុទ្រ ទីបញ្ជាការជួរមុខ និងនាយកដ្ឋាននគរបាលព្រំដែនទឹក លោក លោកស្រីប្រធានមន្ទីរ អង្គភាពជំនាញជុំវិញខេត្ត លោក លោកស្រីនាយកទីចាត់ការ និងអង្គភាពចំណុះសាលាខេត្តសរុបចំនួន ៩៩នាក់ ។
ក្នុងកិច្ចប្រជុំនេះ លោក ជាវ តាយ អភិបាលខេត្តកំពត បានមានប្រសាសន៍ណែនាំដូចខាងក្រោម៖
+ស្នើលោកស្នងការនគរបាលខេត្ត ទំនាក់ទំនងជាមួយស្នងការនគរបាលរាជធានីភ្នំពេញ ក្នុងការខ្ចីរថយន្តស្ទូច ដើម្បីត្រៀមបង្ការក្នុងអំឡុងពិធីបុណ្យសមុទ្រខាងមុខនេះ។
+ស្នើលោកប្រធានមន្ទីរព័ត៌មាន រៀបចំអត្ថបទជូនដល់អ្នកសារព័ត៌មាន និងវិទ្យុ ដើម្បីផ្សព្វផ្សាយអំពីព្រឹត្តិការណ៍បុណ្យសមុទ្រ នៅខេត្តកំពតឲ្យបានទូលំទូលាយ។
+ស្នើលោកប្រធានមន្ទីរសាធារណការ និងដឹកជញ្ជូនខេត្ត ជួយសម្រួលដល់ហេដ្ឋារចនាសម្ព័ន្ធនៅក្នុងខេត្ត និងត្រូវកំណត់ពេលជួបពិភាក្សាជាមួយ អ្នកវិនិយោគិនចិន ដែលកំពុងធ្វើផ្លូវជាតិលេខ ៣ ដើម្បីពន្លឿនការស្ថាបនាផ្លូវនេះឲ្យបានទាន់ពេលវេលា និងឆាប់រហ័ស ដើម្បីសម្រួលដល់ការធ្វើដំណើររបស់មហាជន និងប្រជាពលរដ្ឋឲ្យមានភាពងាយស្រួល៕ សេង ណារិទ្ធ
