(ខេត្តកំពត)៖ នៅព្រឹកថ្ងៃទី០៦ ខែតុលា ឆ្នាំ២០១៩ គណៈកម្មការរៀបចំការបោះឆ្នោតសភាពាណិជ្ជកម្មនៃក្រសួងពាណិជ្ជកម្មនិងរដ្ឋបាលខេត្តកំពត បានរៀបចំដំណើរការបោះឆ្នោតជ្រើសរើសសមាជិកជ្រើសតាំងសភាពាណិជ្ជកម្មប្រចាំមណ្ឌលខេត្តកំពត-កែប ក្នុងអាណត្តិទី១លើកទី១។
ការបោះឆ្នោតនេះ បានប្រព្រឹត្តទៅក្នុងរយៈពេល មួយថ្ងៃ គឺចាប់បើកការិយាល័យបោះឆ្នោតពីម៉ោង៨ព្រឹក និងបិទដើម្បីរាប់សន្លឹកឆ្នោតនៅវេលារសៀលម៉ោង៣ថ្ងៃដដែល ក្រោមវត្តមានចូលរួមពីលោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម និង លោក ហាស់ សូបិន អភិបាលរងខេត្ត តំណាងលោក ជាវ តាយ អភិបាលនៃគណៈអភិបាលខេត្តកំពត។
តាមនីតិវិធីនៃលក្ខណៈបច្ចេកទេសដំណើរការបោះឆ្នោត នៅពេលនោះមានឈ្មោះអ្នកដែលត្រូវចូលរួមបោះឆ្នោតចំនួនសរុប៤២២នាក់ និងមានបេក្ខជនឈរឈ្មោះ ចំនួន២០រូប ដោយជ្រើសរើសយកតែ១៥រូប និងជាលទ្ធផលបន្តទៀតក្នុងចំណោមសមាជិកទាំង១៥រូប ក៏បានបន្តបោះឆ្នោតជាលក្ខណៈផ្ទៃក្នុងដើម្បី ជ្រើសរើស ប្រធាន អនុប្រធានដឹកនាំការងារ។
សូមជម្រាបថា កន្លងមកសភាពាណិជ្ជកម្មខេត្តកំពត កែប និងតាកែវ ត្រូវបានរួមសហការគ្នាតែមួយ ប៉ុន្តែដោយសារកំណើនសេដ្ឋកិច្ចមានការរីចម្រើនជាលំដាប់ ទើបខេត្តតាកែវត្រូវបានបង្កើតជាសភាពាណិជ្ជកម្មដាច់ដោយឡែកតែឯង ទើបអំឡុងពេលនេះ ក៏ត្រូវបានរៀបចំការបោះឆ្នោតជ្រើសតាំងសភាពាណិជ្ជកម្មខេត្តកំពត-កែប អាណតិ្តទី១ លើកទី១ តែម្តង៕
សេង ណារិទ្ធ
