(ខេត្តកំពត)៖ នៅរសៀលថ្ងៃទី១៨ ខែកញ្ញា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានចុះពិនិត្យមើលទីតាំងដែលជនមិនស្គាល់មុខបានចាក់លុបដីសាធារណៈរបស់រដ្ឋ ត្រង់ចំណុចដៃព្រែកខាងលិចស្ពានក្បាលរមាស ស្ថិតក្នុងភូមិសាស្ត្រស្រុកទឹកឈូ ខេត្តកំពត ដោយការចុះពិនិត្យនិងបញ្ជាឲ្យស្ថាប័ន្ធពាក់ព័ន្ធត្រូវតែកាយអាចម៍ដីចេញនេះគឺជាលើកទីពីរហើយ ប៉ុន្តែគេហាក់មិនទាន់ឃើញផ្នែកជំនាញណាមួយអនុវត្តនៅឡើយទេ។
ក្នុងការដឹកនាំសហការីចុះពិនិត្យលើកនេះ លោកជាវ តាយ អភិបាលខេត្តកំពត បានលើលឡើងថា ដីសាធារណៈរបស់រដ្ឋទាំងអស់ គឺមិនអាចឲ្យបុគ្គលណាមួយមានសិទ្ធិកាន់កាប់ ឬទន្ទ្រានរំលោភយកតាមអំពើចិត្តបានឡើយ ព្រោះករណីបែបនេះវាមិនត្រឹមតែល្មើសច្បាប់ប៉ុណ្ណោះទេ ថែមទាំងជាទម្លាប់ដ៏អាក្រក់មួយដែលគួរតែចៀសវាងឲ្យបាន។លោកអភិបាលខេត្តបានបន្ថែមថា ចំពោះទីតាំងដីដែលបុគ្គលខិលខូចចាក់លុបនេះ គឺជាដៃព្រែកធម្មជាតិ ដែលមានមុខងារយ៉ាងសំខាន់ក្នុងការបណ្តោះទឹកចេញពីប្រភពផ្សេងៗ សម្រាប់នាំចូលក្នុងព្រែកក្បាលរមាស ដើម្បីបញ្ជូនទៅក្នុងសមុទ្រផងដែរ។
ក្នុងដំណាក់កាលនេះ លោកអភិបាលខេត្តក៏បានប្រគល់ភារកិច្ច តួនាទីដល់លោក នាក់ សុវណ្ណារី អភិបាលស្រុកទឹកឈូ ជាអ្នកដឹកនាំដល់ជំនាញនិងមន្ត្រីពាក់ព័ន្ធក្នុងដែនសមត្ថកិច្ចរបស់ខ្លួន ឲ្យបន្តតាមដានរាល់ការអនុវត្តកាយអាចម៍ដីនេះចេញវិញឲ្យអស់ ដូចសភាពដើមវិញដោយគ្មានលក្ខខណ្ឌ។
ជាមួយនេះដែរ លោកអភិបាលខេត្តក៏បានណែនាំបន្ថែមទៀត ដោយតម្រូវឲ្យកាយអាចម៍ដីនេះចេញឲ្យលឿននិងឆាប់បំផុត ដោយមិនត្រូវរង់ចាំឬរារែកអី្វឡើយ ហើយលោកក៏បានក្រើនរំឭកដល់មន្ត្រីពាក់ព័ន្ធ មុននឹងអនុញ្ញាតឲ្យប្រជាពលរដ្ឋណាម្នាក់ សុំច្បាប់ចាក់ដីអភិវឌ្ឍន៍អី្វមួយ ត្រូវតែពិនិត្យឲ្យបានគ្រប់ឯកសារស្របទៅតាមច្បាប់ ថាតើការស្នើសុំចាក់ដីនោះ គាត់មានប័ណ្ណកម្មសិទ្ធិកាន់កាប់ស្របច្បាប់ដែរឬទេ?។
លោកអភិបាលខេត្តបានសង្កត់ធ្ងន់ទៀតថា ក្នុងនាមអាជ្ញាធរមូលដ្ឋានមិនត្រូវអនុញ្ញាតឲ្យមានការចាក់លុបលើដីសាធារណៈរបស់រដ្ឋដោយខុសច្បាប់បែបនេះឡើយ យើងគួរតែចេះសហការគ្នា រួមគ្នាទប់ស្កាត់រាល់បទល្មើសទាំងឡាយ ដែលបានបង្កផលប៉ះពាល់ដល់សម្បតិ្តសាធារណៈរបស់រដ្ឋ និងដីឯកជនដែលគេមានច្បាប់ទម្លាប់ត្រឹមត្រូវ ដើម្បីជៀសវាងកើតជាវិវាទទំនាស់ដីធ្លី នាំឲ្យមានការលំបាកដល់អាជ្ញាធរនិងថ្នាក់ដឹកនាំ។
ជាចុងក្រោយ លោក ជាវ តាយ អភិបាលខេត្តកំពត ក៏បានអំពាវនាវឲ្យអាជ្ញាធរ និងសមត្ថកិច្ចពាក់ព័ន្ធត្រូវស្រាវជ្រាវ វែកមុខរកជនល្មើសឲ្យឃើញ ដើម្បីងាយស្រួលក្នុងការអនុវត្តច្បាប់ ដោយគ្មានការលើកលែងឡើយ ធ្វើបែបនេះសម្រាប់ជាបទពិសោធន៍ និងជាគំរូមួយសម្រាប់អ្នកដ៏ទៃ ដើម្បីឲ្យពួកគាត់ចូលរួមគោរពច្បាប់ទាំងអស់គ្នា៕ សេង ណារិទ្ធ
