(ខេត្តកំពត)៖ គណៈអភិបាលស្រុកទឹកឈូបានលើកឡើងថា ស្ទើរតែរៀងរាល់ឆ្នាំនៅរដូវវស្សា ឃុំម៉ាក់ប្រាង្គ និងឃុំកំពង់គ្រែង និងស្ទឹងកែវ តែរងការជនលិច ជាក់ស្តែងកាលពីខែសីហា ឆ្នាំ២០១៩កន្លងទៅ ដោយឃុំទាំងបីនេះ រងការជនលិចលង់ ដោយសារជំនន់ទឹកភ្លៀងមុនគេ។ ប៉ុន្តែបើទោះជាយ៉ាងនេះក្តី អ្នកជំនាញខាងអចលនទ្រព្យថា តម្លៃដីនៅក្នុងឃុំទាំងបីនៅតែបន្តហក់ឡើងខ្ពស់ដដែល ពិសេសតំបន់ជាប់ជាប់មាត់ព្រែក។
បើតាមការលើកឡើងពីលោកអភិបាលរងស្រុកទឹកឈូ គឺលោក អីុម ច័ន្ទសោធន បានប្រាប់ឲ្យដឹងនៅព្រឹកថ្ងៃទី១៤ ខែកញ្ញា ឆ្នាំ២០១៩នេះថា ស្រុកទឹកឈូមាន១៦ឃុំ ហើយឃុំដែលប្រឈមជាមួយនឹងការជន់លិច ដោយជំនន់ទឹកភ្លៀងខ្លាំងជាងគេបំផុតនោះ គឺឃុំកំពង់គ្រែង ឃុំម៉ាក់ប្រាង្គ និងឃុំស្ទឹងកែវ ដោយសារទីតាំងឃុំទាំងបីនេះ នៅជាប់មាត់ព្រែកកំពត ដែលហូរពីទំនប់វារីអគ្កីនីកំចាយចូលទៅសមុទ្រ។
លោកបានបន្តថា នៅរដូវវស្សា ឃុំទាំងបីនេះតែងតែលិចក្នុងរយៈពេលខ្លី(ពីរ ឬបីថ្ងៃ)ជាប្រចាំ យ៉ាងហោចណាស់ក៏មួយឆ្នាំម្តងដែរ។ មូលហេតុនៃការជន់លិចដោយសារភ្លៀងធ្លាក់ខ្លាំង បូករួមនឹងការបើកទ្វាររំដោះទឹកអាងស្តុបទឹករបស់ទំនប់វារីអគ្គីសនីកំចាយ ព្រមជាមួយនឹងទឹកសមុទ្រជោរផងនោះ បង្កឲ្យមានជំនន់កើតឡើងនៅក្នុងឃុំទាំងបីនេះផងដែរ។
ដោយឡែក លោក ឆូ គន្ធី ម្ចាស់គម្រោងដីឡូត៍កំពតដួងចិត្ត ស្ថិតនៅផ្លូវភ្នំស ភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត បានប្រាប់ឲ្យដឹងថា មុនពេលមានទឹកជំនន់កាលពីខែសីហា ឆ្នាំ២០១៩ រហូតមកដល់ឥឡូវតម្លៃដីនៅតែខ្ពស់ដដែលមិនមានការធ្លាក់ចុះទេ គឺតម្លៃចន្លោះពី ៥០ទៅ ២០០ ដុល្លាក្នុងមួយម៉ែត្រការ៉េ ហើយដីដែលនៅជាប់តាមបណ្តោយដងព្រែក ដែលព្រឈមនឹងការជន់ លិចជាងគេ គឺជាដីដែលមានតម្លៃខ្ពស់ជាងគេព្រោះអតិថិជនដែលមកទិញដើម្បីអភិវឌ្ឍន៍បម្រើ វិស័យទេសចណ៍របស់ខេត្តចង់បានដីត្រង់ចំណុចនោះ ម្យ៉ាងការជន់លិចមានរយៈខ្លី យ៉ាងយូរពីរឬបីថ្ងៃវានឹងស្ថិតមកសភាព ធម្មតាវិញ ហើយកត្តាទឹកជំនន់មិនប៉ះពាល់ដល់ការរស់នៅរបស់ពលរដ្ឋ និងតម្លៃអចនទ្រព្យទេ។
ម្ចាស់អចលនទ្រព្យខាងលើបានបញ្ជាក់អះអាងថា នៅក្នុងភូមិសាស្ត្រឃុំកំពង់គ្រែង ពេលចូលដល់រដូវវស្សាតែងមានទឹកលិចជាប្រចាំមែន គ្រាន់តែតិចឬច្រើន ប៉ុន្តែវាមិនប៉ះពាល់អ្វីធ្ងន់ធ្ងរនោះទេ ហើយដីតំបន់នោះនៅតែបន្តឡើងថ្លៃជាបន្តបន្ទាប់ គឺដីស្រែរបស់ពលរដ្ឋ អាចលក់បានក្នុងតម្លៃជាង៦០ដុល្លារក្នុងមួយម៉ែត្រការ៉េទៀតផង៕ សេង ណារិទ្ធ
