ប៉ៃលិន ៖ កាលពីថ្ងៃទី១៣ ខែធ្នូ ឆ្នាំ ២០១៥ នៅសាលាខេត្តប៉ៃលិន មានពិធីប្រកាសទទួលស្គាល់សមាសភាពគណៈកម្មធិការ គណៈអចិន្ត្រៃយ៍ សមាគមអតីតៈយុទ្ធជនកម្ពុជាខេត្តប៉ៃលិន ក្រោមអធិបតីភាព ឯកឧត្តម កើត សុធា អភិបាលខេត្តប៉ៃលិន។
លោក វរសេនីយ៍ត្រី ស៊ុយ ស៊ីន អានសេចក្តីសម្រេចស្តីពីការទទួលស្គាល់សមាសភាព គណៈកម្មាធិការសមាគមអតីតៈយុទ្ធជនកម្ពុជា ខេត្តប៉ៃលិន រួមមាន លោកឧត្តមសេនីយ៍ត្រី ព្រហ្ម ប៉ាត់ ជាប្រធាន លោកឧត្តមសេនីយ៍ត្រី វ៉ាន់ ណាឡុង អនុប្រធាន លោកឧត្តមសេនីយ៍ត្រី ជា ចានឌិន អនុប្រ ធាន លោក សាក់ សាមឿន អនុប្រធានប្រចាំការ និងសមាជិកចំនួន ២៧នាក់ទៀត។ ប្រកាសទទួលស្គាល់សមាសភាពសមាគមអតីតយុទ្ធជនក្រុង ប៉ៃលិន លោក លឹម វាសនា ប្រធាន លោក សោម រ៉ន អនុប្រធាន លោក ហុង ដារ៉ា អនុប្រធាន លោក ប៉ង យ៉ាវ អនុប្រធានប្រចាំការ និងសមាជិក ១១នាក់ទៀត ។ សមាសភាពសមាគមអតីតយុទ្ធជនស្រុកសាលាក្រៅ លោក ញឹក ថុល ប្រធាន លោក ពិន ភួន អនុប្រធាន លោក ពេជ្រ វ៉ាន់សាង អនុប្រធាន លោក អុឹម សុខា អនុប្រធានប្រចាំការ និងសមាជិក ១១នាក់ទៀត។
ឯកឧត្តម កើត សុធា គណៈអភិបាលខេត្តប៉ៃលិន បានមានប្រសាសន៍ថាៈ គោលបំណងនៃការបង្កើតសមាគមអតីតៈយុទ្ធជនកម្ពុជា គឺដើម្បីចង ក្រងជារចនាសម្ព័ន្ធ សម្រាប់ជួយដល់យោធិនចូលនិវត្តន៍ និង ដើម្បីមានភាពងាយស្រួលក្នុងការអនុវត្តន៍តួនាទី ភារៈកិច្ច អោយចំគោលដៅនៅតាម ថ្នាក់មូលដ្ឋាននីមួយៗ ដែលមានដូចជាថ្នាក់ខេត្ត ថ្នាក់ក្រុង-ស្រុកឃុំ-សង្កាត់ និងភូមិនៅទូទាំងខេត្ត ដោយធ្វើយ៉ាងណាត្រូវពង្រឹងសមាជិកសមាជិការ អោយអនវត្តន៍ការងារនេះដោយរលូន។ ឯកឧត្តម បានសំណូមពរដល់សមាជិកទាំងអស់ ចាប់ពីឆ្នាំ២០១៦ នេះតទៅ យើងទាំងអស់គ្នាត្រូវជួយទ្រទ្រង់ ជាថវិកា រឺសកម្មភាពនានាទៅតាមលទ្ធភាពដែលមាន ដើម្បីជួយសមាគមន៍អតីតៈយុទ្ធជនអោយដំណើរការទៅនិងប្រកបដោយប្រសិទ្ធភាព។
ទន្ទឹមនេះត្រូវចុះសាកសួរ សុខទុក្ខអតីតៈយុទ្ធជននៅតាមមូលដ្ឋានអោយបានជាប់ជាប្រចាំ ដើម្បីដឹងពី ទុក្ខលំបាករបស់យោធិនពិការ ហិយមានវិធានការដោះស្រាយអោយបានទាន់ពេលវេលា ៕
ដោយ ៖ ស សារឿន
