(ខេត្តកំពត)៖ នៅព្រឹកថ្ងៃចន្ទ ៤កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០២ ខែកញ្ញា ឆ្នាំ២០១៩ លោកបណ្ឌិត ប៉ែន ស៊ីម៉ន តំណារាស្ត្រមណ្ឌលកំពត និងជាប្រធានគណកម្មការទី១០ នៃរដ្ឋសភា នីតិកាលទី៦ និង លោក ជាវ តាយ អភិបាលនៃគណៈអភិបាលខេត្ត លោក ជឹង ផល្លា ប្រធានក្រុមប្រឹក្សាខេត្ត ព្រមទាំង លោក លោកស្រី សមាជិកាក្រុមប្រឹក្សាខេត្ត អភិបាលរងខេត្ត រួមនិងថ្នាក់ដឹកនាំមន្ទីរ-អង្គភាព ជុំវិញខេត្ត បានអញ្ជើញចូលរួមពិធីបង្សុកូល និងគោរពវិញ្ញាណក្ខន្ធព្រះសព ព្រះពុទ្ធវង្ស ឯម ភឿង ព្រះរាជាគណៈថ្នាក់ត្រី និងជាព្រះជលធីវាសី ព្រះមេគណខេត្តកំពត នៅវត្តជុំគ្រៀល ឃុំជុំគ្រៀល ស្រុកទឹកឈូ។
នៅក្នុងបរិយាកាសដ៏ក្រៀមក្រំនេះ លោក បណ្ឌិត ប៉ែន ស៊ីម៉ន តំណារាស្ត្រមណ្ឌលកំពត លោក ជាវ តាយ អភិបាលខេត្ត និង លោក ជឹង ផល្លា ប្រធានក្រុមប្រឹក្សាខេត្ត រួមនិងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ ពុទ្ធបរិស័ទ ក្នុងខេត្តទាំងអស់ បានចូលរួមសំដែងនូវសមាណចិត្តដើម្បីរំលែកទុក្ខដ៏ក្រៀមក្រំជាមួយបងប្អូនសាច់ញាតិ និងសូមគោរពបួងសួងឧទ្ទិសកុសលផលបុណ្យដល់ដួងវិញ្ញណក្ខន្ធ ព្រះពុទ្ធវង្ស ឯម ភឿង សូមឲ្យព្រះអង្គបាននិមន្តទៅកាន់សុគតិភព កុំបីអាក់ខានឡើយ។
សូមបញ្ជាក់ថា៖ ព្រះពុទ្ធ វង្សឯម ភឿង បានប្រសូត្រនៅថ្ងៃទី១៥ ខែមករា គ.ស១៩៣៨ ព.ស ២៤៨១ នៅភូមិដំណាក់ចំបក់ ឃុំសំរោង ស្រុកបន្ទាយមាស ខេត្តកំពត។ និងបានទទួលអនិច្ចធម្មនៅវេលាម៉ោង ៧និង៣៨ នាទីព្រឹក ថ្ងៃអាទិត្យ ៣រោច ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែសីហា ឆ្នាំ២០១៩ ដោយព្រះរោគាពាធ ក្នុងព្រះជន្ម ៨១ ព្រះវស្សា នៅវត្តជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។
ក្នុងពិធីនាព្រឹកនេះ លោកបណ្ឌិត ប៉ែន សីុម៉ន បានប្រគេនបច្ច័យ សាងសង់រោងបុណ្យ ចំនួន៧.០០០ដុល្លារ បង្សុកូល៥លានរៀល ប្រគេនព្រះមន្ត្រីសង្ឃ១៩អង្គ ក្នុង១អង្គ១០ម៉ឺនរៀល និងសមណសិស្ស១៨៣អង្គ ក្នុង១អង្គ ២ម៉ឺនរៀល ព្រមទាំងជូនតាជី យាយជី និងកងកម្លាំងនូវថវិកាមួយចំនួន ព្រមទាំងកុំព្យូទរ័ព្រីនធរ័១ឈុតដល់សាលាគណខេត្តផងដែរ៕ សេង ណារិទ្ធ
