(ខេត្តកំពត)៖ នៅព្រឹកថ្ងៃអាទិត្យ ៣ កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០១ ខែកញ្ញា ឆ្នាំ២០១៩ លោក ជាវ តាយ សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈគម្មាធិការគណបក្សប្រជាជនកម្ពុជាខេត្ត និងជាអភិបាលនៃគណៈអភិបាលខេត្តកំពត និងលោក ជឹង ផល្លា សមាជិកអចិន្ត្រៃយ៍គណៈកម្មាធិការគណបក្សខេត្ត និងជាប្រធានក្រុមប្រឹក្សាខេត្ត បានអញ្ជើញចូលរួមក្នុងកិច្ចប្រជុំផ្សព្វផ្សាយ របាយការណ៍ទូទៅ និងការងារគណបក្សឆមាសទី១ និងលើកទិសដៅការងារឆមាសទី២ ឆ្នាំ២០១៩ ក្រោមអធិបតីភាព លោកបណ្ឌិត ប៉ែន ស៊ីម៉ន សមាជិកគណៈកម្មាធិការកណ្តាល និងជាប្រធានក្រុមការងារថ្នាក់កណ្តាលចុះជួយខេត្តកំពត។
អញ្ជើញចូលរួមក្នុងកិច្ចប្រជុំនាព្រឹកនេះរួមមាន៖ លោក លោកស្រី អនុប្រធានក្រុមការងារថ្នាក់កណ្តាលចុះជួយខេត្តកំពត លោក លោកស្រី សមាជិកអចិន្ត្រៃយ៍គណៈកម្មាធិការគណបក្សខេត្ត លោក លោកស្រីសមាជិកគណៈកម្មាធិការគណបក្សខេត្ត លោក លោកស្រីប្រធាន អនុប្រធាន សមាជិកគណបក្សមូលដ្ឋានមន្ទីរ អង្គភាព ជុំវិញខេត្ត ក្រុង ស្រុក ឃុំ សង្កាត់ សរុបប្រមាណ៥៥០នាក់។
ក្នុងឱកាសនោះ លោកបណ្ឌិត ប៉ែន សីុម៉ន ក៏បានគូសបញ្ជាក់ ដោយថ្លែងការកោតសរសើរ វាយតម្លៃខ្ពស់ ចំពោះកិច្ចខិតខំប្រឹងប្រែងពីសំណាក់សមាជិក សមាជិកា និងក្រុមការងារ ដែលជានិច្ចកាលបានអនុវត្តភារកិច្ចបានល្អប្រសើរ។ជាមួយគ្នានេះលោកបណ្ឌិត ក៏បានជំរុញដល់សមាជិក សមាជិកាត្រូវបន្តខិតខំអនុវត្តការងារស្នូលបន្ថែមទៀតដើម្បីបម្រើសង្គមជាតិឲ្យកាន់តែរីចម្រើន និងសេចក្តីត្រូវការរបស់បងប្អូនប្រជាពលរដ្ឋគ្រប់មជ្ឈដ្ឋាន ដោយភាពស្មោះត្រង់ ស្មើភាពគ្នា យុតិ្តធម៌ តម្លាភាព គ្មានការរើសអើងអ្វីឡើយ។
លើសពីនេះ លោកបណ្ឌិត ប៉ែន សីុម៉ន ក៏បានផ្តាំផ្ញើដល់សមាជិក សមាជិកា ក្នុងអង្គពិធីទាំងមូល ធ្វើយ៉ាងណាត្រូវបន្តយកចិត្តទុកដាក់អនុវត្តគោលការណ៍តាមលក្ខខណ្ឌការងាររបស់គណបក្សប្រជាជនកម្ពុជា ពិសេសត្រូវរួមគ្នាថែរក្សាសុខសន្តិភាពឲ្យបានគង់វង្សជារាប៕ សេង ណារិទ្ធ
