ខេត្តកំពត ៖ នៅព្រឹកថ្ងៃសៅរិ៍ ១១រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៧ ខែកក្កដា ឆ្នាំ២០១៩ លោក ជឹង ផល្លា ប្រធានក្រុមប្រឹក្សាខេត្តកំពត បានដឹកនាំគណៈប្រតិភូ អញ្ជើញសួរសុខទុក្ខ និងចូលរួមបុណ្យសពយុទ្ធជនឈ្មោះ សុខ សុវណ្ណឌី បម្រើការនៅកងឯកភាព បញ្ជាការដ្ឋានកាំភ្លើងធំ នៃអគ្គបញ្ជាការដែលរងគ្រោះដែលស្លាប់ដោយបាក់ស្ពានធ្លាក់ទៅក្នុងទឹកនៅខេត្តស្ទឹងត្រែង កាលពីថ្ងៃទី២៤ ខែកក្កដា ឆ្នាំ២០១៩កន្លងមក។
បន្ទាប់ពីពិធីគោរពវិញ្ញាណក្ខ័នរួច លោក ជឹង ផល្លា ប្រធានក្រុមប្រឹក្សាខេត្ត បានសួរសុខទុក្ខចំពោះក្រុមគ្រួសារសព និងសំណេះសំណាលជាមួយបងប្អូន ដែលបានអញ្ជើញចូលរួមក្នុងកម្មវិធីបុណ្យទាំងអស់និងជូនថវិកាចំនួន ៤,០០០,០០០៛ និងអង្ករ២បាវ(១០០គ.ក)ដល់គ្រួសារសព ដើម្បីចូលរួមចាត់ចែងរៀបចំកម្មវិធីបុណ្យសព ទៅតាមប្រពៃណី ស្ថិតក្នុងលំនៅដ្ឋាននៃសព ភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
បន្ទាប់មក លោក ជឹង ផល្លា ក៏បានដឹកនាំសមាជិកក្រុមប្រឹក្សា និងសហការី ដើម្បីបន្តដំណើរទៅចូលបុណ្យសព យុទ្ធជនម្នាក់ទៀត ឈ្មោះ ភិនី ដាលិ ដែលបម្រើការនៅកងឯកភាពបញ្ជាការដ្ឋានកាំភ្លើងធំ នៃអគ្គបញ្ជាការ ដែលបានរងគ្រោះដោយសារបាក់ស្ពានធ្លាក់ទឹកនៅខេត្តសទឹងត្រែង ដែលសពកំពុងចាត់ចែងធ្វើបុណ្យនៅលំនៅដ្ឋានស្ថិតនៅផ្សារតានី ឃុំភ្នំកុង ស្រុកអង្គរជ័យ ខេត្តកំពត ហើយក្នុងឱកាសនោះ លោក ជឹង ផល្លា ក៏បានប្រគល់ថវិកាចំនួន៣,៧៤០,០០០៛ ដល់ក្រុមគ្រួសារសពដើម្បីចាត់ចែងធ្វើបុណ្យតាមប្រពៃណី៕
